Ерийрикай

Шиирар ва манияр 

 Москов
ЦIийиз мугьман хьайи сефер,
ЧIугуна гьа пара кефер!
Гъетеривди хъуьрез йифер,
Хуш хьана заз пара, Москов!

Зи хуьруьнви Рафик-алим,
Кьегьелдин хва я микеллим.
Чи жегьилриз чириз илим,
Бегьер гузва тара, Москов!

Гьикьван гуьзел я Ольга свас!
Пачагьдин руш хьуниз тир хас.
Рухваярни цуькверай кьаз,
Шад рикI авай хура, Москов!

Авай кьадар эллерикай,
Поездар физ чилерикай,
Кремладин кIвалерикай,
Я рахадай ара, Москов!

И дуьньядиз машгьур шегьер,
Шумуд виш сан ятIа бегьер?
Сажидина сегьер-сегьер,
Туна сивее-сара, Москов!

ЧIилихъар
Кьакьан синер, багълар, никIер
Акурла шад жеда рикIер.
Гьар са буллах-шуьрбет-шекер,
Чан зи хайи хуьр, ЧIилихъар!

Лекьер къугъваз вили цава,
Атирлу я инин гьава!
Муьгьуьббатдин тIалдин дава-
Чан зи хайи хуьр, ЧIилихъар!

Къизилгуьлдиз авай ухшар,
Ава ина гуьзел рушар.
Мел-мехъеррин авай ашар,
Чан зи хайи хуьр, ЧIилихъар!

Чан ЧIилихъар, чан ЧIилихъар-
Къизилгуьллер тир цIилихъар,
РикIин къеняй хуш я заз ви
Адалатлу тир къилихар!

Чан Хожахуьр
Куьгьне хуьруьн Фазад булах,
Дагъда ама дигиз яйлах.
Бер-къубу къе хьунухь къвалахъ-
Девранар я, чан Хожахуьр!

Шалбуздагъдин гараринди,
Каспии гьуьлуьн нураринди,
Гьар экуьнин яраринди-
Сейранар я, чан Хожахуьр!

ЦIун КIунтIарин къушариз куь,
Вуч гаф ава рушариз куь!
Буй-бухахдин, юкьван шуькIуь-
Жейранар я, чан Хожахуьр!

Эвел бине-дагъ ери тир,
Гила-бустан, багъ ери тир,
Самур вацIун яд-гъери тир,
Аранар я, чан Хожахуьр!

Тек са сефер мугьман хьана,
Фад хъфинал пашман хьана.
Зи дердиниз дарман хьана,
Гьейранар я, чан Хожахуьр!

Кашанхуьр
Кьуд пад чIурар, кьиле-цавар,
ГапIал цифер-лекьрен лувар.
Шагьвар патал гьар югъ сувар,
Вуч бахтавар я, Кашанхуьр?

«Куьлекдин Кьил», «Къула-булах»,
(Аллагьдив гва гьар са кIвалах.)
Са пад къишлах, са пад яйлах,
Вуч бахтавар я, Кашанхуьр?

«АратIан-Тул» «КIару» жедай,
Чуьл цуькверин хуру жедай,
Акур инсан кьару жедай,
Вуч бахтавара я, Кашанхуьр?

Муьгьуьббатдин къашар авай,
Гьуьруь-Пери рушар авай,
Пак Меккедиз ухшар авай,
Вуч бахтавар я, Кашанхуьр?

Чил-агъада, кьилел-цавар,
Шумуд гуьзел я рушан хуьр!
Гьар мугьмандиз ахъа тир вар,
Вуч бахавар я, Кашанхуьр?

ЦицIигъар
Вахтар хьана-дагъ ери тир,
Цуьквериз гуз наз, ЦицIигъар!
Вакай хьана-багъ ери тир
Хуьр-шегьердиз хас, ЦицIигъар!

Абу-земзем гьар са булах,
Чуьллер тир ви цуьквер яйлах.
Гила шегьре рекьин къвалахъ,
Хуьрезва шад яз, ЦицIигъар!

Гьар са гада-са къагьриман,
Гьар са гуьзел руш-мегьрибан,
Гьар межлисда кефер кIубан
ЧIугвазва нез-хъваз, ЦицIигъар!

Хуьре-кIвале, гьар са кимел,
Зарафатрин къурмишда мел.
РикIерик хъвер кутаз чIимел,
Вал ашукь я саз, ЦицIигъар!

