Букет песен

Стихи, ставшиеся песнями 

 МАНИЙРИН КIУНЧI

САЖИДИН

ЯСМИН ТӀВАР АЛАЙ ПТУЛДИЗ

                            Заринадиз бахш яз
Рагъ акьурла хъуьрез вердиш цуьк хьтин,
Вун бадедин багьа руш я рикӀ хьтин.
Гатфар гъизвай гуьзел билбил нуькӀ хьтин,
Вун бахтлу хьухь лагьай чӀавуз, Ясмин руш,
Бубадиз къул чӀугу, лугьуз – Амин, руш!

И дуьньядал алай кьадар рушарин
Арада вун шагь я таза яшарин.
Мез ширин вирт, руьгьдин экуь къашарин,
Камаллу хьухь лагьай чӀавуз, Ясмин руш,
Бубадиз къул чӀугу, лугьуз – Амин, руш!

Лиф са затӀ туш – ничхир я ам луварин,
Вун аквазвай гьар са югъ я суварин.
Малаик тир Сад Аллагьдин цаварин,
Абурлу хьухь лагьай чӀавуз, Ясмин руш,
Бубадиз къул чӀугу, лугьуз – Амин, руш!

ЧӀехи буба патал шиир туькӀуьрай,
Вун гъед ятӀа чи рикӀера куькӀуьрай?
Салам рекье тур вахтунда чи хуьряй,
Сабурлу хьухь лагьай чӀавуз, Ясмин руш!
Бубадиз къул чӀугу, лугьуз – Амин, руш!

Амина

Саидахмедоврин хизандиз

ЧIун-чIун хьана чIарар къугъваз къуьнерал,
Милиз-милиз хъуьреда вун вилерал.
Гьар са кIвалах алаз жедай гъилерал,
Ажеб зерек руш яни вун, Амина?

 

Гатфар хьана къужахдавай цуькверин,
Япара ван жеда билбил нуькIверин.
Къизил гуьл хьиз закIалдавай чигерин,
Ажеб гуьрчег руш яни вун, Амина?

 

Хуьре-кIвале гьатда ви ад дамахдин,
Куркурдин ван жеда сивел булахдин.
На лугьуда, женнетдавай яйлахдин,
Ажеб мелек руш яни вун, Амина?

 

Сажидина, гьелелигда такуна,
Ви гуьзел тир шиир-шикил чIугуна.
Гьелелигда рикI аламай къугъунал,
Ажеб гуьзел руш яни вун, Амина?

 

Припев:
Магьарамдхуьр бине я ви женнетдин,
Вун багъдавай билбил ятIа, Амина?
Лезги халкьдин бике жедай гьуьрметдин,
Аферинрин гуьгьл ятIа, Амина?

 

 МАРИНА
Еке гьуьрметдив Алимегьамедаз бахш яз

Тарсар гайи вахтар гьар са аялдиз,
Вун акуна хтана зи хиялдиз.
Жавабар гуз вердиш гьар са суалдиз,
Вакай хъсан инсан хьана, Марина!

Гьикьван гуьзел йисар тир а чIаварин,
Школадин гьар са югъ тир суварин.
Кьилел ислягь гъетер алай цаварин,
Вахтар хьана, хъсан хьана, Марина!

Ибн Синан сирер чирна ширин тир,
Чирвилерин гьуьл хьурай вахъ дерин тир,
Бахтлу йикъар кьисмет хьана къалин тир,
КIан я заз квехъ хизан хьана, Марина!

Веревирдер авуна хьиз, кьатIана,
Вун патал за шиирдин гам атIана.
Шаирвилел ашукь хьана датIана,
Зунни кьудкъад йисан хьана, Марина!
 

Радмила свас
Бутаеврин хизандиз бахш 

Хайи хизан, кIвал-югъ ширин,
Машгьурзавай кас тIвар хуьруьн,
Пара кьадар акьул дерин,
 Камаллу свас я Радмила!

 

Вуч затI ятIа течир туьгьмет,
Халкьдин патай авай гьуьрмет,
ЧIугваз чидай югъ-йиф зегьмет,
 Камаллу свас я Радмила!

 

Хайи макан - алимрин хуьр,
Гъайи макан – малимрин хуьр,
Зуьгьре гъед тир цава куькIуьр,
 Камаллу свас я Радмила!

 

Гьар са пеше чидай ариф,
Гьар сана ви ава тариф.
Гъиляй крар къведай зариф,
 Камаллу свас я Радмила!

 

Вунни юлдаш – виртни гъери
Хьунал шад я бах – ви къари.
Дамахар гвай женнет гьуьруь,
 Камаллу свас я Радмила!

 

Сажидиназ авур хатур,
Германаз са кIекрен ятур.
Захъ и кьадар шадвал кутур,
 Камаллу свас я Радмила!

 

Фаядиз 

Вичихъ тариф авай еке,
Гуьзел рушар авай уьлкве,
Куьре патан адлу бике,
Гуьзелрин гуьзел я Фая!

 

Абур, мишреб, къекъуьн дамах,
Чин пIинидин, сивни уймах,
Сарар седеф, пIузар къаймах,
Гуьзелрин гуьзел я Фая!

 

Ачух рахун, мезни ширин,
Акьул авай руш я дерин.
Лали гевгьер СтIал хуьруьн,
Гуьзелрин гуьзел я Фая!

 

Таяр-туьшер, дустар ава,
Рехъ къалурдай устIар авай,
РикIе еке къастар авай,
Гуьзелрин гуьзел я Фая!

 

Маса пата ихьтин рушар,
Тек-бир жеда, билбил ухшар.
Цуькведавай вичин яшар,
Гуьзелрин гуьзел я Фая!

 САФАРИ

 

 
Шагь дагъларин синераллай хар хьана,
Атай цифер Хазар гьуьлел гар хьана,
Пекдин чIарар къуьнераллай зар хьана,
Вун Дербентдин марал я жал, Сафари?

Къизилгуьллер хъуьрез вилер, шад хьана,
Гьар са зерре Мекке Земзем яд хьана.
Лезги чилел алайди ви ад хьана,
Вун Дербентдин марал я жал, Сафари?

Женнетдин нур аквазва ви вилерай,
Атирдин ни къвезва яргъи тиллерай.
Лали гевгьер хьиз жагъанвай гьуьлерай,
Вун Дербентдин марал я жал, Сафари?

Ван хьайила Аллагьдиз зи гафарин,
Вал бахт къвада цуьквер хьана гатфарин.
Туьтуь къуш тир, тIварни къизил гьарфарин,
Вун Дербентдин марал я жал, Сафари?

Сажидинахъ гуьзел гафар мад авай,
Гьар садахъ са ширин нямет-дад авай,
РикIин къене гуьзел гатфар, гад авай,
Вун Дербентдин марал я жал, Сафари?
Припев:
Цава гъетер, чиле цуьквер атирдин,
Руьгь кутуна зак и гуьзел гафари.
Лайихлу руш муьгьуьббатдин къадирдин,
Вун Дербентдин марал я жал, Сафари?

Фатима 

Кьакьан Шалбуз, пIирер яйлах,
Абу-земзем гьар са булах,
Такур инсан жедач чIалахъ,
Гуьзел хтул я Фатима.

 

ЧIулав кифер къуьнераллай,
Лугьуз-хъуьрез гъенераллай,
Диде-бубад гъилераллай,
Гуьзел хтул я Фатима.

 

Гуьзел макан Къурушрин хуьр,
Гьикьван хъсан хьанва туькIуьр?
Зуьгьре гъед хьиз цава куькIуьр,
Гуьзел хтул я Фатима.

 

Диде-бубад рикIин хиял,
Тек-тек жеда гьар са аял.
Дуьз патахъди ийидай ял,
Гуьзел хтул я Фатима.

 

Сажидиназ куьрпе рушар,
Хуш я гзаф гъвечIи яшар.
Малаикдиз халис ухшар,
Гуьзел хтул я Фатима!

 

Фарида

ЧIарар чIулав, чин лацу агъ,
СтIалжуван руш – Фарида;
Гатфарихъ цуьк ахъагъай багъ,
Вун я туьтуь къуш, Фарида!

 

ПIузар некьи, сарар седеф,
Мад акурди туш, Фарида.
Уьмуьр жегьил – экуьн ярар,
Гьикьван я вун хуш, Фарида?

 

Сажидина кхьей шиир –
Я къизилдин къашар магьир.
Зуьгьре гъед хьиз цава куькIуьр,
Вун я гуьзел руш – Фарида!
 

Кьасумхуьруьн рушар сагърай

Дагъларилай къарагъай гар,
Акьадачни пеле пайгар?
Цуьквериз хас авай рангар,
Кьасумхуьруьн рушар сагърай.

 

Гъиле кIвалах, сивел хъуьруьн,
Хьунухь адет я и хуьруьн.
Рахаз чидай мецел ширин,
Кьасумхуьрун рушар сагърай.

 

Гуьрчегвилиз авач къаншар,
Гьарма сад са багьа къашар.
Цуькведавай таза яшар,
Кьасумхуьруьн рушар сагърай,

 

Тикрар:
СтIал вацIун дередавай,
Тухум-тара Куьредавай,
ИситIаяр шуьредавай,
Кьасумхуьруьн рушар сагърай.

 

Чир тавунал рикIерин сир,
Сажидинан я ам тахсир.
Муьгьуьббатдал кьадай есир,
Кьасумхуьруьн рушар сагърай.

 

Селимат

Лацу чинал къугъваз сегьер,
Хайи макан Дербент шегьер,
Вун гьи багъдин ятIа бегьер?
Чан женнетдин къуш, Селимат!

 

Лезгистандин хуьрерикай,
Пуд СтIаларин пIирерикай
Аламатдин сирерикай,
Рахаз я ваз хуш, Селимат!

 

Муьгьуьббатдиз хас тир яшар,
Пара ава гуьзел рушар.
Гьелелигда а ваз ухшар,
Акунач заз руш, Селимат!

 

Тикрар:
Цуьквераллай дагъда авай,
Шагьнабатдин чиг, Селимат!
Бахтлувилин багъда авай,
Чан билбилдин рикI, Селимат!

 

Альбина

Мезре кьуна цуьквер авай яйлахдин,
Хъуьрез-хъуьрез яд авахьда булахдин.
Сирер дерин чидай гьар са кIвалахдин,
Куьредавай маралрин шагь, Альбина.

 

ЧIехи хьана Уллу-Гъетягъ дереда,
Цуьк хьиз заз вун аквада гьар жуьреда.
Рагъ гьамиша заз ви чинай хъуьреда,
Куьредавай маралрин шагь, Альбина.

 

АтанватIан чагъиндин са яшариз,
Ви гуьрчегвал ганвач бязи рушариз.
Седеф сарар ухшар багьа къашариз,
Куьредавай маралрин шагь, Альбина.

 

Дуьнья я им гьал ийидай девранар,-
Лугьуз чуьлда къугъваз жеда жейранар.
Шумуд на вал авунватIа гьейранар,
Куьредавай маралрин шагь, Альбина?

 

Ви уьмуьрдин берекатрал чиг ала..
Шад манийрал, кьуьлерал ви рикI ала.
Вал гьамиша таз тарал хьиз цуьк ала.
Куьредавай маралрин шагь, Альбина.

 

ЧIалар туькIуьр тавуртIа за датIана,
Сажидинан чешнедин яд атIана.
И кIвалахни вуна шаксуз кьатIана,
Куьредавай маралрин шагь, Альбина.

 

Карина

Бубад къилих, дидед къамат кьизил тир,
На лугьун ам багьа къаш, са къизил тир,
Вилик гуьзел уьмуьр галай жегьил тир,
Са руш я ам, акьул дерин Карина.

 

Шагьни Шалбуз дагъларин вун дамах я.
Ширин тир сес-Абукевсер булах я.
ПIузар келечI, сив къизилдин уймах я,
Акун гуьрчег, рахун-хъуьруьн, Карина.

 

Тай-туьшерин арада вун са цуьк я.
Диде патал хура авай са рикI я.
Чун паталди вун билбилдин са нуькI я,
Ви чина чаз такуй серин, Карина.

 

Шаир буба Сажидиназ цуькведин,
Руш хьиз я вун хайи лезги уьлкведин.
Чирвал авай камаллу тир бикедин,
Руш хьурай вун чIилихъарин, Карина.

 

Ирина

Ажеб гуьзел вахт яни им?
Таза къизил гуьллер авай.
Муьгьуьбатдин бахт яни им?
Шад межлисар, кьуьлер авай.

 

И гуьзел тир гатфарин вахт,
Чи жегьилрин шад девир я.
Цуькверикай туькIуьрай тахт,
Кьилел алай шад уьмуьр я.

 

Билбилри хьиз лугьуз мани,
Ша, чуьллера гьалин девран.
Вун зи руьгь я рикIяй кIани,
Вун акурла я зун гьейран!

 

Тикрар:
Вун зи рикIин хиял я,
Зи вилерин эк я вун.
Чи жегьилрин арада,
Гуьрчегвилиз тек я вун!

 

Къавумдин руш, Зарема

Акур инсан ийир гьейран,
Гьалтна вун зал хаму жейран.
Пел лацу жив, хъуьхъвер яран,
Беневшадин цуьк, Зарема.

 

Билбил хьана рахаз тара,
Ша, атIумир на зи чара.
Муьгьббатдив авай ара,
Беневшадин цуьк, Зарема.

 

Сад Аллагьдин гьахъ я кьисмет,
Герек къведач гатун кьил-мет,
Чаз мугьман хьухь, аман минет,
Беневшадин цуьк, Зарема.
 

Тикрар:
ПIузар къизил гуьллерин,
Муьгьуьббатдин вилерин,
Залумдин руш, Зарема!
Мехъеррини мелерин,
Чархачи тир кьуьлерин,
Къавумдин руш, Зарема.

 

Чан зи Фазина

Муьгьуьббат-са затI я,
Дуьнядин хазина.
Вун себеб зун шад я.
Чан зи Фазина!

 

Булахда яд рахаз,
Хуьрезва цуьквериз.
Акурла мад рахаз,
Хуш жезва рикIериз.

 

Гъилер кьан гъилера,
Гьал ийин девранар.
Кеф чIугваз чуьллера,
Къугъурай жейранар.

 

Уьмуьрдихъ вичин дад
Вирт ава ширин тир.
Захъ мурад ама сад-
КIанивал дерин тир.

 

Девррин яцIарай,
Акъудда за вун.
Кьисметдин вацIарай,
Къакъудда за вун.

 

Чидач заз

Вахтар фена билбилар хьиз хъуьредай,
На лугьун, вацI сел кваз фена дередай.
Вилин накъвар авахьна физ чIередай,
Вучиз икI вун сефил ятIа чидач заз.

 

Кьисмет лугьур агъдабандин кар ятIа?
Заз чидач вун бахтлу касдин яр ятIа.
Ваз чидач гьа зи рикI гьикьван тIвар
Ви яр кьванни жегьил ятIа чидач заз.

 

Кимибурун бахтар ахъа жедалда.
Гуьрчегбурни акьуллуяр жедалда
РикIиз дакIан кIус тIуруниз къведалда,
Ви дерт залан, кьезил ятIа чидач заз.

 

Яшлувилин жив къванватIа чIурара?
Жегьилвилин рангни амач чIарара.
Эй Сад Аллагь, авайла зун ахвара,
Ви дерт залан, кьезил ятIа чидач заз.

 

Сад атана, кIусни инсаф тахьана,
Гъил вахчуна, захъ галаз туьнт рахана.
Са кIус амай за адан кьил тахьана,
А небгет кас ви гъуьл ятIа чидач заз.

 

Сажидинахъ гъамар эхдай чан ава,
ВакIан пеле итим кьейи къан ава,
Зи япара шад манийрин ван ава.
Ам вун ятIа, билбил ятIа чидач заз.

 

Рушар ава чи СтIалдал
 

Шагь бикейрин чешме Куьре,
Гьар са хуьре гьар са жуьре.
ПIузар ципицI, хъуькъвер дере,
Рушар ава чи СтIалдал.
 

 

Буй такабур, лацу гардан,
Акурла кIан жеда бирдан.
Мециз ширин, гъилиз мердан,
Рушар ава чи СтIалдал.

 

Чил шиткидай яргъи кифер,
Муьббатдиз хас тир лифер.
Хуш тир акун гьар са сефер,
Рушар ава чи СтIалдал.

 

Квез герек я артух тариф?
Кьисмет тахьун гуж я гьайиф.
Гьар са рекьяй кIелай ариф,
Рушар ава чи СтIалдал.

 

Вини-, Кьулан-, Агъа-СтIал,
Гевгьерар я гьар са стIал.
РикIе твадай ашкидин тIал,
Рушар ава чи СтIалдал.

 

Сажидинахъ ава кьатIун,
УстIарвилел чIалар атIун.
Женнетдин гьар сад са хатун,
Рушар ава чи СтIалдал.

 

Насият

Кьакьан гъетер куькIуьннавай къашар тир,
Малаикар Женнет эгьли рушар тир,
Зи рикIевай муьгьуьббатдиз ухшар тир,
Виридалай вун кIан я заз, Насият.

