Статьи
Творчество
Видео
Кто онлайн?
Пользователей: 0
Гостей: 2
Сегодня зарегистрированные пользователи не посещали сайт

КЬВЕ ДЕРТ...

КЬВЕ ДЕРТ – КЬВЕ БЕРТ ЧIЕРЕДИН

Жегьил чIаван рагъ – экуьнин ярарин,
Цавар, чилер экуь ийиз алахъда.
Жегьлринни муьгьуьббатдин нурарин,
Бахтаварар жеда анжах къужахда.

Рагъ мукьвал я, анжах кьакьан дагълариз,
Бахтарал вил жеда цавай аватдай.
Садбур фида, бахт жагъуриз яргъариз,
Са бязибур аватда гьакI къуватдай.

Жегьил Эмин, акур чIавуз Туькезбан,
Етимвални алат хьана рикIелай.
Буйдиз – шумал, ачух чинин мегьрибан,
Акур чIавуз, алатзавай рекьелай.

Гьар замандихъ авай вичин адетар,
Къанун тирвал, кьиле тухун герек тир.
Пехилвилин авай чIуру гьуьжетар,
Чуьнеба яз, фитне ийиз, зирек тир.

Мад Эминаз такун патал Туькезбан,
Медресадай акъудна ам хъелелди.
Кьве жегьилдин вахтар фена, тир кIубан,
Кутугнавач, чIугуна фин кьилелди.

Сад – Ялцугъа, сад – Кьеана – сузадик,
ЧIугвазвайтIан, кьил Эмина кIанидал.
Жегьилрин рагъ акатнавай къузадик,
ТуькIуьзвачир кар чIаларал, манидал.

Кьве дерт, кьве берт, муьгьуьббатдин чIередин,
Вилер – накъвар, кьвед кьве рикIе шелдик квай.
Зулумар эх тежез къанлу бередин,
Жегьилрин гъам, кьве хуьруьнни элдик квай.

Буба, эхир акъат хьана къапарай,
Туькезбан руш гуда гъуьлуьз гужалди.
Гьамиша ван атIун патал япарай,
Виляй вегьез кIанзавачир рушалди.

Ачух дуьнья чи Эминаз дар хьана,
Вичин дердер элкъуьрзавай чIалариз.
Гьар шиирда Туькезбанан тIвар хьана,
ЭкъечIзавай цуьквер хьана чIурариз.

Эх хъувунач Туькезбана яргъалди,
Эхир кьисмет авуна вич Эминаз.
Цуьк акъудна муьгьуьббатди маргъалди,
Гуз алахъна, кIани ярдиз чими наз.

Кьве берт – кьве дерт муьгьуьббатдин чIередин,
Сагъар тежер, мусиббатдин хер хьана.
Дарман течир, азардик а бередин,
Галукьайла, чи Эминан пер хана.

Эмин – месе, йикье хьана Туькезбан,
Велед кьванни амукьнач са эркек тир.
Акатайдаз тахьун патал гъилибан,
Туькезбаназ яман юкъуз герек тир.

Рушарикай авач кьадай даяхар,
Руш жедалди, къван хьун кIандай виридаз.
ТуькIуьн патал чпин чIуру кIвалахар,
Руш гуз гьазур тир буьркьуьдаз, кьецIидаз.

Эмин, къвез-къвез яваш хьана гьалариз,
ЧIалар кьхьиз, цIивинралди цларал.
Хер акъатна, къуьруьгдай кьван къвалариз,
ГьакI ятIани алахъзавай чIаларал.

Къазанфараз, гьакI ниче са шумудаз,
Чарар рекье туна, кхьей чIаларал.
Куьмек хьанач садавайни гъамлудаз,
Кьиникьин рех акьалт хьана чIарарал.

Туькезбанни хажалатдик, гъамуник,
Бахтни, рагъ хьиз, са далдадихъ кат хьана.
Етим Эмин, алчударна гамуник,
Эхиратдин кIвализ рекье гьат хьана.

Эмин рикIяй акъат тийиз, шелдик кваз,
Туькезбана, мур авуна ширин чан.
Эминан сур, марф къвайи кьван, селдик кваз,
ЦIараз хьана, кьилихъ галай сурун къван.

Урусатдиз акси бунтар себеб яз,
Къазанфар бег Туьркиядиз акъатна.
Дагъви халкьар азадбур хьун метлеб яз,
Ам илимдин пак рекьивай къакъатна.

Дуст Гьасанни акъуднавай Сибирдиз,
Эминаз кас амачир гъил хкаждай.
Са куьмекни амачирла эхирдиз,
Сурухъ ялна Эмина, кьил къакъаждай.

Кьве – берт, кьве дерт чIередин,
Кьве жегьил чан бедбахт хьана, накъвара.
Мецикай рагъ кIвахьай шаир Куьредин,
Уьмуьрлух яз, секинарна накьвара.


 

Комментарии (0)

Нет комментариев. Ваш будет первым!