Хуш кьабулдай ярар-дустар,
Машгьур я ви виридаз тIвар.
Рахаз чидай гафун устIар
Яз чида куьн заз, ЦицIигъар!

Сажидина-СтIал шаир,
Авуна куь тариф магьир.
Хьун паталди мадни загьир,
КIан я ви тIвар кьаз, ЦицIигъар!

Испик
Кьилихъ дагълар: Шагьни, Шалбуз,
Катин-дагъни хьанвач ялгъуз.
Гьар са кIвалах-виниз, агъуз,
Керчек чидай хуьр я-Испик!

Са пад-«Арал», са пад-«Дугун»,
Им тушни квез Аллагьди гун?
Гьар акурдан рикIи чIугун,
Аламатдин сир я-Испик!

Гуьрчег хуьрер мукьвал-мукьвал,
Вун шагь хьана, ала юкьвал.
Пак михьи тир ви гьар са кьвал,
На лугьуда, пIир я-Испик!

Кагьрабаяр къугъваз хурал,
Гуьзелар я гьар са марал.
Мани лугьуз умун гарал,
Берекатдин цIир я-Испик!

Къацу мехмер Тамар авай,
Чар булахрин кIамар авай,
Шад мехъеррин чамар авай,
Муьгьуьббатдин къир я-Испик!

Чан чи Цумур
Дагъларилай атай гьава,
Лиф хьиз жеда къугъваз цава,
Чи дердериз дарман-дава
Тек са вун я, чан чи Цумур!

Таватар ви гуьрчег рушар,
Малаикриз ятIа ухшар?
Даим жегьил хуьзвай яшар,
Тек са вун я, чан чи Цумур!

Баркаллу тир рухвайрикай,
Рахаз хуш я архайрикай.
Женнет макан махарик квай,
Тек са вун я, чан чи Цумур!

Рычал вацIун дередавай,
Асул бине-Куьредавай,
ЧIагай сусан жуьредавай,
Тек са вун я, чан чи Цумур!

Гьар сеферда хуш тир жузаз,
Хайи хуьр хьиз кIан я вун заз.
Гьар акурла гузвайди наз,
Тек са вун я, чан чи Цумур!

Хъартасар
Агъа Хъартас, Вини Хъартас-гуьнеяр,
РикIериз хуш тушин инин бинеяр?!
Леги хуьрер-гьарма сад са къелеяр,
Гьабурукай сад я, гьелбет, Хъартасар!

Тамун гьава-атирдин хуш гар хьтин,
Гьар цуькведал чиг ацукьда хар хьтин,
Гьуьлуьн цикай рагъ хкечIдай яр хьтин,
Лугьуз-хъуьрез шад я, гьелбет, Хъартасар!

Зегьметдал рикI ава алай жегьилар,
Гуьрчег рушар ава шад тир гуьгьуьлар.
НикIера бул жедай цайи техилар,
Йисан хуш вахт-гад я, гьелбет, Хъартасар!

НуькIрен булах, Къужад булах-булахар,
Пара ава ялар ядай яйлахар.
Сад Аллагьди туькIуьрайдаз кIвалахар,
Пияладин яд я, гьелбет, Хъартасар!

Гуьне хуьрер-куьгьне хуьрер-шегьерар,
Гьабурукай сад я, гьелбет, Хъартасар!
Шад билбилри ядай чIавуз «сегьерар»,
Кьуьзуь хьунухь фад я, гьелбет, Хъартасар!

Кумухрин хуьр
Эвел бине-Кьурагь дагълар,
Гила аран –бустан, багълар.
Югъ-къандивай халкьдин гьалар
 Иер жезвай, Кумухрин хуьр!

Каспии гьуьлуьн серин тир гар,
Къугъваз жеда шив хьиз пайгар.
Йис-сандивай бул ядигар,
Бегьер жезвай , Кумухрин хуьр!

Дагълавай «пIирен» булах
Ядни кIандай галаз къвалахъ.
Билбилри шад ийир яйлах,
Сегьер жезвай, Кумухрин хуьр!

Къагьриманриз ухшар авай,
Вун женнетдин мака няни?
Кьурагь дагълар хьиз кьакьан тир,
Муьгьуьббатдин макан яни?

Аладаш
Са кьил Кьурагь дагълар хьана,
Аран бустан, багълар хьана,
Эвел кьиляй калар хьана,
Машгьур хьана вун, Аладаш!

Кьурагь, Тркал, Гелхен, Хъуьпуьхъ,
Хатур-гьуьрмет авай чпихъ,
Кьудкъад йисуз гелкъвез чилихъ,
Машгьур хьана вун, Аладаш!