 

Ваз хуьз чида хатур халис инсандин.
Зун иеси хьана чIехи хизандин.
Ви теменрихъ дад амачтIан гузандин,
Виридалай вун кIан я заз, Насият.

 

Жегьил йисар кьилин вирт тир булахдин,
ФенатIани амазма вун мумлахдин.
Мидаим кьил тир абурлу кIвалахдин,
Виридалай вун кIан я заз, Насият.

 

Хьанач завай хуьз ви хатур кIанивал.
Къилихдиз зи хас лишан туш тинивал.
Зун хкIида цавук ви ван хьайивал.
Виридалай вун кIан я заз, Насият.

 

Хъсанвилер гьисаб жедач тупIарал.
Хци я вун сивелдини япарал.
Рази тежер темпелвал гвай папарал,
Виридалай вун кIан я заз, Насият.

 

Дуьз хиве кьан, вун вирт я, зун ниси я.
Лугьумир зун кьуьзуь кьиляй аси я.
Вафалу хьухь, им зи патай веси я.
Виридалай вун кIан я заз, Насият.

 

РикI акъудна къалур жедач хуравай
Ви бегьер гъиз жедач гьич са таравай.
Сажидиназ муьгьуьббатдин фуравай,
Виридалай вун кIан я заз, Насият.

 

Жавгьанат

Зал гьатна вун женнет багъдин емиш тир.
Яшдиз жегьил, кардиз къизил, гимиш тир,
Хъвер милаим, пIузарарни кишмиш тир,
Яраб вун нин кьисмет ятIа, Жавгьанат?

 

Чин экуьнахъ экъечIнавай рагъ хьтин,
Беден гьар са емиш авай багъ хьтин,
Алван-алван цуьквер авай дагъ хьтин,
Яраб вун нин кьисмет ятIа, Жавгьанат?

 

Сес ширин тир, мез виртIедин дад авай,
Вун бике я Куьре пата ад авай.
Муьгьуьббатдин лигимардай чад авай,
Яраб вун нин кьисмет ятIа, Жавгьанат?

 

Тариф ийиз лезги чилин рушарин,
Жув есирда гьатна кьузуь яшарин.
Тилисима твадай руьгьдин къашарин,
Яраб вун нин кьисмет ятIа, Жавгьанат?

 

Гьар рушакай рахаз гьар са чIалалди,
Сажидинан пеше туш хьи гьалалди.
Икьван гуьрчег буй гайи Зул-Жалалди,
Яраб вун нин кьисмет ятIа, Жавгьанат? !

 

Исли руш
 

Шалбуз дагъдин кьил таж алай къизилдин,
Тамашунал вил ацIудач гуьгьуьлдин.
И кьадардин дамахар гвай билбилдин,
Вун Саядан булах ятIа, Исли руш?

 

Шагьвар галаз циф къекъвезвай дереда,
Рагъни гьикьван милайимдиз хъуьреда?
Зак шадвилин гьисс кутур и жуьреда,
Вун Саядан булах ятIа, Исли руш?

 

Аста-аста камар къачуз, кьуьл ийиз,
Алахъда вун макьамдикай цIил ийиз.
Садалайни алакь тийир вил ийиз,
Вун Саядан булах ятIа, Исли руш?

 

Гуьрчегвилел кьуд уьлкведа ад авай,
Мискискарин хуьре рушар мад авай.
Сиве ширин пампасидин дад авай,
Вун Саядан булах ятIа, Исли руш?

 

Лезги чилихъ чIехи Каспи гьуьл гала.
Ви далудихъ пIир-бубадин гъил гала.
Сажидинан мад акунихъ вил галай,
Вун Саядан булах ятIа, Исли руш?

 

Валида

Булахар къайи цуькверив рахаз,
Билбилрин сесер акъатна яргъаз.
Гуьлчуьмен чшура жейранар къугъваз,
Са бахт тушни кьван акун, Валида?

 

Кьезил тир гару чукуриз цифер,
Лув гуз цавара хъуьреда лифер.
Рагъ алай йикъар, варз алай йифер,
Са бахт тушни кьван акун, Валида?

 

Дуьньяда дердер ава гьар жуьре,
Вун себеб хьана шад жеда хуьре.
Табасарандай зи хайи Куьре
Са бахт тушни кьван акун, Валида?

 

Бахтавар я вун, къизилгуьлдин цуьк,
Земземдин булах-атир я ви рикI.
Кьадар-кьисмет яз муьгьуьббатдин цIиг,
Са бахт тушни кьван акун, Валида?
 

Тикрар :
Вуч гуьрчегбур я Хив патан дагълар!
Вуч гуьзелбур я Куьредин багълар?
Амма са кIус кьван дустарин рушар,
Женнетдин я чеб гьуьруьйриз ухшар!

 

Оксанадиз

Буйдиз шумал, чиниз къумрал,
Акуна заз къе вун марал.
Дигмиш хьайи емиш тарал,
Заз Оксана руш акуна.

 

Шад манидин сес тир ширин,
Вал аватиз тахьуй серин.
Сивел алай мили хъуьруьн,
Заз Оксана руш акуна.

 

ЧIулав чIарар хьана тилер,
Муьгьуьббатдиз хас тир вилер,
Шад ийидай лезги эллер,
Заз Оксана руш акуна.

 

Къизилгуьлдал ашукь билбил,
Тамашунал ацIудач вил.
Берекатрин чIехи тир гьуьл,
Заз Оксана руш акуна.

 

Сажидиназ тир бегенмиш,
Атирлу са цуьк я дуьзмиш.
Пел лацу жив, пIузар кишмиш,
Заз Оксана руш акуна.

 

Эмина

Вацран къайи нур экъичиз чуьллерал,
Хъуьрезва цав гъетерин хуш вилерал.
И кьадардин рикI алай кас кьуьлерал,
Вири авай, вун авачир демина,
Бес вун вучиз авачир, зи Эмина?

 

Дустар са-сад жезва кIватIал, гъил ягъиз.
Хиялри хур кIевзава зи чил ягъиз.
Къекъвезва зун, гьар са патахъ вил ягъиз,
Вири авай, вун авачир демина,
Бес вун вучиз авачир, зи Эмина?

 

Яр галачиз вун текдиз ян атана?
Лугьур гафар япариз ван атана.
Кьуьлуьн нубат атана, чан атана,
Вири авай, вун авачир демина,
Бес вун вучиз авачир, зи Эмина?

 

Варз экъечIна, ракъини хьиз нурар гуз,
Гъетери зав алахънавай гурар гуз.
Кьисметдиз заз кIан тир шивни пурар гуз,
Вири авай, вун авачир демина,
Бес вун вучиз авачир, зи Эмина?

 

Лацу кьве гъил ахъа хьана лувар хьиз,
Вун атана, мехъерик квай тавар хьиз.
Заз и межлис хьана халис сувар хьиз,
Вири авай, вун авачир демина,
Икьван чIавал вун гьинавай, Эмина?

 

Сажидинав мад хажалат гуматIа?
Назик рикIик теспачавал куматIа?
КIанивилин дерт такур кас аматIа?
Вири авай, вун авачир демина,
Аллагь шуькуьр, атайди, зи Эмина!

 

Лезги бике

Ярагъ хуьруьн ПIирен булах,
Халкьдиз яд гун я ви кIвалах.
Мез ширин тир, пIузар мумлах,
Лезги бике я Муминат.

 

Са затIни туш ярни емиш,
Ашдин винел лацу кишмиш.
Шейхдин багъда хьайи битмиш,
Лезги бике я Муминат.

 

Рагъ экъечIдай бере цавал,
Дуьшуьш жеда билбилар вал.
Бахтлу жедай аватай кIвал,
Лезги бике я Муминат.

 

Сажидинан кIвачихъ мугьман,
Гьар са тIалдиз хьурай дарман.
Вили ягъиз тахьуй, аман,
Лезги бике я Муминат.

 

Наида

И дуьньядин гуьрчегвилер рикIеваз,
Къекъвезва зун муьгьуьббатдин рекьеваз.
Чал пехилбур акуникай йикьезваз,
Ваз и кIвалах гьаян ятIа, Наида?

 

Аллагьди ваз икьван бахтар багъишна,
Акур чIавуз за рикIивай алхишна.
Пехилбуру шумудра чаз къаргъишна?
Ам ни хийир-зиян ятIа, Наида?

 

Ша, зи патав билбил хьана таравай!
Кудай сирер акъудин чи хуравай.
Къизил гуьллер хьана къугъваз чIуравай,
Аквазвай зун пиян ятIа, Наида?

 

Зун тек туна, ваз гьикI кьарай къвезватIа,
Хабар туш ваз зи рикI вахъ гьикI шезватIа.
Зун сефил яз акваз вун шад жезватIа?
Вун зи чан, зи иман ятIа, Наида?

 

Вахъ зи рикI куз, аман лугьуз, чан лугьуз
Ваз ван тахьун вуч кар ятIа, Наида?
Муьгьуьббатдин пияла яд хъван лугьуз,
Чара касдин яр ятIа вун, Наида?

 

Маиса

Гьар экуьнахъ билбил рахаз цуькверив,
Ширин сесер жеда хуьруьн нуькIверив
Вили тир цав къугъваз мили экверив,
Къарайда вун хъуьрез-хъуьрез, Маиса.

 

СтIал пата Багъдат хьтин емишрин,
Чар булахар рагаз жеда гимишдин.
Вун къвед хьана дамахар гвай емишрин,
Къекъведа хупI серес-серес, Маиса.

 

Адалат гвай хуьрерин са макан тир,
СтIалрин тIвар аршда ава кьакьан тир.
Муьгьуьббатдин къир хразвай акьван тир,
Вун тушни са гьахъ гвай терез, Маиса?

 

Уьмуьр бахтлу, чирвал дерин гьуьл хьурай.
Вун бубадин багъда авай гуьл хьурай.
Вун дидедин даим эрчIи гъил хьурай.
Рази жедай амле-мирес, Маиса.

 

Сажидина ви гуьрчегвал акуна,
Нагъмайралди гуьзел суьрет чIугуна.
Ви мишребдин зун гъавурда акьуна,
Я кьван халис ватанперес, Маиса.

 

Зи гуьрчег суна

Экуьн гарар къугъвадайла чи дереда,
Къизилгуьллер ваз тамашиз хуш хъуьреда.
Яраб Аллагь, Куьреда,
Мад аватIа ваз ухшар
Рушар милиз хъуьредай
Пак женнетдин къуш я вун.

 

Тикрар:
Варз алай йифиз,
Ахварал тефиз,
На кIеве туна,
Зи гуьрчег суна!

 

Уьмуьрдин дад гьи кьадардин ширин ятIа?
Ви пIузаррал алайди шад хъуьруьн ятIа?

Гьар келима ширин тир,
Акьул, камал дерин тир,
РикI алай кар хъуьруьн тир,
Аламатдин руш я вун.

 

Агь, Сидагет

И дуьньяда дердер ава,
Секинвилив таб гуз тежер.
Сажидинахъ бейтер ава.
Лагь лугьунал лугьуз тежер.

 

Жегьил уьмуьр цуьк авуна,
Лув гуз тахьай рикI авуна.
Вакай билбил нуькI авуна,
ХъуьтIуьн гъиляй ажуз тежер.

 

Вунни мани-вахи-вахар.
Далдам-зуьрне-бажанахар.
Чуьнгуьр гвайда къур ийиз хар,
Кузва нефес къачуз тежез.

 

Лагь дидеди куьз ханай зун?
Хиялри рикI ийиз къазун.
Квез я ваз за авур жузун,
Ярдин кIвализ тухуз тежер?

 

Агь Садигет, каначни вун?
Мани ягъиз ханачни вун?
Чазни мугьман хьаначни вун?
Дустар галаз ялгъуз тежер.

 

Тикрар:
Мани-ви рикI, мани-хиял.
Сад садавай чара тежер.
Лукьман аваз, дерт ава жал?
Дарман хьана чара тежер.
Лезги мани-гуьзгуь мани,
Рагъ хьиз чими, экуь мани!

 

Суьлгьуья

Гьар са касдин рикIин хиял,
Галукьун я атирдин ял.
Лезги мани лугьур кьегьал
Билбил ятIа, вун Суьлгьуья?

 

Цавай фидай къушарин шагь,
Гуьзел, гуьрчег рушарин шагь.
Гьар са багьа къашарин шагь
Къизил ятIа, вун Суьлгьуья!

 

Лезги чилин кьакьан гьеве,
Хуш жеда ви хьайила сес.
Милаим са инсан серес,
Гуьгьуьл ятIа, вун Суьлгьуья!

 

Саядаз

Сефилвал вуч я гатфарин бередин,
Дердерикай перем цвазвай дередин?
Аламатар акур чIавуз Куьредин
Жегьил уьмуьр гьайиф жезва Саядаз.

Тикрар:
Таз къелемдин цуьк, Саяд.
Вилин накъвар-чиг, Саяд,
КузватIа лагь гьикI, Саяд,
Шихрагьимахъ рикI, Саяд?

 

Чуьнгуьрдин ван тезенагдал кьатI ийиз,
Тек сесини къал къачуна багълара.
Кайи рикIер алакьнайтIа кIватI ийиз,
Мад са еке дагъ жедай чи дагълара.

 

Муьббатдин цIай акатна селлерик,
Къалабулух къай акатна цуькверик.
Къизилгуьллер есир хьана чигерик,
Акур бере югъ-йиф жезва Саядаз.

 

ПIинид багъда перпилагар кутуна,
Туьквезбанни Селим лугьуз манияр,
ЧIигъичIигъ хьиз рикI кьаз тежез чIугуна,
Саяд шезва Шихрагьиман кIани яр.

 

Лейла руш

Лацу чинин кIалуб гуьрчег рангарин,
Вун хам марал ятIа кьакьан рагарин?
Юкьв камари хважамжамдин тангарин,
Вун Гилийрин халум ятIа, Лейла руш?

 

Экв экъичай яру хъуькъвен кьилериз,
Рагъ, Варз-вун хьиз аквазва зи вилериз.
Хурал лепе алай такур гьуьлериз,
Вун Гилийрин халум ятIа, Лейла руш?

 

Къизил гуьллер пехил я ви абурдал.
Ваз тамашиз женни мегер сабурдал?
Зи рикI атIай муьгьббатдин гапурдал,
Вун Гилийрин ханум ятIа, Лейла руш?

 

Багъишламиш ая на зи гъалатIриз.
Гуьзелвилин къадир женни жаллатIдиз?
Гаф авачир рикIин михьи мурадриз.
Вун Гилийрин ханум ятIа, Лейла руш?

 

Зун-Сажидин цIигел тир вун акунихъ!
Зи гъавурда гунагь квачиз акунихъ.
Вун вил галай кас туш гудай гьакьунихъ,
Вун Гилийрин ханум ятIа, Лейла руш.

 

Агъа-КIамун, Вини-КIамун булахар,
Вун акурла хъуьрез жеда, Лейла руш?
Сад Аллагьди туькIуьруй ви кIвалахар!
ТахьайтIа зун мерез жеда, Лейла руш?

 

Гъетягъ тават

Дагъларилай къарагъай гар,
Гьава патал ятIа пайгар?
Яргъирушан мили рангар,
Хас яни ваз, чан Лазинат?

 

Гуьне патан Кьелягь булах,
Дад такур кас жедач чIалахъ.
Цуьквер авай гуьзел яйлах,
Хас яни ваз, чан Лазинат?

 

Абулейсан марф хьиз куьлиз
Акун са баххт тушни чилиз?
Шад тир хъуьрин милиз-милиз,
Хас яни ваз, чан Лазинат?

 

ТIалабунал халад рушан,
Кутазва за вакни лишан.
Хаму жейран таза яшан.
Хас яни ваз, чан Лазинат?

 

Тавсият

Леонардо да-Винчидиз акунач.
Тициана гуьзел суьрет чIугунач.
На лугьун, вак живедин цак хукIунач.
Аламатдин цуьк ятIа вун, Тавсият?
Лезгистандин рикI ятIа вун, Тавсият?

 

Лезги чилин маралдал зун гьейран я.
Абур акваз гьалзавайди девран я.
Зун паталди дуьнья, белки, сейран я.
Гимишдин хар-чиг ятIа вун, Тавсият?
Лезгистандин рикI ятIа вун, Тавсият?

 

Суьгьбет ширин, акьул дерин кас я вун.
Женнет Мелек я лугьуниз хас я вун.
Чаз виридаз ала-багьа свас я вун.
Таза билбил нуькI ятIа вун, Тавсият?
Лезгистандин рикI ятIа вун, Тавсият?

 

Ви буй-булах, акваз чинин берекат,
Акатзава тIебиатдик гьерекат.
Циферивай къакъудзавай ферекъат,
Шагь-Дагъдилай тик ятIа вун, Тавсият?
Лезгинстандин рикI ятIа вун, Тавсият?

 

Гъетери ваз багъъиш гана экуьвал,
Нарциссривай гьатна буйдин шуькIуьвал.
Сажидиназ ганвач рикIин муькIуьвал,
Зазни чидач гьикI ятIа вун, Тавсият.
Лезгистандин рикI ятIа вун, Тавсият.

 

Света

Сивяй гевгьер аватиз гьар камуна,
Зардин нехиш ятIа акур гамуна?
Агъзурдан дерт кьел хьиз хуьзвай хамуна,
Садра кьванни куьн рикIел зун къведатIа?

 

Вун акурла шабалутдин чIарарин,
Рангарни кваз гуьрчег хьана чIурарин.
Яргъирушан ирид жуьре нурарин,
Садра кьванни куьн рикIел зун къведатIа?

 

Ериш къветрен, буй къелемдин бегьердин,
Бине хуьруьн, дамахни наз шегьердин,
Къизилгуьлдал ашукь билбил сегьердин,
Садра кьванни куьн рикIел зун къведатIа?

 

Туьтуькъуш тир лезги чилин, Куьредин,
Маса бике акунач и жуьредин.
Сив виртIедин, хъуькъвен кьилер дередин,
Садра кьванни куьн рикIел зун къведатIа?

 

Акун гуьрчег, рахун керчек, мез ширин,
Нямет са затI туш ви патав нез ширин.
И кьадарда хьайила куьн сес ширин,
Садра кьванни куьн рикIел зун къведатIа?

 

Сижарат

Ви буйдиз зун тамаш зи вилерай,
Цуьк ятIа вун экъечIнавай чилерай?
Вал ашукь яз дуст-душмандин хъилерай.
За чандилай гъил чIугвазва, Сижарат.

 

Гьар са касдихъ дерт-гъам ава чIугвадай,
Вилер ишез, рикI хуруда дакIвадай.
Мурад ава захъ гьар къуз вун аквадай,
Гьам себеб яз кьил чIугвазва, Сижарат.

 

Цав кьакьан я, чил кIеви я лугьуда.
СтIалжемдин фул ава зи далуда.
А залан пар зи винелай алуда,
ТIарам хъийиз цIил чIугвазвай, Сижарат.

 

Уьмуьр физва яд хьиз бада булахдин,
Метлебдай кьил акъат тийиз кIвалахдин.
Зун билбил хьун паталди ви яйлахдин,
За вахъ галаз зил чIугвазва, Сижарат.

 

Зун Селим туш авуртIа ваз тапарар,
РикI агализ авач жедай дапIарар.
Къизилдин гъед гвай муштулух хабарар,
Кьун патал за чил чIугвазва, Сижарат.

 

Индира

И дуьньядин иервал ваз ганвалда.
Дидеди вун бахт паталди ханвалда,
Къизилгуьлдин атирар вал къванвалда,
Лугьур гафар гьахъбур ятIа, Индира?

 

Буй-бухахдиз чIагурнавай свас ятIа?
Такабурлу хьун ваз гьикьван хас ятIа?
Къе ви тариф ийиз зун вуч кас ятIа?
Луьгьур гафар гьахъбур ятIа, Индира?

 

Гуьрчег я тар емиш гъайи бегьердал.
Вуна мешреб гъизва хуьрел, шегьердал.
Ашукь хьанвай билбил я вун сегьердал,
Лугьур гафар гьахъбур ятIа, Индира?

 

Бязи йикъар жедатIани серин тир,
РикIе умуд, хиял жеда ширин тир.
Муьгьуьббатни авалда вахъ дерин тир,
Лугьур гафар гьахъбур ятIа, Индира?

 

Сажидиназ къе и чIалар лугьудай,
Багьна ава сирер дуьздал акъудай.
Ви веледри кьунвалда зун халудай,
Лугьур гафар гьахъбур ятIа, Индира?

 

ЯркIижуван руш

Чирагъ вацIун кьве пад кIунтIар,
Гьардал ала вичиз хас тIвар.
Заз чида вун авай бахтар,
ЯркIжуван руш я, Мая.

 

Акур чIавуз дере-тепе,
Атирдив гуз жеда лепе.
Дидедин рикI алай куьрпе,
Женнетдин са къуш я, Мая.

 

Кьуд уьлкведа гьатдай тариф,
Такурбуруз жеда гьайиф.
Муьгьуьббатдин лацу тир лиф,
Гьадалайни хуш я, Мая.

 

Лезгистандин ватан авай,
Рушар къугъвай майдан авай,
Вахъ хьиз гуьзел тир тан авай,
Кас акурди туш я, Мая.

 

Сажидиназ багъишламиш,
ЯтIа са кIус кьван ягъалмиш.
Тарал хьайи ширин емиш,
Жагъайдаз вун нуш я, Мая.

 

Суна вах

И дуьньяда бахтар ава къадирдин,
Сад Аллагьди гуз хьайитIа, Суна вах.
Къизил гуьллер муьгьуьббатдин атирдин,
Гьайиф тушни куз хьайитIа, Суна вах?

 

Кьакьан дагълар, аскIан дагълар бул ава.
Йисахъ вахтар гатфар ава, зул ава.
Вирт гъидай чIиж кьаз кIанз чанда фул ава,
Вуч ийин ам хуз хьайитIа, Суна вах?

 

Билбил ава гатфар чIавуз рахадай,
Гъил акъудмир на Худадин яхадай.
Цуьквер ава хутазривди чухвадай,
ХупI я а дерт цIуз гайитIа, Суна вах.

 

Зи буржи я гафар лугьун рикIевай.
ЭчIелрикай кичIе жемир никIевай.
Земземдин яд хъвайитIа са мекевай,
Вучин хъвана пIуз кайитIа, Суна вах?

 

Сажидинахъ вахар ава сирерин.
Ава адахъ стхаярни пIирерин.
Мурад сад я гьар садакай рикIерин,
ТIар сагъардай дуст хьайитIа, Суна вах!

 

Синорина

Къизил дагъдин шуьрбет булах,
Гуьлчуьменрин женнет яйлах,
Са затIни туш, хьухь зи чIалахъ,
Ви патав, зи Синорина.

ЧIулав чIарар къугъваз гарал,
Къизил гуьллер шехьда чIурал.
Са затIни туш дагъдин марал,
Ви патав, зи Синорина.

Лацу чинал ашкъидин хъвер,
Яру дере жеда хъуькъвер.
Са затIни туш мелни мехъер,
Ви патав, зи Синорина.

Яшдиз жегьил, мез вирт ширин,
Са хуш я заз а ви хъуьруьн!
Гъилив-кIвачив квахьда серин
Вун акурла, Синорина.

ЧIал, Сажидин бубади ваз
ТуькIуьрна шадвал рикIеваз.
Билбилри лув гуда къугъваз,
Вун акурла, Синорина.

Бедирнисе

Кьакьан дагълар къизил-гимиш шимедин,
Къужахдава вили цавун гьуьмедин.
Амма заз вун муьгьуьббатдин нямедин
Багьа я хьи, Бедирнисе-бике руш!

Кьуьдни гатфар чара жезвай береда,
Гуьрчег цуьквер бул жеда гьар дереда.
Амма заз вун милиз-милиз хъуьредай,
Багьа я хьи, Бедирнисе-бике руш!

Къизилгуьллер-заз ви вилер зар алай,
Хуш я лацу хъуькъвен кьилер яр алай.
Амма заз вун рикIиз кIани тIвар алай
Багьа я хьи, Бедирнисе-бике руш!

Сажидинахъ ава вичин кьатIунар
Вичин жуьре шииррин гам атIунар.
Амма заз вал са кьил чIугваз атунар
Багьа я хьи, Бедирнисе-бике руш!

Бедирнисе-Атирнисе цуьк я, цуьк.
Муьгьуьббатдиз халкь авунвай рикI я, рикI.
Вун зи рикIиз пара чими руш я, руш!
Бедирнисе Женнет макан руш я, руш!

Аният

Гатфарин рагъ-нур хьиз акур вилериз,
Атир я вун ганвай къизилгуьллериз.
Бубуйрин ранг алай хъуькъвен кьилериз
Янавайди яр ятIа, яр-Аният?
Пелеллайди хар ятIа, хар-Аният?

Шад билбилар къугъваз таза цуькверив,
Ашкъи-гьевес агудзава рикIерив.
ГуьцI жез физвай тIабиатдин мекерив,
Дагъдин хаму гар ятIа, гар-Аният?
Цуьквер алай тар ятIа, тар-Аният?

Уьмуьрдикай мани лугьуз, кьуьл ийиз,
Къугъвазва вун акур инсан гуьл ийиз.
Хуш сесеркай алахънавай цIил ийиз,
Чуьнгуьр ятIа, тар ятIа, тар-Аният?
Муьгьуьббатдин зар ятIа, зар-Аният?

Самур, Куьре, макан себеб ятарин,
Чешмеяр я къизизил, гимиш къатарин.
Берекат бул ийизвай чи патарин,
Къенси, кишмиш, нар-Аният?
Лезги намус-ар ятIа, ар-Аният?

Сажидинахъ-гьар хуьре са кIвал авай.
Я кьил амач, я кIвач амач тIал авай.
Залим рикIиз вуч ийин за къал авай?
Чидач адаз тIар ятIа, тIар-Аният?
Яраб им вуч кар ятIа, кар-Аният?

Самира

Алкьвадар дар макан ятIан мулкарал,
Илимрин гьуьл-ам Гьасанан ери я.
Акур тавур икьван гагьди мукьварал,
На лугьуда, ам женнетдин гьуьруь я.

Экуьнин яр ацукьнава хъуькъверал,
ЧIулав вилер са тIимил кьван ири я.
БачIах чIарар авахьнава къуьнерал,
Кифер патал, гьайиф, са кIус куьруь я.

Гуьзел суьрет алат тийир рикьелай,
Сивеллай хъвер некIедилай фири я.
Тамам аял ятIан вири рекьерай,
Диде-буба патал жизви хари я.

Халис устад я манийрин, кьуьлерин.
Кар чидайдаз ам виртни я, гъери я.
Гьахъ лагьайтIа, тават лезги чилерин,
Хам жейрандин куьрпедилай дири я.

Яргъи рушаз ухшар авай, Самира.
Чун патал вун бахтни девлет-вири я.
Руьгьдин багьа къашар авай, Самира,
Заз кIаниди жуван кIвачер кири я.

Ремида

ЧIун-чIун хьана чIарар къугъваз къуьнерал
Милиз-милиз хъуьреда вун вилерал.
Гьар са кIвалах алаз жедай гъилерал,
Ажеб зерек руш яни вун, Ремида?

Гатфар хьана къужахдавай цуькверин,
Япара ван жеда билбил нуькIверин.
Къизил гуьл хьиз закIалдавай чигерин,
Ажеб гуьрчег руш яни вун, Ремида?

Хуьре-кIвале гьатна ви ад дамахдин,
Куркурдин ван жеда сивел булахдин.
На лугьуда, женнетдавай яйлахдин,
Ажеб мелек руш яни вун, Ремида?

Акур касдин алат тийир рикIелай,
Гегьвер хьтин гьалтна вун зал рекьелай.
Милаим хъвер алат тийир сивелай,
Ажеб герек руш яни вун, Ремида?

Зун Сажидин-шаир халу Куьредай,
Атана квез мугьман яз шад хъуьредай.
Кьисметдай хьиз жагъай гуьзел дередай,
Ажеб безек руш яни вун, Ремида?

Зуьгьре гъед акуна

Женнет макан, Куьре ватан,
За тариф гьикI тавуна тан?
Гуьрчегвилин къаш тир султан,
Гуьзел Зуьгьре гъед акурла!

Хъвер милаим, камал дерин,
Бике туш тир лезги хуьруьн.
Ачух чиник квачир серин,
Гуьзел Зуьгьре гъед акуна!

ПIузар кьелечI, чIарар чIулав.
Са бахт я вун акун къвалав.
Дидедин хуш атир-ялав,
Гуьзел Зуьгьре гъед акуна!

Гьайиф я жез чIарар рехи,
ХьайитIани яшар чIехи.
Пел-берекат, пIузар некьи,
Гуьзел Зуьгьре гъед акуна!

Сажидина чIугур суьрет,
Бейтер хьана кIеретI-кIеретI.
Халу-хутул тIимил гуьрет,
Гуьзел Зуьгьре гъед акуна!

Карнелия

Шагьни Шалбуз шад яз рахаз цаварив,
Дагъдин лекьрен къугъваз гарун луварив,
Вун акур вахт барамбар я суварив,
Карнелия, мацуживан руш я, руш.

Сад Аллагьди халкь авунвай багъиш тир,
Пак Къурандин каламдин хатI-нехиш тир,
Женнет багъдин тарал дигмиш емиш тир,
Карнелия, мацужуван руш я, руш.

Мацарин вацI кифер галай муркIадин,
Юкь атIана физва лезги накьвадин.
Ажеб жедай тиртIа вун чи мукьвади,
Карнелия, мацужуван руш я, руш.

Мез ширин вирт, пел намусдин акал я.
Вацраз ухшар рацIамар-кьве мукал я.
Сив жегьверрин къъашар авай закIал я,
Карнелия, мацужуван руш я, руш.

Къурбандзавай чанни цIийи гъезелар,
Сажидиназ хуш я лезги гуьзелар.
Хурал алай муьгьуьббатдин медалар,
Карнелия, мацуживан руш я, руш.

Багъишламиш, Алина

Гуьзелрикай авун патал тарифар,
Шаиррикай хьун герек я арифар.
За кIелайбур я лагьана алифар,
Дуьз тахьайтIа, багъишламиш, Алина.

Гьикьван гуьрчег ерияр я ЧIилихъар
Рушар авай милаим тир къилихар.
Минет я мез, авун хьана синихар,
Хуьз тагьайтIа, багъишламиш, Алина.

АратIан багъ, къайи булах яд хъвана,
На лугьун за, гьар цуькведин дад хъвана.
Завай са ник, гвай мукалдин кьатI хана,
Гуьз тахьайтIа, багъишламиш, Алина.

Гуьрчегвилик гунагь квачир къуш я вун.
Адалатлу Куьре патан руш я вун.
Зи шиирдиз, гьикьван рикIиз хуш я вун?
Гъиз тахьайтIа, багъишламиш, Алина.

Вакай мани лугьуз шаир Сажидин.
Кьураз канаб жезва вире Гьажидин.
Ашукь Керем, рикI алай руш бажидин,
Хьиз тахьайтIа, багъишламиш, Алина.

Бахтаваррин Бахтвар

Сажидинахъ гьар жуьредин,
Дустар ава гьар дередин.
Гьар вахтунин, гьар бередин,
Масан дуст я Къадир зи.

Шаирвилин пай авайди,
Эверайдаз гьай авайди,
Даим рикIе цIай авайди,
Хъсан дуст я Къадир зи.

Дустар патал хъсанвал гвай,
Хатур, гьуьрмет, масанвал гвай,
Намус, гъейрат, инсанвал гвай,
Сусан дуст я Къадир зи.

Самур вацIун лепе хьтин,
Шалбуз дагъдин тепе хьтин,
Куьзуь тежер куьрпе хьтин,
Виш сан дуст я Къадир зи.

Салтадин ханум

Зи дустуниз са руш ава,
Регина халум.
Женнет гьуьруь-къуш ава,
Зегьметдин курум.

Ам Салтадин ханум я,
Салтадин бике.
Къизилгуьлдин цуьк хьана,
Жезва ам еке.

Буба хьтин машгьур кас
Жеда а халум.
Дидедиз гьар лишан хас,
Тирди я малум.

Къизилар я гъилерни,
Гуьрчег я халум,
Гуьзелбур я вилерни,
РикIиз гудай рум.

Бубадин дуст шаир я-
Сажидин лезги.
Регина са магьир я,
Тамашдай гуьзгуь.

Регина, чан Регина,
Чи кIвализ илиф!
Регина, чан Регина,
Ислягьвилин лиф!

Къизтамум

Лекьер элкъвез Кьурагь дагъдин кьилелай,
ЧукIурзавай чIавуз нурар гьуьлелай,
Атир ацIай жем багъишиз гъилелай,
Шад хъуьрезвай руш яни вун, Къизтамум?

Къветрен булах рахаз Мигри булахдив,
ЭгечIзава гьар сад вичин кIвалахдив.
Мани лугьуз, кьуьлерзавай дамахдив.
Женнетдин пак къуш яни вун, Къизтамум?

Акъа лацу пелен гуьзел нехишар,
Себеб хьана, аватIа ваз багъишар?
Нурарикай кIватIай къизил-гимишар,
Лезги яргъируш яни вун, Къизтамум?

Манидарри авурла ви тарифар,
Ашукь жеда вал камаллу арифар.
Югъ-къандивай чIагурзавай зерифар,
Аллагьдизни хуш яни вун, Къизтамум?

Сажидиназ кIанда Кьурагь ерияр.
КIанда Кьурагь женнетэгьли гьуьруьяр.
Сив-мулдин цуьк, пIузар дигмиш мереяр,
Кьурагь туьтуькъуш яни вун, Къизтамум?

Гуьлуьмагъа

Уьмуьр вацI я сел атайла алахьдай.
Яраб кьисмет булах ятIа авахьдай..
Къилихриз хуш,икьван рикIик какахьдай,
Гуьлуьмагъа-зи дустунин руш ятIа?.