Каспии гьуьлуьн къайи шагьвар,
Мукьва я ваз чилер, цавар.
Гьар са гуьзел югъ яз сувар,
Машгьур хьана вун, Аладаш!

Хуш тирвиляй чIугваз зегьмет,
Гуьрчег тир хуьр хьана кьисмет.
Пак еридин аваз кьимет,
Машгьур хьана вун, Аладаш!

Дагъдин лекьер-гьар са эркек,
Маралар я рушар гуьрчег.
Шегьер хьуниз хас яз керчек,
Машгьур хьана вун, Аладаш!

Чи Аладаш
Цуьквер авай гъетерал хьиз чиг алай,
РикIер ава муьгьуьббатдал рикI алай.
Зуьрер ава фин тийидай рикIелай,
Абурукай сад ятIа вун, Аладаш?

Гьуьлуьн лепе акьаз Пеле яр алаз,
Рагъ экъечIа къизилдикай зар алаз.
Хуьрер ава дамахардай тIвар алаз,
Абурукай сад атIа вун, Аладаш?

Зегьмет чIугваз, гьуьрмет аваз кIвалахдай,
Агалкьунар къазанмишиз алахъдай,
Хуьрер ава куьч хьайибур яйлахдай,
Абурукай сад яни вун, Аладаш?

Цав хъуьреда экв чукIуриз къашарал,
Зун ашукь я гадайрални рушарал.
Хуьрер ава жегьил ятIан яшарал,
Абурукай сад вун ятIа, Аладаш?

Сажидиназ акуна ви берекат,
Мугьман я зун къурмишиз куьн мярекат.
Хуьрер ава мидаим квай гьерекат,
Абурукай сад вун ятIа, Аладаш?

Алажаш чи, Аладаш чи, Аладаш!
Ви гуьрчегвал чи рикIелай алатдач.
Вакай мани лугьуз ширин Аладаш,
Са чIавузни галатдач чун, галатдач!

Сийидар
Шегьре рекьин кьве пад кIвалер,
Квез тамашдай кIанда вилер.
Гьар гьафтеда мехъер, мелер,
Жедай макан я Сийидар!

Хуьр яз, акун тегьер шегьер,
Билбилриз ви хуш я сегьер.
Берекатлу гьар са бегьер,
Жедай макан я Сийидар!

Муьгьуьббатдиз дигай яшар,
КIан ятIа квез гуьзел рушар,
Ша, жегьилар, мехъер ашар
Жедай макан я Сийидар!

Чирагъ вацIун къайи шагьвар,
Гатун юкъуз я са сувар.
Яр-дустариз ахъа яз вар
Жедай макан я Сийидар!

ПIирен буллах, чан Сийидар,
Вун такурла рикI жеда дар.
Гьар са юкъуз цIувад мугьман
Жедай макн я Сийидар!

Векьелар
Акьахайла, кьакьан кIунтIал,
Чамардавай гар, Векьелар,
Хуьр акуна гьат хьана тIал,
АтIана рангар, Векьелар.

Малаикриз ухшар авай,
Гадаярни рушар авай,
Женнет тир вун къушар авай,
Гьавадиз азгар, Векьелар.

Къайи шагьвар рахаз йифиз,
Цифер катда луж хьана физ.
Ханлари ял ягъиз, хъфиз,
Кефи тир пайгар, Векьелар.

Икьван гуьзел, гуьрчег ери,
Текдиз туна, катна вири.
Кьеб ичIи яз, шехьиз гьуьруь,
Буш хьана тангар, Векьелар.

Баят хьана гьар са кIвалах,
Етим хьанва шумуд яйлах?
Бедбахт хьайи Куьцуьн булах,
Квахьнава ви кар, Векьелар.

ДаркIушар
Куьреда бул хуьрер ава,
Гьардахъ вичин сирер ава.
Адалатдин цIирер ава,
Уьлкве машгьур квехъ, ДаркIушар!

Либас къацу, атир цуьквер,
Ачух чинар, къени рикIер.
Суьгьбет ширин, мецер шекер,
Лугьуниз я гьахъ, ДаркIушар!

Дагъни Аран кьуна гъиле,
Шад межлисар кIвале-кIвале,
Ахъагъай вил акьаз гьуьле,
Куьруь жеда рехъ, ДаркIушар!

Вилер чIулав гьекьекь къашар,
Чеб женнетдин гьуьруь къушар,
Буй-бухахдин иер рушар,
Акуна заз накь, ДаркIушар!

КIвалер кьакьан, гьяркьуь рекьер,
СтIал вацIун къунши тир кьер,
Гьар са югъ тир мелни мехъер,
Дустар ава захъ, ДаркIушар!

Шад межлисдал атана зун,
Къвез, хъфида датIана зун.
Са руша рикI атIана зун,
ЦIару хьана хъвехъ, ДаркIушар!

Чан зи Кьуьчхуьр
Сувар гунне, Филисан пIир,
Кьуд пад булах чешмеяр тир.
Пак женнетдин авай атир,
Назани я вун, зи Кьуьчхуьр!

Ашукь Саид-шаир еке,
Багъишна шад авур уьлкве.
Куьредавай гъвечIи Мекке,
Медна я вун, зи Кьуьчхуьр!

Ашар вацуIун сирнавдин ван,
Гьикьван рикIиз хуш я жуван?
Беневшайрин алван-алван,
Хазина я вун, зи Кьуьчхуьр!

Берекатлу Кьурагь дагълар,
Куьн ашукьрин ватан яни?
Кьурагь дагълар, мублагь дагълар,
Муьгьуьббатдин дастан яни?

Зугьрабахуьр
Цуькверин тIул алван-алван,
Женнет тушни гатфар чIаван?
Япаравай азандин ван,
Вун пIирерин яйлах яни?

Кьуд райондихъ авай сергьят,
Ярар-дустар кьаз я регьят.
Мус хъвайитIан чандиз менфят,
Гавран къайи булах яни?

Берекатлу Кьелягь никIер,
Шад ийидай халкьдин рикIер,
Шалбуз дагъдин акун кIвенкIвер,
Акун тIимил кIвалах яни?

Зугьраба хуьр-миресрин хуьр,
Халис ватанпересрин хуьр,
Тариф ийиз серес тир хуьр,
Вун зи руьгьдин даях яни?

Агъа магле, вини магьле,
Адалатдин кимер вуч тир?
Къачур чIавуз сусан «къеле»,
Къурмишзавай демер вуч тир?

Зугьрабахуьр, Зугьрабахуьр,
Гардандавай кагьраба хуьр,
Ви муьгьуьббат Сажидинан,
Гьатнава лап кIараба, хуьр!

Шихидхуьр
Экуьн кьиляй къайи шагьвар,
Жеда ярдихъ ийиз ялвар.
Жегьил рикIер патал сувар
Авай макан я, Шихидхуьр!

Гуьнепатан гьар са хуьруьн,
Фу дадлу я, ятар ширин.
Гьар са кимел лугьун-хъуьруьн,
Авай макан я, Шихидхуьр.

Пара ярар-дустар авай,
Алим, чIалан устIар авай,
Берекатар, марф къваз цавай
Авай макан я, Шихидхуьр!

Къуни-къунши ислягь хуьрер,
Са пай шейхер, са пай пIирер,
Кьил акъудиз четин сирер
Авай макан я, Шихидхуьр!

Са пай Тамар, са пай никIер,
Мани лугьуз билбилнуькIвер,
Атир гьава. Чайни шекер
Авай макан я, Шихидхуьр!

Гуьне хуьрер-куьгьне хуьрер,
Ачух ая заз куь сирер.
Инкьилабдин сифте цIирер
Амавй макан я, Шихидхуьр!

ЦIелегуьн
Шалбуздагъдихъ чинар авай кIвалерин,
Ватан я вун мехъерринни мелерин.
Лезги халкьдин берекатлу чилерин,
Зияратдин макан я вун, ЦIелегуьн!

КIуьд хуьруькай кIватIал хьана, шегьердиз
Ухшар яз вун, атана къе бегьердиз.
Билбилар кIватI жедай шад тир сегьердиз,
Зияратдин макан я вун, ЦIелегуьн!

Им тариф туш ийиз жедай акатай,
Шейх Желилаз рагьмет авай чи патай.
Камал-паша-генерал тIвар акъатай,
Зияратдин макан я вун, ЦIелегуьн!

Лайихлу тир рухваяр чах мад авай,
Ибадуллагь стха вуч тир ад авай!
ПIирен буллах- Мекке-земзем яд авай,
Зияратдин макан я вун, ЦIелегуьн!

Жегьил-жаван, рушар алван, бул авай,
Гьава-атир дарман я вун, ЦIелегуьн!
Гатфарни гад, берекатлу зул авай,
Муьгьуьббатдин харман я вун, ЦIелегуьн!