Бахтар гунуг-Сад Аллагьдин къадар я.
Зи рикI патал хурун кьефес лап дар я.
Лезги чилихъ авайди ви дидар я.
Гьлуьмагъа-зи дустунин руш ятIа 7

Муьгьуьббатдихъ ава вичин къенивал.
Вахъ гьелбетда. ава еке кIанивал.
Билбилризни шад жедай ван хьайивал.
Гуьлуьмагъа-зи дустунин руш ятIа7

Гатфарикай рахаз жеда билбилар.
Мехъеррикай рахаз жеда жегьилар.
И кьадардин рикI алай кас къизилар.
Гуьлуьмагъа-зи дустунин руш ятIа 7

Тикрар:
Гуьлуьм агъа. Гуьлуьм агъа. гуьзелди!
Зи дустунин руш яни вун. руш яни?
Чинеба сир акъуд тийир къецелди.
Гьар са касдив рахаз вердиш мецелди.
Женетдин са къуш яни вун. къуш яни?

Каинат

Лацу халат алаз галат тийидай,
Акуна заз духтур гъалатI тийидай,
Начагъ инсан бирдан сагъар хъийидай,
Аламатдин руш яни вун, Каинат?

Акун гуьрчег, рахун ширин шекердин,
Чирвал дерин Ибна Синан тегьердин.
Бине хуьряй, дамахни наз шегьердин,
Аламатдин руш яни вун, Каинат?

Дава дарман герек туш и сеферда,
Вун хьиз гуьзел жедач кьибле-кеферда.
Муьгьуьбатдин багъ атанвай бегьердал,
Аламатдин руш яни вун, Каинат?

Къуй чир хьурай Каинат вун виридаз,
Заз кьисмет я, кIан хьанатIан иридаз,
И кардикай вуч ава кьван гъейридаз?
Аламатдин руш яни вун, Каинат?

Сажидина белки келле элкъвена,
Ихьтин шиир тесниф ийиз гелкъвена.
Зун ви суьрет чIугун патал къекъвена,
Аламатдин руш яни вун, Каинат?

Экрандин гъед Аидадиз

Гьар сеферда Хивдин экран
Акурла зун жезва гьейран.
Суьгьуьрдин са ич тир таран,
Гуьзел руш я вун, Аида!

Элкъвей чинал чIагай вилер,
Къизилгуьллер-хъуькъвен кьилер.
Шад ийизвай пара эллер,
Туьтуькъуш я вун, Аида!

Сес тир ширин, сивел хъуьруьн,
Гьар келима метлеб дерин,
Гатун юкъуз гар хьиз серин,
РикIиз я вун уш, Аида!
Сажидин-шаир куьн акур,
Муьгьтелвиляй хьана какур.
Пияладив ацIанвай кур,
Са бейгьуш я вун, Аида!

Чан Лиана

Шабалутдин чIарар нур гуз къуьнерал
Вун физвани цуьквер атIуз синерал?
Билбилар къвез, лув гуз таран хилерал,
Ашукь я ви дамах-чагъдал, Лиана.

Ваз тамашиз Шалбуз-дагъдин тепеяр,
Саламар гваз рекье твазва лепеяр.
Женнетэгьли малаикар-куьрпеяр,
Ашукь я ви буй-бухахдал, Лиана.

Бадедин сес, такабурвал дидедин
Кьисмет я ваз наз маса гун бикедин.
Вилер чIулав, сив-къизилгуьл цуькведин,
Ашукь я ви бегьер-багъдал, Лиана.

Жегьил уьмуьр рагъ тир куькIуьр сегьердин,
Маралрин шагь я вун Дербент шегьердин.
Берекат гвай Самур вацIун тегьердин,
Ашукь я ви гьар кIваладал, Лиана.

Сажидиназ ван хьана, вун такуна,
Хиялралди шиир-суьрет чIугуна.
Шумуд садаз вун мукьувай акуна,
Ашукь я ви гуьл-яйлахдал, Лиана.

Къизилгуьлдин цуьк я Лейла

Тамашна зун кьулухъ, вилик,
Зун гьахъ туштIа куьнни килиг.
Хур атирдив ацIанвай рикI,
Къизилгуьлдин цуьк я Лейла.

Рагъ экъечIай цавун тегьер
Ава чина экуьн сегьер.
Хъуькъвен кьилер-кьве цIун тIегьер,
Муьгьуьббатдин рикI я Лейла.

Дидед вилер авай аял,
Бубадин я рикIин хиял.
Цуькведиз пIагь гудай къаял,
Гегьвердин кIус-чиг я Лейла.

Гуьзелвилиз тиртIа зайиф,
Ийидайни за ви тариф?
Муштулух гваз авур илиф,
Вун гатфарин цIиг я Лейла.

Тикрар :
Лацан-яран руш тир Яран,
Хуьр СтIалрин, бине Аран,
Цуьквер алай пIинид таран,
Халис билбил нуькI я Лейла.

Женнета

Бегьер ширин хьунухь гьар са къелемдин,
Лугьуда хьи, ам закон я Алемдин.
Бязи рушар-пешер ятIа келемдин,
Вун халисан къизил гуьл я, Женнета.

СтIал патан атир чикIиз кьилелай,
Къадирда кьур яд хъвана ви гъилелай.
Вун такуна хъифена хьуй гъенелай,
РикI перишан, гьал сефил я, Женнета.

Гуьрчегвилин кьадар течир аял я.
На лугьуда, михьи рикIин хиял я.
Артух тариф авун зазни кагьал я.
Вун бубадин эрчIи гъил я, Женнета.

Вафалу хьухь диде-буба паталди,
Лугьузва ваз акур гьар са кьегьелди.
Къуллугъ ийиз акваз михьи рикIелди,
Сад-кьве тай-туьш вал пехил я, Женнета.

Сажидин-дуст я ви чIехи бубадин.
Чун веледар я са СтIал убадин.
Вун патал сив, бахтар авай турбадин,
Ахъа хьунал зунни гуьл я, Женнета.

Саядакай баядар

Билбил хьана мани лагьай эллериз,
Муьгьуьббатдин бахт акунач вилериз.
Ви гуьрчегвал ганач къизил гуьллериз,
Жегьилзамаз рекьиз гьайиф, Саяд вун.

Хъуьрез чIулав зулуматдин вахтунал,
Вун расанмиш хьанач халис бахтунал.
Девлетлуяр ацукьнавай тахтунал,
ГьакI ятIани хьанач зайиф, Саяд вун.

Манийралди лугьуз дердер рикIевай,
Дишегьлидиз ухшар тир вун йикьевай.
Азад инсан акъудна дуьз рекьевай,
Мал хьиз ганай, ийиз тариф, Саяд вун.

Дишегьлийриз къанлу чIуру адетар,
Дегиш ийиз чIугунай на гьуьжетар.
Сад Аллагьдиз ийидай кьван минетар,
Канай, гьар са югъ хьана йиф, Саяд вун.

Хуьруьнжуван руш ятIа?

Акун гуьрчег, рахун керчек лезги я.
Хуьруьнжуван руш ятIа вун, Наида?
ЧIарар чIулав, пел лацу тир гуьзгуь тир
Женнет макан къуш ятIа вун, Наида?

Яргъи кифер акур чIавуз къуьнерал,
Айибмир зун, нвагъ акьалтнай вилерал.
Билбил хьана къугъваз таран хилерал,
Вучиз икьван хуш ятIа вун, Наида?

Терсепулдин цуьк хьиз хъуьрез гарарал,
Ашукь я вун гьар экуьнин ярарал.
Шаирдивай лугьуз тежер чIаларал,
Муьгьуьббатдин къъуш ятIа вун, Наида?

ПIузар некьи, шуьрбетдин сес ширин тир,
Заз бегенмиш хьайиди ви хъуьруьн тир.
Гьатай чIавуз зун хиялра дерин тир,
Заз гайи тIал-гуж ятIа вун, Наида?

Къазан булах яд рагазва чешнеда,
Са малаик къуш ятIа вун, Наида?
Сажидинан келле квадрай дегьнеда,
СтIалжуван руш ятIа вун, Наида?

Наз гумир

Сифте кьиляй чав са гаф, са чIал хьана,
Гила вучиз вун захъ галаз къал хьана?
Эх тежедай муьгьуьббатдин тIал хьана,
Зав пияла хъваз вугумир, хъваз гумир.

Зун са кас тир рикI къекъвезвай чуьллера
Ви суьретдин нур ама зи вилера.
Тахсир кватIа гъил къачу и рекьера,
Зун кIевера тваз вугумир, тваз гумир.

Назик гардан, кьуна бирдан паталди,
Сабур хъия гила къведай гаталди.
Чара касдин гъиле ви серф твадалди,
Зав ви хатур хаз вугумир, хаз гумир.

Бурма чIарар авахьна кьве къуьнелай,
Чав артухан дердер, гъамар кьаз гумир.
Садра кьванни фидай чIавуз гъенелай,
Вил заз ягъиз, наз вугумир, наз гумир.

Мадина

Акур чIавуз са кIунчI цуьквер,
Гьи кьадар шад жеда рикIер?
Мез виртIедин, пIузар шекер,
ТупIалдадавай къаш, Мадина.

Кьве дидедин рикIин хиял,
Кьве бубадиз азиз аял.
Къизилгуьл хьиз хъуьрез къаял,
ЧIехи хьуй ви яш, Мадина.

Девлетни мал текъвез гьайиф,
Авун герек я ви тариф.
Гележегда жедай ариф,
Артух я ви баш, Мадина.

Сивел даим алай хъуьруьн,
Такурай ви чинал серин.
Агъзур нямет алай ширин,
Метелжемдин аш, Мадина.

Ван хьайивал Сажидиназ,
Са кIус кьван на гудалда наз.
Аман минет хьана кIаназ,
Кумир на зи хаш, Мадина.

Диляра

Таза цуьквер хъуьрез чIура ракъиниз,
Гъетер хьана гьазур ятIа куькIуьниз?
Мани лугьуз билбил хьанвай луькIуьниз,
Вун гьамиша уях жеда, Диляра.

Ирид булах рахаз ирид чIалалди,
Шуьрбетдин яд я лугьуда гьалалди.
Садра кьванни заз вун икьван чIавалди
ГьакI акунач, кIвалах жеда, Диляра.

СтIалрин хуьр пара адлу макан я.
Кутуг тавур тарифар заз дакIан я.
ЧIехибурун гьуьрметар хуьз ваз кIан я.
Амма са кIус дамах жеда, Диляра.

Хуьре-кIвале авай ви тяй яшарин
Арада-сад лагьайди я рушарин.
Вак лувар ква лагьайтIа за къушарин,
Валлагь, вири чIалахъ жеда, Диляра.

Ваз багъиш яз за и шиир атIана.
Тек са кIвалах Сажидина кьатIана.
Артух дамах тавуртIа на датIана,
Вакай Земзем булах жеда, Диляра.

Незакет

Рагъ хъуьрена яран яру пIузаррив.
Ам вун акурвиляй ятIа, Незакет?
Билбилрин сес мукьва хьана къузайрив,
РикIи чIугурвиляй ятIа, Незакет?

Гарагъдин хуьр Катин дагъдиз мукьва тир,
Вун кIандайди хуш цуькверин юкьва тир.
Лацу лиф хьиз даим лувар ахъа тир,
Ам ви чIагурвиляй ятIа, Незакет?

Сад Аллагьдиз хуш хьана вун руш хьана,
Заз кIанзава вакай туьтуькъуш хьана.
Вун чарадан адахли яз гуж хьана,
Бахтун какурвиляй ятIа, Незакет?

Бахтлу хьухь квез, куьн кIанивал кьисмет яз,
Чи арада амукьдайди гьуьрмет яз,
Сажидина теснифай чIал нямет яз,
Яраб, такурвиляй ятIа, Незакет?

Аксинья

Гуьне хуьререр кагьрабадин къашар хьиз
Гуьне хуьрер-цIиргъинавай къушар хьиз,
Гуьне хуьрер чагъиндавай рушар хьиз
Акурла зун серес жеда, Аксинья!

Бахт къизил хьиз жагъай касдин рекьелай,
Гъам-хажалат фад алатна рикIелай.
Таза нурар алахьиз кьве хъуькъвелай
Акур рагъни хъуьрез жеда, Аксинья!

Такабурвал хас тир буйдиз, бухахдиз,
Шуьрбет я вун ухшар Земзем булахдиз,
Цуьк акъатна муьгьуьббатдин яйлахдиз,
Акур жейран мерез жеда, Аксинья!

Сажидинан дерди-бала пара я.
Белки адан атIанвайди чара я.
Ви абур-наз, им чи кьведан ара я,
Акур билбил мирес жеда, Аксинья!
ТИКРАР :
Аксинья зи, Аксинья зи, Аксинья!
Муьгьуьббатдин цуьк яни вун, цуьк яни?
Аксинья зи, Аксинья зи, Аксинья!
Вун зи руьгь, зи рикI яни вун, рикI яни?

Фаиза

Багъда билбил лугьуз-хъуьрез,
Аквадачни ажеб серес?
Гуьрчегвилиз мизан терез,
Гевгьер бике я Фаиза.

Куьре патан женнет макан,
Шад я дагълар акваз кьакьан.
Дамахар гвай буйдиз юкьван,
Шегьер бике я Фаиза.

Шабалутдин чIарар кьамал,
Руш я дерин авай камал.
Гьар са сифет, гьар са амал
Иер бике я Фаиза.

Чуьлда цуьквер алван-алван,
Хуш я рикIиз ничхиррин ван.
Куьре Мелик хуьруьнжуван
Сегьер бике я Фаиза.

СтIал вацIун дередавай,
Ханум ятIа Куьредавай?
Кишмиш хьтин чIередавай,
Бегьер бике я Фаиза.

Таиса

Таму-тара пеш авунва мехмердин,
Акьалтна яр цавун кIанел сегьердин.
Дамахни наз гваз къекъвезвай шегьердин
НуьцIуьгъжуван руш яни вун, Таиса?

Акурла вун Сажидиназ шад хьана.
Гвай хажалат муркIар цIараз яд хьана.
И дереда авайди вун сад хьана,
НуьцIуьгъжуван руш яни вун, Таиса?

Икьван чIавал вун чир тахьун гьайиф я.
Ви патарив женнет мелек зайиф я.
Лезгистанда авайди ви тариф я,
НуьцIуьгъжуван руш яни вун, Таиса?

Сив пIинидин, хъуькъвен кьилер къизилдин
Рахун ширин шуьрбет таза билбилдин.
РикI цIурурдай гьар са акур жегьилдин,
НуьцIуьгъжуван руш яни вун, Таиса?

Аран кьилел дем кутазва цифери,
Абулейсан марфар патал, Таиса.
Сад Аллагьдиз карагзава лифери,
Муьгьуьббатдин гатфар патал, Таиса.

Луиза руш

Гуьнепатан хуьрер-кIвалер,
Зи рикIиз хуш я, чан эллер.
Зал гьалтна са чIулав вилер
Авай бике Луиза руш.

Кьилин чIарар-чIун-чIун тиллер,
Беневшаяр-хъуькъвен кьилер,
Зал гьалтна са къизил гуьллер
Авай бике Луиза руш.

Сивел алай даим хъуьруьн,
Сес цуькверин вирт я ширин.
Зал гьалтна са акьул дерин
Авай бике Луиза руш.

Сегьнедин къуш, кIвалин гьуьрмет,
РикIиз кIандай кар я зегьмет.
Зал гьалтна са багьа къимет
Авай бике Луиза руш.

Зун-Сажидин шаир СтIал,
Вун затI ятIа тийижир тIал.
Зал гьалтна са цуьквер кIватIал
Авай бике Луиза руш.

Эмиля руш

Дагъдин хуьрер-дагъ къелеяр,
Чи тарихдин векилар я.
Гьар са хуьр-са рагъ къелеяр,
Гьикьван гуьрчег шикилар я?
ТИКРАР :
Эмиля руш, Эмиля руш!
Вун чи рикIиз гьикьван я хуш!
Сад Аллагьди бахт гурай ваз,
Чан женнетдин туьтуь тир руш!

Эй зи ватан дагъни аран,
Кьведни багьа къизилар я.
И дуьньядин гуьзел девран,
Гьалзавайбур жегьилар я.

Векьелрин хуьр-кьегьелрин хуьр,
Гьар са руш са бике я ви!
Векьелрин хуьр-гуьзелрин хуьр,
Эмиля руш, Мекке я ви!

Вун Саядан булах ятIа?

Шалбуз дагъдин кьил таж алай къизилдин,
Тамашунал вил ацIудач гуьгьуьлдин.
И кьадардин дамахар гвай билбилдин,
Вун Саядан булах ятIа, Исли руш?

Шагьвар галаз циф къекъвезвай дереда,
Рагъни гьикьван милайимдиз хъуьреда?
Зак шадвилин гьисс кутур и жуьреда,
Вун Саядан булах ятIа, Исли руш?

Аста-аста камар къачуз, кьуьл ийиз,
Алахъда ам макьамдикай цIил ийиз.
Садалайни алакь тийир вил ийиз,
Вун Саядан булах ятIа, Исли руш?