Сажидина, вал рикIивай ашукь яз,
Хас тир тариф авуна къе ачух яз.
Меркез хьтин хуьр дуьзмишай тамлух яз,
Адалатдин макан я вун, ЦIелегуьн!

Белиж шегьер
Самур тамун умун гьава,
Ширин шуьрбет тушни дава?
Билбилрин ван рахаз цава,
Вун гьи кьадар хуш я,Белиж?
Луварал кьур къуш я, Белиж

Белиж шегьер, Белиж шегьер,
Вун гьи кьадар жезва иер?
Баку-Ростов ракьун рекьин,
РикIин хиял-куьлег я вун.
Цуьк авачир жагъидач кьвал.
Вал ашукь яз, хуруда къал
Къачуз , зи рикI буш я, Белиж.

Лезгистандин векилрикай,
Зегьмет кIани жегьилрикай,
Майвайрикай, техилрикай,
Мани лугьур руш я, Белиж.
Берекатлу таран бегьер,
КIватIиз гьикьван хуш я, Белиж?
ъугъваз гьикьван хуш я, Белиж?

Белиж шегьер, Белиж шегьер,
Кьуд уьлкведиз райиж шегьер.
Ракьун рекьер, шегьре рекьер,
Каспи гьуьлуьн къизилдин кьер,
Акваз гьикьван хуш я, Белиж?
Къурмиш ийиз мелни мехъер.

Авун хьана завай тариф,
Кьаради вун кьуртIа гьайиф.
Рагъ алай югъ, варз алай йиф,
РикIиз гьикьван хуш я, Белиж?
Белиж шегьер, Белиж шегьер,
Каспи гьуьлуьн экуьн сегьер.

Куьрхуьр
Багъдат ухшар гуьрчег дере,
Машгьур макан гьар са хуьре,
ЧIехи шаир Мизан Куьре
Меликан ватан я, Куьрхуьр!

Чирагъ вацIун шагьвар серин,
ЧIугвадачни чанди ширин?
Мелни мехъер, лугьун,-хъуьруьн,
Чи жегьилрин чан я, Куьрхуьр!

Тарих къадим Куьре яз вун,
Девлет авай дере яз вун.
Шикилриз гьар жуьре яз вун,
Билбилрин шад ван я, Куьрхуьр!

Шад гадаяр, рушар авай,
Муьгьуьббатдин яшар авай,
Хуьр-шегьердиз ухшар авай,
Ваз тамашиз кIан я, Куьрхуьр!

Лезгистан
Хайи дагълар-Шагьни Шалбуз,
Куьн паталди гуда за чан!
Гьазур я зун гьар са чІавуз,
РикІе туна хуьз, лезгистан!

Сал Аллагьди гайи бахтар,
Вун заз кьисмет хьурай, аман!
Яшамишрай чи шад вахтар,
Экуьвилихъ физ, Лезгистан!

Ша, чан дустар, мехъер, межлис,
Башламишин кутуна ван.
Кьуьлер ийин игитри хьиз,
Шад аферин гъиз, Лезгистан!

Лезгистан зи-чан я, рикІ я,
Бахтлу багъди гъайи цуьк я!
Лазги халкьдин вилик даим,
Уьзуьагъ я, кьилни тик я!

Гияр шегьер
Гияр шегьер, шагьил агъзур йисарин,
Ни сан-гьисаб гуда къвацин сурарин?
Ватан патал чанар гайи ксарин,
Ви чIулав нвакь гьи кьадарда масан я?

Гьи тIурфанрин цIаяр ятIа галукьай?
Напак вилер нибур ятIа алукьай?
Къурху тушир я цIухъй, я вацIухъай,
ЛукI жедалди игит яз кьин хъсан я.

ХарапIаяр хьана элкъвей къванериз,
Чiурарал ман чан хкизва кIвалериз.
Ви гьар са къван элкъвей чIавуз пIирериз,
Душманрилай алат тийир нукьсан я.

Дагъда Гияр, Агъа Каран-аранда,
Гьикьван сирер аматIа куьн кьве чанда?
Куьн машгьур я Турцияда, Иранда,
МуьтIуьгъ тахьай вун ви кьилди са хан я.

Эминахуьр
Шумуд йис тир вун рикIеваз,
Ви суракьдин шад рекьеваз?
Элдин патай салал я ваз,
Эминанхуьр, Эминахуьр!

Гьар шегьерда, гьар са хуьре,
Шад межлисар агъзур жуьре.
Къуба, Хачмаз, Самур, Куьре,
Эминанхуьр, Эминахуьр!

Етим Эмин чи Арандиз,
Багъиш хъувур и деврандиз,
Тамашзава халкь гьейрандиз,
Эминанхуьр, Эминахуьр!

Гьайбатован «шаир Эмин»-
ХупI камаллу кас я муьмин!
Лезги халдин дагъ тир замин,
Эминанхуьр, Эминахуьр!

Къухмаз кIунтIал Шарвили Шагь,
Куьн сад-садав кьазвачни, пагь!
Зунни вал ашукь я, валлагь!
Эминанхуьр, Эминахуьр!

Шииратдин Мекке СтIал,
Сулейманав гума ви тIал.
Шадлу межлис хъия кIватIал,
Эминанхуьр, Эминахуьр!

Сажидина лагьай чIалар,
Къизил гуьллер алай валар,
Вун сагърай шад авур гьалар,
Эминанхуьр, Эминахуьр!

Лув це, лув це гележегдиз,
Къамат гуьрчег, Эминахуьр!
Лув це кьакьан дагъ-этегдиз,
РикIерин экв, Эминахуьр!

ИчIерин хуьр
Къекъвей жигъир рекьер авай,
Цавун аршда лекьер авай,
Даим гарун мехъер авай,
Гуьрчег я вун, ИчIерин хуьр!

Шалбуз дагъдин кьакьан ргар,
Тамашда ваз ажеб пайгар!
Гатуз чIимел, хъуьтIуьз азгар,
Мелек я вун, ИчIерин хуьр!

Вили цава акIурна кьил,
Вацрал яргъи ийида гъил,
Муьгьуьббатдин чидай негъил,
Зирек я вун, ИчIерин хуьр!

Гьар са рушахъ ачух рикIер,
Рухун тIула лала цуьквер,
ЦIемхер буллах-чайдихъ шекер,
Чиг нек я вун, ИчIерин хуьр!

Чар булахар муркIади кьур,
Сур бармакрин чичIерин, хуьр!
Сажидиназ ачух тир хур,
ИчIерин хуьр, ИчIерин хуьр!

Сайтарахуьр
Дуьзен хуьрер, гуьне хуьрер,
АцIанва квяй дуьнья хуьрер.
Даим чав гвай рикIин сирер,
Чан чи макан, Сайтарахуьр!

Ери-бине, диде-буба,
Чун хайи кIвал, чи хуьр-уба,
Меккедилай са кIус зурба,
Чан чи макан, Сайтаран хуьр!

Шалбуздагъдин атир гьава,
Кьилел къугъваз жеда цава.
Гьикьван ширин вахъ ад ава,
Чан чи макан, Сайтарахуьр?

Къалин Тамар, къацу чIурар,
Булахрин ци гудай нурар,
Бахтлу кьисмет-экуьн ярар,
Чан чи макан, Сайтарахуьр!

Сайтархуьр, Сайтарахуьр,
Нвакь къизилдин къатарин хуьр,
Вун машгьур я лезгистанда,
Бажарагълу картарин хуьр.

Макан адлу крарин
Агъа СтIал-макан адлу крарин,
Тарихда вун гьатна къизил гьарфарал.
Гьар илимдин ирид жуьре нурарин,
Ашукь я зун ви медени крарал.
АтIлуханни Вини Ярагъ Мегьамед,
Кьве шейхдизни Аллагь патал я рагьмет!

Девирар къвез селлер хьтин вацIариз,
Физва кьисмет кьил гьар патахъ къекъуьриз.
Камаллуяр ивичIзава яцIариз,
Зигьиндин цIай халкьдин кьиле куькIуьриз.
Етим Эмин, Абдул Фетягь эфенди,
«Гьинва?»-лугьуз тушни шиир кхьейди?

Сулейманни СтIал Саяд-шаирар,
Абурун кар давамайбур пара я.
Илим вилик тухуз физва магьирар,
Тесниф авур ктабар са хара я.
Абдул Эгьяд-чIехи буба тIвар алай,
Къе шад тир югъ я ви кьилел зар алай!

Сагъ хьурай зи СтIалвияр, эллериз,
Вафалувал къалурзавай гьамиша!
Девлетар кIватI жедайди хьиз гьуьлериз,
Куьне рикIер лезги халкьдиз багъиша!
Чун чир хьарай вужар ятIа виридаз,
Къурбанд хьурай чаз СтIалар гайидаз!