Гуьрчегвилел кьуд уьлкведа ад авай,
Мискискарин хуьре рушар мад авай.
Сиве ширин пампасидин дад авай,
Вун Саядан булах ятIа, Исли руш?

Лезги чилихъ чIехи Каспи гьуьл гала.
Ви далудихъ пIир-бубадин гъил гала.
Сажидинан мад акунихъ вил галай,
Вун Саядан булах ятIа, Исли руш?

Заремани Заира руш

ЧIарар чIулав, пIузар кишмиш,
Таза багъда хьайи битмиш,
Сад садалай ширин емиш,
Заз кьве гуьзел руш акуна.

Сарар седеф, сивер уймах,
Фири некIед таза къаймах,
Хуьрел, кIвалел гъидай дамах,
Заз кьве гуьзел руш акуна.

ЧIулав гьекьекь вилер авай,
Анар хъуькъвен кьилер авай,
Вири тамамвилер авай,
Заз кьве гуьзел руш акуна.

Вил алукьиз тахьуй яман,
Кьвед кьве жегьил рикIин дарман,
Са сеферда хьана мугьман,
Заз кьве гуьзел руш акуна.

Тикрар:
Сад Зарема, сад Заира,
Женнетдин кьве къуш акуна.
Муьгьуьббатдин жавагьирар,
Заз кьве гуьзел руш акуна.

Туьтуь къуш акуна

Яргъи кифер къугъваз кьамал,
Вилер чIулав, пIузар чумал.
РикIиз чими гьар са амал
Чидай туьтуь къуш акуна.
Заз Анжела руш акуна.

Хъуьрез-хъуьрез, рахаз ширин,
РикIе гьиссер твадай дерин,
Кьурагь патан, Шими хуьруьн,
Гуьзел туьтуь къуш акуна.
Заз Анжела руш акуна.

Шуьрбет авай гьамгад гичин,
Пара гуьрчег тIвар тир вичин.
Муьгьуьббатдин нур алай чин,
Мелек туьтуь къуш акуна.
Заз Анжела руш акуна.

Такур бенде жедач чIалахъ,
Абукевсер, сив тир булах.
ХупI тамам тир гьар са кIвалах,
Гуьрчег туьтуь къуш акуна.
Заз Анжела руш акуна.

Тикрар:
Баку, Дербент, гьатта Мекке,
Авач адаз ухшар бике.
Шад хиялар твадай рикIе,
Кьурагь туьтуь къуш акуна.
Заз Анжела руш акуна.

Нурият

Бурма чIарар къугъваз кьамал,
Чилер, цавар гъидай чIалал,
Заз женнетдин нямет гьалал,
Ичинжуван руш акуна.

Багъишламиш жегьилвилиз,
Нур ятIа ам акур вилиз?
Гвай хажалат гадрай гьуьлуьз,
Ичинжуван руш акуна.

Сажидинан квахьна кьарай,
РикIи хура тунва гьарай.
Дуьдгъвер хьана мецел цIарай,
Ичинжуван руш акуна.

Тикрар:
Эй Нурият, чан Нурият,
Вун зи рикIин хиял яни?
Зи муьгьуьббат, зи гьуьруьят,
Заз акурди марал яни?

Дербент марал, Нурият

Шабалутдин чIарарин,
Хважамжамдин нурарин,
Цуьк тир тарал, Нурият,
Хъуькъвен кьилер ярарин,
Дербент марал, Нурият.

Вун бубадин кIвалах я,
Вун дидедин дамах я,
Цуьк тир тарал, Нурият,
Абу-Земзем булах я,
Дербент марал, Нурият.

Самур, Куьре сад авур,
Дуьнья гатфар-гад авур,
Цуьк тир тарал, Нурият.
Руш я чи рикI шад авур,
Дербент марал, Нурият.

Лезги чилин бике тир,
Къастар авай еке тир,
Цуьк тир тарал, Нурият,
Муьгьуьббатдин уьлкве тир,
Дерберт марал, Нурият.

Тителжуван руш ятIа вун

Дуьнья гьикьван гуьзел ятIа жегьил тир!
Вили цава рагъ хъуьрезва къизил тир.
Муьгьуьббатдин таж кьилеллай билбил тир,
Тителжуван руш ятIа вун, Алимат?
Женнет макан къуш ятIа вун, Алимат?

Илимдин рехъ ширин хьанвай бегьердин,
Гуьрчег Зуьгьре гъед ятIа вун сегьердин?
Дамах чагъ тир гьам хуьруьн, гьам шегьердин,
Тителжуван руш ятIа вун, Алимат?
Женнет макан къуш ятIа вун, Алимат?

Кьакьан дагълар, даяхар тир цаварин,
Чар булахар, шуьрбетар тир суварин,
Хаму жейран гуьллер авай руварин,
Тителжуван руш ятIа вун, Алимат?
Женнет макан къуш ятIа вун, Алимат?

Сажидиназ шаир Лезги уьлкведин,
Тариф ийиз хуш я гьар са бикедин.
Мез кьилин вирт Абу Зем-Зем Меккедин,
Тителжуван руш ятIа вун, Алимат?
Женнет макан къуш ятIа вун, Алимат?

Есир я

ХьаначиртIа дуьшуьш вун и рекьера,
ТIал гьатдачир чи кьведанни рикIера.
ЦIаярани, къаярани мекьера,
Муьгьуьббатдин сирда зун ви есир я.
И кIвалахдал кьисметдин вуч тахсир я?

ЧIулав вилер, гьар са рацIам мукал тир,
Лацу тир хур, лали-гегьвер гьайкал тир,
Юкь къугъвазвай камарида закIал тир,
Муьгьуьббатдин сирда зун ви есир я.
И кIвалахдал кьисметдин вуч тахсир я?

Къизилгуьлдин сивив гвайди хъуьруьн тир,
Кутуна зун хажалатрик дерин тир.
Ви сесини билбилдин хьиз ширин тир,
Муьгьуьббатдин сирда зун ви есир я.
И кIвалахдал кьисметдин вуч тахсир я?

Им мугьман тир дуьнья ятIан, гьайиф я,
РикI акъудна къалур жедач, зайиф я.
ЯтIани вун акурди тек са йиф я,
Муьгьуьббатдин сирда зун ви есир я.
И кIвалахдал кьисметдин вуч тахсир я?

Лугьур гафар жагъизмач заз эхирдай.
Хъвайи нефес акъвазна заз чехирдай.
РикIе авай цIай уф гана туьхуьрдай,
Муьгьуьббатдин сирда зун ви есир я.
И кIвалахдал кьисметдин вуч тахсир я?

Лезги бике

Гьар пакамахъ билбил яз,
Рахаз жедай дакIардихъ;
Амукьда зун сефил яз,
Акун кIан яз, зи ярдихъ.
Тикрар:
Лезги бике-жейран я.
Гьалзавайди девран я,
Гуьрчегвилел зи ярдин,
Дуьнья михьиз гьейран я.

ЧIарар чIулав киферин,
Дамахар гвай руш я ам.
Ухшар лацу лиферин,
Женнетдин са къуш я ам.

Мани лугьуз ширин тир,
Муьгьуьббатдин сир я ам.
Гьар са дувул дерин тир,
Зи бахтунин цIир я ам.

Са бахт тушни

И дуьньядин гуьзелвили,
АвунватIа цавар вили?
Рагъ хьиз акун икьван сейли,
Са бахт тушни, Лейла ханум?

Дагъдал ала таза цифер,
Гьинихъ ятIа лагь заз сефер?
Акун Яргъирушан кифер,
Са бахт тушни, Лейла ханум?

Буй къелемдин, емиш ширин,
Нур цуькведин такур серин,
Аламатдин акун хъуьруьн,
Са бахт тушни, Лейла ханум?

Дидед бахшна гуьрчег абур,
Бубади ваз-акьул, сабур,
Мелек акун пак такабур,
Са бахт тушни, Лейла ханум?

Гьар са касдиз икьван масан,
Хьунал я вун бахтлу инсан.
Камаллу руш акун сусан,
Са бахт тушни, Лейла ханум?

ФатIимат

Цуьквер ава булахар тир атирдин,
Абурукай сад ятIа вун, ФатIимат?
Буй-бухахдиз лишанар тир магьирдин,
Гьи кьадардин шад ятIа вун, ФатIимат?

Безетмиш я дагъни аран цуькверив,
Цав атIанва яргъирушан экверив.
Ашкъидин сел агудзавай рикIерив,
Гуьзел гатфар, гад ятIа вун, ФатIимат?

Кьибледихъай атай чими гарарив,
Цав ацIуда экуь, гуьзел ярарив.
Бул емишар гъиз вугудай тарарив,
Абукевсер яд ятIа вун, ФатIимат?

Хъвер сивеллаз азиз, масан Куьреда,
Къекъведа вун дамахар гвай жуьреда.
Берекатар бул ийидай дереда,
Муьгьуьббатдин дад ятIа вун, ФатIимат

Жегьил духтур

Гьар са рушахъ вичин къамат, баш ава,
Гьар са рушахъ вичин жегьил яш ава.
Вахъ лагьайтIа, духтур хьунин хаш ава.
Ибни Синан кар гъилевай, Мадина,
 

ЧIарар чIулав, атир ялав ширин тир,
Чирвилерин гьуьл ятIа вун дерин тир?
Неве тир руш Агъа СтIал хуьруьн тир,
Ибни Синан кар гъилевай, Мадина.

Куьре эгьили бике я вун еридиз,
Гьар са лишан ухшар авай гьуьруьдиз.
Вили-вилик къачур камар вири дуьз,
Ибни Синан кар гъилевай, Мадина.

ТIалдиз дарман, мез ширин тир герек тир,
Духтирар чаз сагъламвилин дирек тир,
Илимдани, тежрибада зерек тир,
Ибни Синан кар гъилевай, Мадина.

СтIал шаир Сажидина, адет яз,
Багъишна и чIал бахтунин билет яз.
РикI алай кар гьисабзавай зегьмет яз,
Ибни Синан кар гъилевай, Мадина.

Саламар це яр акуртIа

ТIалабда за, диде вавай,
КIани рушан тIвар акуртIа;
Хицин патай яргъа авай,
Саламар це яр акуртIа.

Аскервилин эхирдин йис,
Акъатда лагь акваз-такваз.
Ислягьвилин сенгерар хуьз,
Авунва зун мягькем акъваз.

РикI дарих тир Абидатаз,
Шад жеда и чар акуртIа.
Зун тек туна, фич ам патаз,
Саламар це яр куртIа.

Гатфарин рагъ акьур чилер,
Гьазур жеда цуьквер ийиз.
Командирриз ягъна гъилер,
Хуькведа зун мехъер ийиз.

Хва хутунал вил алаз хьухь!
Муштулухдин чар акуртIа.
Диде, ярдал гъил алаз хьухь,
Саламар це яр акуртIа!

Белиж шегьер

Самур тамун умун гьава,
Ширин шуьрбет тушни дава?
Билбилрин ван рахаз цава,
Вун гьи кьадар хуш я,Белиж?
Луварал кьур къуш я, Белиж

Белиж шегьер, Белиж шегьер,
Вун гьи кьадар жезва иер?
Баку-Ростов ракьун рекьин,
РикIин хиял-куьлег я вун.
Гьикьван хуш я заз вахъ гелкъуьн?
ЧIагай свас кьван гуьрчег я вун.

Хпеж, Ахниг, Цаца, Шутул
Кьуд дуст хуьруьн я шагь дувул.
Шарвилидин Абас хутул,
.
Къарасуяр мукьвал-мукьвал,
Цуьк авачир жагъидач кьвал.
Вал ашукь яз, хуруда къал
Къачуз , зи рикI буш я, Белиж.

Лезгистандин векилрикай,
Зегьмет кIани жегьилрикай,
Майвайрикай, техилрикай,
Мани лугьур руш я, Белиж.

Белиж шегьер, Белиж шегьер,
Кьуд уьлкведиз райиж шегьер.
Ракьун рекьер, шегьре рекьер,
Каспи гьуьлуьн къизилдин кьер,
Акваз гьикьван хуш я, Белиж?
Къурмиш ийиз мелни мехъер.

Авун хьана завай тариф,
Кьаради вун кьуртIа гьайиф.
Рагъ алай югъ, варз алай йиф,
РикIиз гьикьван хуш я, Белиж?
Белиж шегьер, Белиж шегьер,
Каспи гьуьлуьн экуьн сегьер.
Берекатлу таран бегьер,
КIватIиз гьикьван хуш я, Белиж?

Къугъваз гьикьван хуш я, Белиж?
Цавай лув гуз зи гъилни яхъ,
Ахпа жуван рехъ вач, диде.

КIани яр

Уьмуьр физва лужар хьана лиферин,
Чиг чукIуриз памбагрикай циферин,
Вун галачир ашкъидикай йиферин,
Къадир кьванни аватIа, кIани яр?

Тикрар:
Яр, яр, вун зи яр, яр!
Чан зи кIани, чан зи масан яр!

Лагь ви мурад, дагълар гуда къизилдин,
Кьисмет патал багъишай кьве жегьилдин.
Сад Аллагьди шад авур чи гуьгьуьлдин,
Къадир кьванни аватIа, кIани яр?

Тикрар:
Ша, дем кутан, далдам гатаз мехъерин,
Кьисмет патал бахтлу жедай рекьерин.
Кьакьан дагълар шад лув гузвай лекьерин,
Къадир кьванни аватIа, кIани яр

Лезги рушар

Лезги рушар чи –
Чи шад къушар.
Куьн галачиз рикI акъатда.

Куьн зи рикI, зи чан,
Чи гуьзел тир рушар.
Чи рикIин мурадар.

Тикрар:
Гуьзел къушар-
Лезги рушар,
Чи багъдин нур, чи бахтавар.

Гьейран я зун квел -
Гуьзелвилел.
Залум вахт гьикI акъатда?
Гьал ая квез девран,
Чи гуьзел тир рушар.
Ша, зи къаршидиз, ша, ша!
Чан рикIерин мурадГуьзел къушар-
Лезги рушар,

Бажикъиз

Билбил тара мани лугьуз цуьквериз,
Акурла вуч шадвал жеда рикIериз?
Ухшар авай Яргъирушан эквериз,
Мад аватIа, я бахтавар Бажикъиз?

Диде-буба ашукь я ви кIвалахдал.
Мадни гуьзел хьун патал вун алахъда,
Жейран хьана, сейрда авай яйлахда,
Мад аватIа, я бахтавар Бажикъиз?

Сажидиназ хуш хьана ви къилихар,
Пек хьиз михьи, кIусни квачир синихар.
Ви кьилел хьиз къизилрикай къвайи хар,
Мад аватIа, я бахтавар Бажикъиз?

Цуьк я Рая

Шабалутдин чIарар бурма,
Хъуькъвен кьилер яру алма,
Сив виртIедин ширин хурма,
Къизилгуьлдин цуьк я Рая!

Чинал къугъваз жедай хъуьруьн,
Вич Къурушрин руш я хуьруьн.
Буй-такабур, сес тир ширин,
Къизилгуьлдин цуьк я Рая!

Даим ачух шад тир гуьгьуьл,
Ви патав са затI туш билбил.
Хуш гележег галай жегьил,
Къизилгуьлдин цуьк я Рая!

Вил алукьиз тахьуй яман,
ХупI гуьзел къуш тушни, аман!
Гьар са тIалдин халис дарман,
Къизилгуьлдин цуьк я Рая!

Зун-Сажидин-чIалан устIар,
Манида тваз алахъна тIвар.
Куьнни тамаш, азиз дустар,
Къизилгуьлдин цуьк я Рая!

Залина

Абу-Земзем яд хьиз дерин,
РикIе гьатда ви сес ширин.
Вуч милаим я ви хъуьруьн?
Чан манийрин шагь, Залина!

Буйдиз тIарам къизилдин гуьл,
Муьгьуьббатдив къугъвазвай гьуьл,
Ви манийрихъ гала зи вил,
Чан манийрин шагь, Залина!

Лезги чилин атирдин цуьк,
Шад ашкъидив ацIур чи рикI.
Берекатрин лейсандин чиг,
Чан манийрин шагь, Залина!

Билбилди хьиз сегьер-сегьер,
ЧукIура чал лали-гевгьер.
КIватIна куьтягь тежер бегьер,
Чан манийрин шагь, Залина!

Сажидиназ-СтIал шаир,
Жагъана вун устад-магьир.
Женнетдин къуш тир жавагьир,
Чан манийрин шагь, Залина.

Сурея

Гуьрчег рушар акур чIавуз Куьреда,
Къизилгуьлдин цуькверни кваз хъуьреда.
Заз бегенмиш хьанвай гъейри жуьреда,
Эквер гузвай гъед ятIа вун, Сурея ?

Буй такабур, гуьзел абур дамахдин,
ПIузар кьелечI,, сивни халис уймахдин,
ЗартIар авай тамам гьар са кIвалахдин,
Таза дуьдгъвер, мед ятIа вун, Сурея ?

Бурма чIулав чIарар яргъи киферин,
Тахар ятIа, рагъ такунвай циферин ?
Секин ахвар гьарам гатун йиферин,
Паласадин къвед ятIа вун, Сурея ?

Лугьумир хьи, и чIал гьакIан тариф я.
Вун таквазвай вилер, валлагь, зайиф я.
Уьмуьр икьван куьруь жезни гьайиф я,
Лугьузвайбур чун кьвед ятIа, Сурея ?

Чан зи диде

Сад Аллагьди гайи бахтар,
Уьмуьр я чаз гайи вахтар.
Гьар са велед емишдин тар,
Вун гьа таран багъ я, диде.
Диде, диде, чан чан диде!
Чан зи эрзиман тир, диде!

Мез кьилин вирт, камал дерин,
Авач валай касни ширин,
Чи сивик квай шад тир хъуьруьн,
Шагьни Шалбуз дагъ я, диде.
Диде, диде, чан тир диде!
Чан зи эрзиман тир диде

Эй женнетдин багъдин анар,
Валди я чи гьар са гьунар
Рехи кифер-къизил чIунар,
Диде, диде, чан тир диде!
Чан зи эрзиман тир, диде!.

КIварчагъ чехир

КIварчагърин совхоздин директор,
зи дустт Къурбанмегьамедаз!

Дустар, за квез ийин тариф,
Берекат я КIварчагъ чехир!
Хъвайидакай ийиз ариф,
Гьерекат я, КIварчагъ чехир!

КIватIна вичел ракъин нурар,
Ягъиз тада шивдиз пурар.
Вили цавук кутаз гурар,
Ферекъат я, КIварчагъ чехир!

Гьар межлисдин суфрад кьилихъ,
Тамададин жеда гъилихъ.
Чаз къалуриз вичин къилих,
Керемат я, КIварчагъ чехир!

КiватIал ийиз ярар, дустар,
Мел-мехъеррин я ам устIар.
РикIе твадай еке къастар,
Керемат я, КIварчагъ чехир!

Гьуьндуьшка квай къавур дадлу,
ЧичIекни жен НуьцIуьгъ адлу.
Тостар лугьуз тадай шадлу,
Мярекат я, КIварчагъ чехир!

Лезет я хъваз чиз хьайитIа,
Жувани жув хуьз хьайитIа.
Сив са патахъ физ хьайитIа,
Дявекат я, КIварчагъ чехир!

Сажидин, вун уьзуькъара
Жез тахьурай хъвана пара,
Сигъ хьайитIа адахъ ара,
Шуьрекат я, КIварчагъ чехир!

Жарият

Кьасумхуьруьн гуьрчег рушар,
Назанийриз я чеб ухшар.
Чагъиндавай вичин яшар,
Гуьзелдин тIвар я Жарият.

Уймах сивел къугъвайла хъвен,
Жизви яру жеда хъуькъвер.
КIвалах течир гиляй текъвер,
Гуьзелдин тIвар я Жарият.

ЧIулав чIарар авай марал,
Емиш ятIа хьайи тарал?
Сарар седеф, чиниз къумрал,
Гуьзелдин тIвар я Жарият.

Тариф авун къведач герек,
Гьар са рекьяй я ам зирек.
Ийиз чидай гьар са хуьрек,
Гуьзелдин тIвар я Жарият.

Лейла

Заз гьикьван вахт я вун такуна?
Цававай гъетериз тIалабиз.
Вун, валлагь, зи рикIи чIугуна,
Кьисметар кIан я заз сад ийиз.

Вун авачир дуьнья заз,
Дар я хьи, кIани яр.
Хуравай рикI, гумир наз,
ТIар я хьи, кIани я.

Вун гьинава, зун гьинава,
Зи кIани Лейла,
Вун чарадаз гун гьинава,
РикI къени Лейла?

Дуьньяда дертни гъам пара я,
Вун Лейли, зун Межнун хьанач хьи.
Бахтуни цуьк гъизвай ара я.
Чун кьвед хьиз масабур канач хьи.

Беневша

Вун вучиз рахазвач акурла?
Хъел хьана катмир, зи Беневша.
Икьван зи рикIи вун чIугурла,
Кiевера гьатмир, зи Беневша.

Цавара кьакьан лифери лув гуз,
Хажалатар чи кьезилрун паталди.
За жуван дерт-гъамни кваз цIув гуз,
Чи уьмуьрар жегьилрун паталди.

Вун вучиз пад кьуна,
Катзава закай, руш?
Тек вун за сад кьуна,
Мад заз яр авай туш.

Билбилар багълара шад я, шад.
Чи кIвализ ша вун, зи Беневша.
Дуьньяда захъ авай сад я, сад,
Бахт я вун яр хьун, зи Беневша.

Назифа

Вун багъда цуькверив
Къугъвазва, Назифа
Шадвал чи рикIерик
Кутазва, назифа.

Шумуд югъ я вун гузетиз,
Зи рикI хура цIаразва.
Мажбур жезва ваз минетиз,
Ваз илчияр ракъурзава.

Уьмуьр физ булах хьиз,
Гьайиф ша адан яд.
Им лагь вуч кIвалах я?
Наз гумир заз, дад.

Чан зи диде

Сад Аллагьди гайи бахтар,
Уьмуьр я чаз гайи вахтар.
Гьар са велед емишдин тар,
Вун гьа таран багъ я, диде.
Аман аман аман диде,чан тир диде!
Чан зи эрзиман тир, диде!

Тикрар:
Мез кьилин вирт, камал дерин,
Амач валай касни ширин,
Чи сивик квай шад тир хъуьруьн,
Аман, аман, аман шагьни
Шалбуз дагъ я, диде.
Диде, диде, чан тир диде!
Чан зи эрзиман тир диле!

Эй женнетдин багъдин анар,
Валди я чи гьар са гьунар.
Рехи кифер-къизил чIунар,
Вун чи кьилел рагъ я, диде.
Диде, диде, чан тир диде!
Чан зи эрзиман тир, диле!

Тикрар:
Мез кьилин вирт, камал дерин,
Амач валай касни ширин,
Чи сивик квай шад тир хъуьруьн,
Аман, аман, аман шагьни
Шалбуз дагъ я, диде.
Диде, диде, чан тир диде!
Чан зи эрзиман тир диле!
Яр, яр
Яр, яр, дарман, яр, яр,
Вун я зи иман, яр, яр.
Вун галачир дуьньяда.
Аквадач заз зар, зар.

Тикрар:
Гьай, гьай!- лугьузва за ваз,
Гьар сеферда, яр, яр.
Са жаваб це вуна ,
РикI шадардай яр, яр.

Чилер-цавар ч1алал къвез,
Завай кьазвач хабар.
Гъам-хажалат дуьньяда,
Чаз такурай, яр, яр.
Зун аваз ви дердина,
Лейли хьана гьатна, чан.
Ша, чун кьведни эркинал,
Четин мензил кьат1на, чан,
Муьгьуьббатдин рекьерай,
Т1урфанрайни мекьерай,
Рик1ин къене шадвал тваз,
Фин яргъариз катна, яр.

Багъиш ая

Тахьана заз ви къадир,
Къизилгуьлдин цуькверин,
Гваз катна гару атир,
Муьгьуббат рик1ерин.
Гьиниз фена, ц1у кайи гел туна?
Катна цифер марф-сел туна.
Пашмандаказ шезва къе зун хъел кьуна.
Минет я,

Тикрар:
Вун к1ани яр, зи женнет я.
Бахтавар уьмуьрдин женнет я.

Багъишламиш ая заз,
Минет я, гъил къачу.
Цуьквери хьиз гузвай наз,
Ашкъидин гьуьл къачу.

Залина

Гьар акурла зав шад рахадай,
Гьик1 акъудда за гъил яхадай?
Гьар са карда дуьз яз гъавурда акьадай,
Цацавидин гуьзел руш я зун-Залина!

Назанаяр мад ава Куьреда,
Шад манийрин сел къурдай дереда.
Исит1адин дад авай шуьреда,
Цацавидин гуьзел раш я зун-Залина!

Сад Аллагьди буй ганвай цуькведин,
Такабур руш я Лезги уьлкведин.
Ягъалмиш жемир хуьрел бикедин,
Цацавидин гуьзел руш я зун-Залина!

Нуржагьан

Ви гуьрчегвал къизил гуьлдин цуькведин,
Акуна заз женнет эгьли бикедин.
Эренлердин ирид булах-нек1един,
Ашукь я вал жегьил-жаван, Нуржагьан.

Къаматдал шагьнабатдин зар алай,
Муьгьтел я зун цавал гуьрчег яр алай.

Тикрар:
Самур вац1авай,
Гур селлерикай,
Карагзава вун,
Заз вилерикай.

Гьай…гьай… 2 сеферда
Лагь вуна, яр! -----
Гьай…гьай… ------
Чан зи суна, яр ------

Навбагьар берекатдин бегьердин,
Вун гъед ят1а, муьгьуьббатдин сегьердин?
Туьтуькъуш тир гьам хуьруьн, гьам шегьердин,
Ашукь я вал дагъни аран, Нуржагьан.

Икьван рик1из хуш тир ширин т1вар алай,
Дуьнья кьилел гатун йикъан гар алай.

Ша, чан гада

Ша, чан гада, вун чи багъдиз,
Къизилгуьлдин цуьквер ат1уз.
Къуй гарари лув гуй дагъдиз,
Лекьери хьиз рекьер ат1уз.

Мад чаз гатфар хьанва мугьман,
Цавай марфар къуриз дарман.
Шад мехъерар. мелер хьурай.
Чи жегьилриз кьуьлер хьурай.

Тикрар:
Заз жаваб це вуна,
Ша, кумир зи суна.
Катин чун дуьньядай,
Яргъариз гъил кьуна.

Вуна яр кьур суна жегьил,
Вал вил алаз сефил я лагь!
Уьмуьр физва, зав гице гъил,
Хайиди зи гуьгьуьл я лагь!

Ша, чан гада, сад жен чун кьвед,
Дуьньяни кваз шад жедайвал.
Сад гатфар, сад гад жен чун кьвед.
Хуьре-к1вале ад жедайвал.

Тикрар:
Заз жаваб це вуна,
Ша, кумир зи суна.
Катин чун дуьньядай,
Яргъариз гъил кьуна.

ЧIулав вилерин

ЧIулав вилерин, шулав тиллерин,
Жизви бурма квай кифер авай, яр!
Яргъал рекьерин, дерин сирерин,
Кьефесда лацу лифер авай, яр!

Мециз ширин тир, зигьин дерин тир,
РикIиз кIани тир, лугьун-хъуьруьн тир,
Ашукьбур патал рагъни серин тир,
Дагълар кIевирдай цифер авай, яр!

РикI михьи пек тир, вацран нур экв тир,
Билбилар патал багъ хьиз герек тир,
Къизилгуьллериз атирдин нек тир,
Бахтлу рекьерин сефер авай, яр!

Сажидиназ вун хуш яз акуна.
Женнетдай атай къуш яз акуна.
Махарик жедай руш яз акуна,
Кьисмет тежедай кефер авай, яр!

Вун зи рикI, вун зи чан

Гада:
Гатфарин цуькверин багъдавай,
Къизилгуь цIигел я билбилдихъ.
Икьван хуш дамахдин чагъдавай,
Муьгьтеж я, руш, зун ви гуьгьуьлдихъ.

Руш:
Атир хьиз цIаразва муьгьуьббат,
Зун, гада, вал ашукь са руш я.
Зи рикIиз хьанва къе са бубат,
Зун женнетдин гьуьруь тир са къуш я.

Гада:
Дуьньядин гуьзелвал нур алай,
Яраб, яр, а жейран вун ятIа?
Мехъерар жеда чи зур алай,
Вал ашукь тир са кас зун яа?

Руш:
Дагъдилай къарагъай къайи гар,
Лиферин луварин даях я.
Аллагьди кьисметдай гайи, яр!
Зун Абу-Кевсердин булах я.

Гада:
Руш, на зун рикIелай алудмир.
Авайди тек са ви дидиар я.
Аман дад, чун-чавай къакъудмир,
Кьисмет чи Аллагьдин кьадар я.

Руш:
Дуьньядал алаа, вун ала,
Ругьуз за ви рекье чан гуда.
Дуьньядал вун пата зун ала,
Зун патал вунани чан гуда.

Кьведани:
Вун зи рикI вун зи цуьк, зи чан я.
Зи мани, муьгьуьббат, кIанивал.
Багьа тир, масан тир, зи тан я!
Уьмуьрдин гуьрчегвал, къенивал.

Ша, кьуьл ийин

Гада:
Цаварай къваз Абулейсан,
Вун зи гуьзел гатфар яни?
Заз лагьайбур, чан зи масан,
КIанивилин гафар яни?

Руш:
Рагъ экъечIна акIидалди,
Цавун тагъда зур гуз жеда.
Вун зи рикIе эхирдалди,
Чирагъ хьана нур гуз жеда.

Кьведани:
Ша, кьуьл ийин мел-мехъериз,
Зуьрнейрин ван кьилел алаз!
Шадвилер гъин чи эллериз,
Билбил таран хилел алаз.

Гада:
Къизил гуьллер са жергеда,
Вун цуькверин шагь яни, яр?
ТIварар гьатна кьуд уьлкведа,
Чаз авурди агь яни, яр?

Руш:
Муьгьуьббатдин чир хьухь къадир,
Шад жедайбур гуьгьуьлар я.
Вили цавуз чикIиз атир,
Бухтлубур чи жегьилар я!

Вуж ятIа

ЧIулав вилер, чIарар тилер, си уймах,
Зи секинвал къакъудайди вуж ятIа?
Пiузар кишмиш, къветрен ериш, буй-бухах,
Ам зи ярдиз ухшар авай къуш ятIа?

Дерт гайиди, берт хайиди чIередин,
Хел хайиди, хъел хьайиди вуж ятIа?
Милаим хъвер, хъуькъвен кьилер дередин,
Икьван гьейран, хаму жейран-руш ятIа?

Гьалтай бере, дагъни дере рагъ хьана,
Муьгьуьббатдин жем гайиди вуж ятIа?
Баябанчуьл, рахаз билбил-багъ хьана,
Буькме-уьтуь, женнет-туьтуькъуш ятIа?

Ахвар тир жал, зал хар тир жал къвайиди?
И бахтавар, емишдин тар вуж ятIа?
Заз-сталжем, ашкъидин жем гайиди,
Саламатдин, аламатдин гуж ятIа?

Заира

Юкьван буйдин, къумрал якIун,
Хуш къилихрин, ширин рахун,
Хъуьрез-хъуьрез, шад яз акун,
Са бахт тушни,руш Заира?

Сив къизилгуьл, вилер чIулав,
Муьгьуьббатдин цIун гул-ялав,
Гьар са юкъуз акун къвалав,
Сабахт тушни, къуш Заира?

Ийиз вердиш гьар са кIвалах,
Сес ширин тир-земзем булах,
Вич чан алай цуьквер яйлах,
Са бахт тушни, хуш Заира.

Сажидина кхьей чIалар,
Хъсан хьунухь я ви гьалар.
И дуьньядин девлет-малар,
Са бахт тушни, нуш Заира?

Шамсият

Ни хиялнай атайла и сеферда,
Вични къадим Дербент лугьур шегьерда,
Вун гьалтдатIа, гуьзелвал и тегьерда,
Сад Аллагьди ганвай бике, Шамсият!

Живедин жанг алай чIарар бурма тир,
Сив мили тир хъвер алай са хурма тир,
Хъуькъвер гьар сад патар яру алма тир,
Кьисмет хьунухь бахт я еке, Шамсият!!

Буйдиз шумал хьун ваз гьикьван хуш ятIа?
Чи Эминан хуьруьн женнет къуш ятIа?
Камаллувал авай дерин, руш ятIа?
Намусдикни квачир леке, Шамсият!!

Гьар жуьре я инсанарни кьисметар,
Аллагьди ваз ганва вири няметар.
Мадни кIани кьадар сагъвал, девлетар,
Кьисмет хьуй ваз авай рикIе, Шамсият!!

Лугьумир хьи, ибур гьакIан гафар я,
Шиир-багьа лали-гевгьер гьарфар я.
Вун акурла, зулни кваз заз гатфар я.
Сагъ хьурай вун авай уьлкве, Шамсият!!

Етара

Шабалутдин чIарар-чIунар къизилдин,
Сес ширин тир Куьре патан билбилдин.
АрхитIжуван руш ятIа вун, Етара?
Пак женнетдин гьуьруьпери шикилдин,
Аламатдин къуш ятIа вун, Етара?

Ачух тир чин, хъуькъвен кьилер ярарин,
ПIузар-пIини, лацу седеф сарарин,
Пияладин жем ятIа вун, Етара?
Яргъирушан ирид жуьре нурарин,
Лезги мехъер дем ятIа вун, Етара?

Мишреб гъизвай лезгистандин чилерал,
И кьадардин ашукь къизилгуьллерал,
Муьгьуьббатдин гьуьл ятIа вун, Етара?
Дуьнья гьейран ийир чIулав вилерал.
Зарб макьамдин кьуьл ятIа вун, Етара?

Сажидинан гафар-чIалар сад хьана,
Заз акурди Абу зем-зем яд хьана.
Меркез шегьер-гъед ятIа вун, Етара?
Гатфарикай берекатдин гад хьана,
Кьуьл ийизвай къвед ятIа вун, Етара?

Са цуьк ятIа чи Саибат

Кьасумхуьруьн гуьрчег рушар,
Бейкеф жемир таза къушар.
Женнет Гьуьруь авай ухшар,
Са цуьк ятIа чи Саибат?

Мез ширин вирт, камал дерин,
Сивел къугъваз жедай хъуьруьн,
Дамахар гвай гьар са хуьруьн,
Са цуьк ятIа чи Саибат?

СтIал вацIун кьеревай гар,
Кьилел къугъваз жеда пайгар.
Яргъирушан алай рангар,
Са цуьк ятIа чи Саибат?

Сад Аллагьди бахтар пара,
Кьисметнавай бегьер тара,
Къизилгуьлдив авай ара,
Са цуьк ятIа чи Саибат?

Диде хьтин гуьзел аял,
КIвалах ийир тиягъиз ял,
РикIе авай михьи хиял,
Са цуьк ятIа чи Саибат?

Пападивай хьана малум,
Мубаракрай Яру Диплум.
Играмудин бубад халум,
Са цуьк ятIа чи Саибат?

Сажидиназ гьар са рушан
Чида тариф ийир лишан.
Муьгьуьббатдиз хас тир яшан,
Са цуьк ятIа чи Саибат?

Телли-ханум

Нуьгвед ич тир тарал хьайи,
Самур бике марал хьайи,
Къизилдин гъед хурал хьайи,
Телли – Ханум руш яни вун?
Женнетдин са къуш яни вун?

Къизилгуьлдин сивни пIузар,
ЧIарараллай къизилдин зар,
Хазинайрин багьа базар,
Телли – Ханум руш яни вун?
Женнетди са къуш яни вун?

Яру хъуькъвер яру гуьллер,
Ашкъидин нур авай вилер,
Чидай ийиз тарам кьуьлер,
Телли – Ханум руш яни вун?
Женнетдин са къуш яни вун?

Гваз атанвай бахтни девлет,
Шад ая чи лезги миллет.
Лоторейдай къугъвай билет,
Телли – Ханум руш яни вун?
Женнетдин са къуш яни вун?
______________
Сима диде, Мелик буба,
На хкажна цавуз зурба.
Мублагь ийир хуьрни уба,
Телли – Ханум руш яни вун?
Женнетдин са къуш яни вун?

Сажидинан пара чIалар,
Квез багъиш я, чан аялар.
Пехил ксар ийир ялар,
Телли – Ханум руш яни вун?
Женнетдин са къуш яни вун?

Аида

И дуьньядин гуьрчегвилер рикIеваз,
Къекъвезва вун муьгьуьббатдин рекьеваз.
Квел пехилбур эхиз тежез, йикьеваз,
На кIанидаз куьз гужзава, Аида?

Сад Аллагьди ваз икьван бахт гайила,
Вунни кIанид, вазни кIанид хьайила,
Ви бахтуни и кьадар цуьк гъайила,
На кIанидаз куьз гужзава, Аида?

Гьар са патахъ тамаш ая иердиз,
Жуваз тамаш агакьнавай бегьердиз.
Куьн кIанивал малум тирла шегьердиз,
На кIанидаз куьз гужзава, Аида?

Бахт са затI я балугъ хьтин гьуьлевай,
На кьенерар гъуьргъуь мийир гъилевай.
Хабар такьаз вахакайни кIвалевай,
На кIанидаз куьз гужзава, Аида?

Сад кьисмет я, кIан хьайитIан иридаз.
Ви бахтуни вар ачухин виридаз.
Эгер гьуьрмет ийизватIа хайидаз,
На кIанидаз куьз гужзава, Аида.

Табасаран руш

Акур бере бегенмиш гьар амалдин,
Вилер чIулав, пIузар яру чумалдин,
Иеси тир пара дерин камалдин,
Табасаран руш яни вун, Эльмира?

ЧIулав чIарар бурма хьана къуьнерал,
Вал ашукь яз, цуьк экъечIда къванерал.
Гьайиф инсан тир эцигиз чилерал,
Табасаран руш яни вун, Эльмира?

Буйдиз шумал, кьелечI якIун, кьезил тир,
Седеф сарар гьарма сад са къизил тир,
Муьгьуьббатдиз пара мукьвал мензил тир,
Табасаран руш яни вун, Эльмира?

Хуш мили хъвер къугъваз хъуькъвен кьилерал,
Тилисимда твадай гьар сад вилерал.
Гваз къекъвена кIандай даим гъилерал,
Табасаран руш яни вун, Эльмира?

СтIал шаир Сажидинахъ кьатIунар,
Авайди я, мукIратIди хьиз атIунар.
Напак инсан ийин тийир гатIунар,
Табасаран руш яни вун, Эльмира?

Мадина

Беневшадин лацу тир чин,
Къизилар я чIарар вичин.
Буйдиз шумал таз тир ичин,
Лезги марал я Мадина.

Кардиз зирек, мециз ширин,
Къуш я Магьарамдин хуьруьн,
Сивел даим алай хъуьруьн,
Лезги марал я Мадина.

Дидед ухшар гуьзел бике,
Пак мурадар авай рикIе,
Бахтар авай вичихъ еке,
Лезги марал я Мадина.

Дуст Закидин лампадин экв,
Ихьтин рушар жеда тек-тек.
Гьич са гунагь квачир мелек,
Лезги марал я Мадина.

Сажидина лагьай чIалар,
Шад хьун патал я ви гьалар.
Хъуькъверик квай яру гъалар,
Лезги марал я Мадина.

На манияр лагь, Суьлгьуьят

Гада:
На манияр лагь, Суьлгьуьят,
Халкьдин дерди-гьаларикай.
Ви манийрин гьар са ният,
Я къизилдин гъкларикай.

Руш:
За манияр гьикI лугьуда,
Хурун кьефес дар хьайила?
За кIани яр гьикI лугьуда,
РикIиз дакIан кар хьайила?

Гада:
На манияр лагь, Суьлгьуьят,
Чи дидейрин хиялрикай.
ЧIугваз югъ ва йиф азият,
Фикирзавай аялрикай.

Руш:
За манияр лагь, Суьлгьуьят,
Вили цава рагъ тахьайла.
За пIинияр гьикI лугьуда,
Абур битмиш багъ тахьайла?

За манияр гьикI лугьуда,
Чи Лезгистан сад тахьайла?
Жува-жувни йикь лугьуда,
Хайи халкьдиз шад тахьайла.

Гада:
На манияр лагь, Суьлгьуьят,
РикIе авай дердерикай.
Ви гьар са гаф я са аят,
ТуькIуьр хьанвай бейтерикай.

Гада ва Руш:
Зани мани, нани мани,
Чи кьведан гаф сад жедайвал.
Чна кьведа санал лугьун,
Вирибуруз шад жедайва.

Мариям

Шабалутдин бурма чIарар къизилдин,
Таз тараллай цуьк ятIа вун гуьгьуьлдин?
Шегьерда шад сесер тунвай билбилдин,
Муштулух гвай хабар ятIа, Мариям?
Беневшайцрин гьамбар ятIа, Мариям?

Дагъни Аран бегьер таран ширин тир,
Играми затI чаз ви багьа хъуьруьн тир.
Бахтлу рекье гелер тадай дерин тир,
Муштулух гвай хабар ятIа, Мариям?
Беневшайцрин гьамбар ятIа, Мариям?

Лезги чилин берекатрин берекат,
Вун я адак кутазвайди гьерекат.
Шад межлисрик къурмишнавай мярекат,
Муштулух гвай хабар ятIа, Мариям?
Беневшайцрин гьамбар ятIа, Мариям?

Сажидина туькIуьрна ваз чIал ширин,
Бахтлу хьунухь паталди куьн кIвал, ширин.
Хабар кьадай гьикI ятIа зи гьал, ширин,
Муштулух гвай хабар ятIа, Мариям?
Беневшайрин гьамбар ятIа, Мариям?

Жавгьарат диде

Вили цава ишигълу тир рагъ ава,
Чахъ камаллу къадим Шагь дагъ ава,
Лезги чилихъ Женнетдин пак багъ ава,
Абур вири вун я диде Жавгьарат!

Лезгистанда пара ава булахар,
Цуьк акъатай ава гуьзел яйлахар,
ТуькIуьрзавай рикIиз кIани кIвалахар,
Абур вири вун я диде Жавгьарат!

Уьмуьрдихъни ава вичин ширинвал,
Гьар са сирдихъ ава вичин деринвал,
Рагъ авай къуз герек затI хьиз серинвал,
Абур вири вун я диде Жавгьарат!

На веледриз гана вири кIанивал,
Чун бахтлу хьун тир ви мурад, чан диде!
Сад Аллагьди гайи икьван къенивал,
Вун чаз азиз сад яз, шад я, чан диде!

Тевриз ханум

Яргъи чIулав кифер авай,
Бахтлу рекьин сефер авай,
РикIе лацу лифер авай,
Сагъ хьурай чи Тевриз ханум!

Къумрал чинал чIулав вилер,
Хъуькъвен кьилер къизил гуьллер,
Муьгьуьббатдин авай гьуьлер,
Сагъ хьурай чи Тевриз ханум!

Сивел алай мили хъуьруьн,
Бике ятIа ЦIийи хуьруьн?
Чиник квачир кIусни серин,
Сагъ хьурай чи Тевриз ханум!

Зун, Сажидин – лезги шаир,
Алахъна вун ийиз загьир.
Гуьзелвилиз пара магьир,
Сагъ хьурай чи Тевриз ханум!

Сайтарахуьр

Дуьзен хуьрер, гуьне хуьрер,
Квел ашукь я дуьне, хуьрер,
Дуствал кьадай вине, хуьрер,
Чан зи макан, Сайтарахуьр!

Тикрар:
Сайтарахуьр, Сайтарахуьр,
Бажарагълу картарин хуьр.
Машгьур я вун Лезгистанда,
Накьвар къизил къатарин хуьр.

Шалбуз дагъдин атир гьава,
Гьар дердиниз тушни дава?
Лекьер авай къугъваз цава,
Чан зи макан, Сайтарахуьр!

Къалин тамар, къацу чуьллер,
Хъуьрез жеда къизил гуьллер.
Вили цавал алай вилер,
Чан зи макан, Сайтарахуьр!

Муьгьуьббатдин яшар авай,
Бахтлу, гуьрчег рушар авай,
Мединадиз ухшар авай,
Чан зи макан, Сайтарахуьр!

Къуни-къунши хуьрер-кIвалер,
Къавум-къардаш, мехъер-мелер,
Дем къурмишдай ийиз кьуьлер,
Чан зи макан, Сайтарахуьр!
______
Кар туькIуьрдай гьалтай вичел,
Сагъ хьурай вун, Мурад стха!
Сажидина туькIуьрай чIал,
Я мехъерин таратI, стха!

Бутахуьр

Кьилел къугъваз къайи шагьвар,
Гьар са югъ я ина сувар.
Мугьман патал ахъа тир вар,
Ашарин хуьр я Бутахуьр!

Тикрар
Тарих къадим сирерикай,
Ирс атанвай пIирерикай,
Гуьнепатан пIирерикай,
Шагьвече тир, чан Бутахуьр!

Атирлу тир тамун гьава,
Гьар са булах чандиз дава,
Мидаим рагъ жедай цава,
Къушарин хуьр я Бутахуьр!

Зегьмет кIани жегьил эллер,
Вацра садра мехъер, мелер,
Хъуькъвен кьилер къизилгуьллер,
Рушарин хуьр я Бутахуьр

Тикрар:
Тарих къадим сирерикай,
Ирс атанвай пIирерикай,
Гуьнепатан хьрерикай,
Шагьвече тир, чан Бутахуьр!

Дидедин суьрет

Вахтар физва чун жез рехи,
Чун са чIаван аялар тир.
Азиз диде, чIарар рехи,
Чун куь рикIин хиялар тир.

Диде, заз ви гуьзел суьрет,
Лув гуз физвай циферикай;
Малаикрин нурлу кIеретI,
Карагзава вилерикай.

Диде сад я, сад я Аллагь,
Диде багьа кас я, Валлагь!
Лугьузва заз даим рикIи,
Дидедикай манияр лагь!

Диде, диде, ширин диде,
Мез вирт, акьул дерин диде.
Исятдани ама рикIе,
Ви милаим хъуьруьн, диде.

И дуьньядин гьар са нямет,
Ваз кIандай чаз хьана, диде.
Вун себеб яз бахтлу кьисмет,
Заз Аллагьди гана, диде.
ЧIал теснифай Сажидинахъ,
Валай багъри авач, диде

Наташа

Дагъустандин хуьр тир Хъартас,
Машгьурнавай кьегьел тир кас,
«Гьуьлерин гъед» фирмадин Ас,
Гьасан-Бубад руш Наташа!
Чан женнетдин къуш Наташа!

Лезги чилин гуьзел бике,
Бахтарин бахт авай еке,
Шад ийизвай хайи уьлкве,
Гьасан-Бубад руш Наташа!
Чан женнетдин къуш Наташа!

Юкь къизилдин закIал ятIа?
Дидед рикIин гьайкал ятIа?
Бахтар гуьзвай мукал ятIа?
Гьасан-Бубад руш Наташа!
Чан женнетдин къуш Наташа!

Хъуькъвер къизил гуьлдин цуьквер,
Руьгьдин къашар нурлу эквер,
Камал дерин, мезни шекер,
Гьасан-Бубад руш Наташа!
Чан женнетдин къуш Наташа!
________

СтIал шаир Сажидиназ,
Лап рикIивай хьана кIаназ.
Билбилди хьиз гуз вердиш наз,
Гьасан-бубад руш Наташа!
Чан женнетдин къуш Наташа!

Эркиназ

Авачир бахт жагъидани тIалабна?
Нубатсуз на ви жегьил чан кабабна.
Вун хьиз кайи гуьзелар за гьисабна,
ТIалдиз дарман жагъун тавур, Эркиназ.

Шуьшедин буй мум хьиз цIараз хиялрик,
Секин умуд кутунва на аялрик.
Вун хьтин кас квач чи патан маралрик
Муьгьуьббатдихъ агъун тавур, Эркиназ.

Ви кьисметди ярдин таран кIукI хана,
Бедбахтвили дараматдин юкь хана.
Вакай рахаз хъижен тийир кьукь хьана,
Багъ барбатIна, жугъун тавур, Эркиназ.

Чiулав чIарар кьечIем кьве пад рехи яз,
Акур чIавуз вун яшариз чIехи яз,
Гьич са затIни тIалабначтIан гьакъи яз,
Азиятри юргъун тавур, Эркиназ.

Вири крар рикIел гъунугъ герек туш.
Гафар жакьун камаллудан хуьрек туш.
Ни лугьуда, вун марал туш, бике туш?!
РикIе урфан, чайгъун тавур, Эркиназ.

Сажидинан гъалатI авач чIалуна,
Кагьрабаяр кIватIнавай са гъалуна.
Iумудан дерт чуьнуьхин за чIугуна?
Вун тир зи рикI бархун тавурд, Эркиназ!

Гуьзел яр

Кьадар ава, кьисмет ава,
КIанид тахьун зегьмет ава.
Чан яр, заз ви къимет ава,
ТупIалдавай къаш, гуьзел яр.

Вун са кIвале, зун са кIвале,
Шумуд фикир ава кьиле?
Къачун патал ярдин къеле,
Са шад хабар гъваш, гуьзел яр.

Аман минет пара хьана,
Вучиз зи фу тара хьана?
Зун вун гъидай гара хьана,
Вучиз ви хев квач, гуьзел яр?

Залай артух ваз кIаниди,
АватIа хъвач, кьей дилиди!
Сажидин я рикI къениди,
Кьулухъ вахчу кIвач, гуьзел яр.

Цава къугъваз

Цава къугъваз лацу лифер,
Аквазва заз чIугваз кефер.
Сад жедайла йикъар, йифер,
Зав кьисмет куьз хъел хьанватIа?

Жегьилвилин чикIиз атир,
Куьз авач ваз адан къадир?
Ви кIаник-шив, зав гуз къатир,
Зи пеше куьз шел хьанватIа?

Муьгьуьббатдин гуьтIуь рекьер,
Вуч кIевибур жезва мекьер?
Вили цава дагъдин лекьер,
Абур ашукь квел хьанватIа?

Акъатна ван, гьар са жуьре,
Ачух хьана дагъни дере.
Акур чIавуз гатфар бере,
Вакай къугъваз кIел хьанватIа?

Сажидиназ акур ахвар,
Алахьай къуз къун ятIа хар?
Де куьне лагь, я чан вахар,
За тIуьрд фалай кьел хьанватIа?

Аният

Агъзур жуьре цуьквер ава чуьллера,
Якъут, мержан бул ава чи гьуьлера.
Ризги рушаз хас тир а ви вилера,
МукьнатIисдин суьгьуьр авай, Аният.

Бахтавардин бахт я, руш, вун чир хьунухь.
Диде, буба мумкин я ви пIир хьунухь.
Зазни кIандай зи ватан ви хуьр хьунухь,
Аламатрин загьир авай, Аният.

Багъ битмишун-багъманчидин кIвалах я.
Жейранрин луж къугъвадайди яйлах я.
Ашукь Ширин-муьгьуьббатдин булах я,
Шаир хуьруьг Тагьир авай, Аният.

Сажидинан буржи зегьмет чIугун я.
Заз кIани кар гьар юкъуз вун акун я.
Зун берекат авай раран ругун я,
Муьгьуьббатдин техил авай, Аният.

Тикрар:
Аман Аният, дарман, Аният.
ЧIугваз гумир зав вуна азият.
Лезги берекат-харман, Аният,
Дегишра са кIус на ви хасият.

Гатфарин нур

Гатфарин нур-экв хьиз акур вилериз,
Атир я вун ганвай къизил гуьллериз.
Бубуйрин ранг алай хъуькъвен кьилериз,
Янавайди яр ятIа, яр, Аният?
Пелеллайди хар ятIа, хар, Аният?

Билбил акваз шад къугъвазвай цуькверив,
Агатзава ашкъилувал рикIерив.
ГуьцI жез физвай къайи гимиш чигерив,
Дагъдин хаму гар ятIа, гар, Аният?
Цуьквер алай тар ятIа, тар, Аният?

Уьмуьрдикай лезет къачуз, кьуьл ийиз,
Къугъвазва вун акурбур вал гуьл ийиз.
Манидикай алахънавай цIил ийиз,
Чуьнгуьр яа, тар ятIа, тар. Аният?
Цавун кIенел яр ятIа, яр, Аният?

Самур дере, гьар са жуьре ятарин,
ЧешмеятIа къизил, гимиш къатарин?
Берекатлу багъдин аран патарин,
Даддин ширин нар ятIа, нар, Аният?
Лезги намус, ар ятIа, ар, Аният?

Сажидиахъ гьар хуьре са кIвал авай,
Я кьил авач, я кIвач авай тIал авай.
Залум рикIиз вуч ийин за къал авай?
Чидач адаз тIар ятIа, тIар, Аният?
Вуна кьурди кар ятIа, кар, Аният?

Гъепцягьжуван руш

Акун гуьрчег, рахун ширин,
Тек-тек рушар жеда хуьруьн,
Зигьин дегьне, камал дерин,
Гъепцягьжуван руш ятIа вун?

Назлу дилбер, буйдиз шумал,
Хуш я заз ви гьар са амал.
Сис шуьрбетдин, пIузар чумал,
Гъепцягьжуван руш ятIа вун?

Женнетэгьли я ви юлдаш,
Цуькведавай кьведанни яш.
Метелжемдал туькIвенвай аш,
Гъепцягьжуван руш ятIа вун?

Еке тариф квез я авун?
Муьгьуьббатдин гъед ятIа вун?
Зуьгьре гъетрез ухшар цавун,
Гъепцягьжуван руш ятIа вун?

Лугьумир хьи дидедин рикI
Кузвач рушахъ-къизилдин цуьк.
Бубадин кьил кьаз тазвай тик,
Гъепцягьжуван руш ятIа вун?

Абу-земзем тир Меккеда.
Гьатнава куьн тIвар уьлкведа.
Шад, хуррам тир тар цуькведа,
Гъепцягьжуван руш ятIа вун?

Гьайиф

Къуцу багъда билбил рахаз,
Теменар гуз, гарданар кьаз,
Цуькведин кьван кефи тахаз,
Фейи жегьил вахтар гьайиф.

Яд булахдай курум-курум,
Авахьиз физ, дагуз дурум.
Вал ашукь яз дуьнья ярум,
Фейи жегьил вахтар гьайиф.

Йисар кьулухъ элкъуьр тежез,
Уьмуьр физва сефил ишез.
Кефер чIугун, дуьнья къечез,
Фейи жегьил вахтар гьайиф.

Вацран чинал зайиф хъуьруьн,
Акурла дерт жезва дерин.
Ярдихъ галаз рахай ширин,
Фейи жегьил вахтар гьайиф.

Кьей Сажидин, вайни акъат
Тавурд амач мад гьакъикъат.
Бедендал як алай са къат,
Фейи жегьил вахтар гьайиф.

Вун демера

Вун демера кьуьлер ийиз шад я, шад.
Зун къерехдал капар ягъиз сад я, сад.
Гафар гъалиб хьайи гатфар, гад я, гад,
За заз вучин, за ваз вучин, азизди?

Уьмуьр са затI я къисметдай акъатдай,
Юлдашар жен багьна течир къакъатдай.
За ваз уьмуьр багъишдай хьи савкьватдай,
За заз вучин, за ваз вучин, азизди?

И дуьньядин иервилер ваз гана,
Вучиз закай катзава вун наз гана?
Ахварай на зав пияла хъваз гана,
За заз вучин, за ваз вучин, азизди?

Захъ пул авач, девлет авач пачагьдин,
Аман минет, кьил кьамир са алчахдин.
Вакай лампа ийидай хьи утагъдин,
За заз вучин, за ваз вучин, азизди?

Сажидин кьий вакай чIалар туькIуьриз,
Чарабурун рикIера экв куькIуьриз.
Акъваздачир хьи зун яргъал фикириз,
За заз вучин, за ваз вучин, азизди?

Жамила

СтIалрин хуьр-женнет макан,
Бахтарин гьуьл я квачир кIан.
Билбил ятIа вун гьи таран,
Чан ципицIдин твар, Жамила.

Чiулав чIрар, гьяркьуь кьечIем,
Пiузаарриз вит, хъуькъвериз чIем.
Пияладив ацIанвай жем,
Чан гьамгадин квар, Жамила.

Вилер чIулав руьгьдин къашар,
Тек-тек ава лезги рушар.
Билбилдиз тир пара ухшар,
Чан атин квай хар, Жамила.

ЧIулав чIарар къугъваз къуьнел,
Дем кутаз зун къвен куьн гъенел.
Вун акурла, ашкъи винел
 Акъатзава, яр Жамила.

Яру ичер-хъуькъвен кьилер,
Вуч чIулавбур я ви вилер?
Квекай заз са чара, эллер,
 Квадармир зи кар, Жамила.

Уьмуьрдикай къачуз лезет,
Ийизва за кьуд пад гуьзет.
Ви гъилева Лезги газет,
 Акуна зи тIвар, Жамила.

ВиртIедиз хьиз дуьуьдгъвер, гъери,
Муьгьуьббатдиз сад туш вири.
Де вуна лагь, чан зи гьуьруь,
 Куьз жезва вун гар, Жамила?

Сажидина мад са сефер,
ЧукIурзава чIулав цифер.
Са кIус хъуьруьхъ, сивив гваз фер,
 Ийимир рикI тIар, Жамила.

Заз бегенмиш тир дишегьли

Заз бегенмиш тир дишегьли,
Зун ви гъиляй гьиниз фида?
Ша, чун тахьун патал эгьли,
Чи девранар гьализ фида.

Лугьуз жедач мад чи яшар,
Цуьк акъудна жегьил хъижен.
Берекатлу никIиз ухшар,
Муьгьуьббатдин къизил хъижен.

Заз бегенмиш тир азиз инсан,
Зун ви хъиляй гьиниз фида?
Ви дерт рикIе амаз масан,
Я цавуз, я чилиз фида.

Лугьуз жедач, мад чи руьгьер,
Гьалт хъийила лифер хъижен.
Сад Аллагьди гана бегьер,
ЧIугваз тахьай кефер хъижен.

Заз бегенмиш гъамлу суна,
Зи гафар ви кьилиз фида.
Ша, чун кьведни гъилер кьуна,
Муьгьуьббатдин гьуьлуьз фида.

Лугьуз жедач, адетар я,
Чи гьал мадни бетер хъижен.
Гъам чIугвамир, кьисметар я,
Цава чун кьвед гъетер хъижен.

Заз бегенмиш назлу халум,
Ша, чун инай виниз фида.
ТахьайтIа зун, чIулав залум,
Азраилдин кIвализ фида.

Лугьуз жедач, Сад я Аллагь,
Жегьил рушни гада хъижен.
Я тахьайтIа, галукьна агь,
Зи зегьметар бада хъижен.

Азизди

Жегьилвал-бахт я Аллагьди багъишдай,
Ам гичинда хуьз тахьурай экъичдай.
Заз ви чинин гьар са гуьзел нехишдай,
Жуван кьисмет-рагъ аквазва азизди.

РикI къалуриз жедач хуру кIиви я.
Чун кьведни, яр, са як я, са иви я.
Заз кIаниди са гаф я, са жизви я,
Вучиз ам ваз дагъ аквазва, азизди?

Аллагь-Сад я, шагьидар я пIирерни,
Сад я чи кьве рикIе авай сирерни.
Къуй, бегьердал атуй таза цIирерни,
За чи кьведан багъ аквазва, азизди.

Кьве рикI садав агуд тежез, шезва зун,
Шаклувили инсаф тийиз незва зун.
Ислидихъ вил галай Керем жезва зун,
Заз ви вилел нвагъ аквазва, азизди.

Сажидиназ хабар авач, чир жедач.
Пуд лагьайдаз чидай кIвалах-сир жедач.
Яд авачир къураматда хир жедач,
Муьгьуьббатдин тагъаквазва, азизди.

Чидач заз

Вахтар фена билбилар хьиз хъуьредай,
На лугьуда, вацI я фейи дередай.
Накъвар хьана, яд авахьиз чIередай,
Вучиз вун, яр, сефил ятIа чидач заз.

Кьисмет лугьур агъдабандин кар ятIа,
Заз чидам вун бахтлу касдин яр ятIа,
Ваз чидани, зи рикI гьикьван тIар ятIа?
Ви яр кьванни жегьил ятIа чидач заз.

Бязибурун бахтар ахъа жедалда,
Гуьрчегбурни акьуллуяр шедалда.
Са-садбурал бахт цаварай къвадалда,
Гевгьер ятIа, къизил ятIа чидач заз.

Къе атана рех гьатнава чIарара.
Яшлувилин жив къватIа чIурара?
Жегьил чIавуз кIан хьайи руш, ахвара,
Зи пел кьурди ви гъил ятIа чидач заз.

Ахпа са кас, регъуь кьванни тахьана,
Гъил вахчуна, вахъ галаз туьнт рахана.
Са кIус амаз за адан кьил тахана,
А небгет кас ви гъуьл ятIа чидач заз.

Сажидинахъ гъамар эхдай чан ава.
Ягьсуз пеле итим кьейи къан ава.
Зи япара ви манийрин ван ава,
Ам вун ятIа, билбил ятIа чидач заз.

Къизилгуьл

Вили цава лацу лифер луж хьана,
Акур чIавуз чими рикIиз хуш хьана.
Зун хьиз бахтлу хьайи инсан вуж хьана?
ЯркIижуван руш акурла-Къизилгуьл.

ЧIулав чIарар къугъваз цIалцIам къуьнерал,
Пияладин жев кьунвани гъилерал?
Шадвилин нвагъ акьалтна зи вилерал,
ЯркIижуван руш акурла-Къизилгуьл.

Дамахни наз дидеди ваз багъишна,
Камаллу яз бубади вун вердишна.
На лугьун зи чина нурар экъична,
ЯркIижуван руш акурла-Къизилгуьл.

КIеле патан тIебиатдин цуьк ятIа?
Лезги чилин ашкъи авай рикI ятIа?
Яраб, дустар, куьн кефияр гьикI ятIа?
ЯркIижуван руш акурла-Къизилгуьл.

Дагъдин булах авахьна физ векьерай,
Зун атана къаярайни мекьерай.
На лугьун заз бахт жагъана рекьерай,
ЯркIижуван руш акурла-Къизилгуьл

Ашкъидин тIал

Къизилгуьлдин пIузаррикай,
Заз виртIедин дад акуна.
Муьгьуьббатдин азаррикай,
Ашкъидин тIал сад жагъана.

Ваз шуькуьр хьуй, эй Сад Аллагь,
Къадирда кьур яд акуна.
Заз шад уьмуьр гайи ислягь,
Ахварай яр мад акуна.

Халкь авур Кас чилер, цавар,
ХъуьтIуьн цикIиз гад акуна.
Кутаз кIанз зак ракьун лувар,
На къурмишай чад акуна.

Кьил-кьакьан рагъ, беден аран,
Лезги чилин ад акуна.
Илгьам я зун шаир таран,
Адан бегьер фад акуна.

Сажидинахъ чIалан шир-шир,
Шииратдин пад акуна.
Гафаралди тефидай шир,
Чiалар кхьиз, шад акуна.
Заз са гуьзел руш акуна.

Лацу хурал къизилдин сят,
Акур рикIиз хьана регьят.
Чи яшара аваз сергьят,
Эхиз тежер гуж акуна.

Чiулав вилер-руьгьдин къашар,
Тек-тек жеда жегьил рушар.
Женнетэгьли Гьуьруь ухшар,
Гуьрчег таза къуш акуна.

На лугьуда, экъечIна рагъ,
Билбил рахаз, хъуьрена багъ.
Муьгьуьббатдин кьакьан тир дагъ,
СтIалжуван руш акуна.

Хуру нефес къачуз зайиф,
Гьатна акур чанда гьайиф.
Авур чIавуз пара тариф,
За вун лап сархуш акуна.

Элкъвей чинин рангар къумрал,
Яраб ни яр ятIа марал?
Ам гваз къекьуьн, кьуна хурал,
Зи дустуниз хуш акуна.

Ярдихъ галаз

м кьуьд тирни, гатфар тирни,
Кьил акъатнач, югъ тирни, йиф.
Цавай къвайид марфар тирни?
Рагъ тирни ам, гар тирни, циф?

Шад къугъвана рикI-тезенаг,
Муьгьуьббатдин тардихъ галаз.
Завай-ахмакь тир дуьзенаг,
Рахаз хьанач ярдихъ галаз.

Вилералди тIуьна за яр,
Азарлуда анар хьтин.
Хиялрикай хьана зи гар,
Зурзурна яр чинар хьтин.

Яру рангар къекъвез хьана,
Хъуькъвераллай зардихъ галаз.
Зунни зи яр элкъвез хьана,
Гъетер Чилин шардихъ галаз.

Агь муьгьуьббат, агь жегьилвал!
Куьн багъишай цавариз кьий.
Кьисмет авур чаз кьезилвал,
КIанивилин лувариз кьий!

Бахтарни къваз кIандай цавай,
Къизилар яз хардихъ галаз.
РикI хура кьаз жезвач завай,
Къекъведайла ярдихъ галаз.

Вуч жеда чаз циферивай?
Рагъни чими гар галайла.
Чилелай фир кифер авай,
РикIиз кIани яр галайла.

КIанивилин жем тир шуьрбет,
Хъваз вугана нардихъ галаз.
Вуч ширин я тавур суьгьбет?
РикI къудгъуниз ярдихъ галаз.

Чил-зи диде, рагъ зи буба,
Алахьай цав кIан хьана заз.
Гар кутадай рикIик зурба,
Ярдин ширин ван хьана заз.

Сажидинан вилерикай,
Себеб яз и кардихъ галаз;
Яргъирушан цIвелерикай,
Аквазва зун ярдихъ галаз.

Гьар цуькведихъ

Гьар цуькведихъ вичин атир, ранг ава,
Дуьньяни кваз вичел гьейран ийидай.
Гьар аялдихъ вичин кьеб, кьве танг ава,
Шад уьмуьрдал ашукь девран ийидай.

Руьгьдиз чими, рикIиз кIани аял я,
Лайлайрихъ яб акалзавай ширин тир.
Вун игит яз чIехи хьун чи хиял я,
Вафалу хьухь, акьулдалди дерин тир.

Булахдин яд къугъваз жеда лепейрив.
Билбил тара лугьуз гуьзел манияр.
Аман гатфар, фад агакьра куьрпейрив,
Майдин вацра дигмиш жедай пIинияр!

Эльза

Рагъ экъечIиз гьазур чIаван,
Самур дере, билбилрин ван,
Чилер, цавар алван-алван,
Шад яз, хъуьрез жеда, Эльза.

Тик дагъларин кьилер цава,
Аранда хуш атир гьава,
РикIиз хьайи чIавуз дава,
Мизан-терез жеда, Эльза.

Аман минет мийир энгел,
Бахтлуди я вун авай гел.
Лацу пелехъ яр хьиз цIигел,
Дуьнья серес жеда, Эльза.

Такабур буй, мишреб тIарам,
Къудирсуздаз я ам гьарам.
Вун такурла зи чан хуррам,
Валлагь, мерез жеда, Эльза.

Гьар са тIалдиз ава дарман,
Сажидинан гьал я яман.
Зун вун патал ятIа мугьман,
Ватанперес жеда, Эльза.

АтIуз кIан хьана

АтIуз кIан хьана къизилгуьлдин цуьк,
Залум цацари атIана зи рикI.
Зи муьгьуьббатдин куьлег билбил нуькI,
Чи кьисметар куьз чара хьанайтIа?

Сад Аллагьди заз эхирдин кьиляй,
ГанатIа жаза гунагьрин хъиляй?
Гуж хьана хьи заз чарадан кIваляй,
Ваз тамаш ийир ара хьанайтIа.

Я залум кьисмет, Аллагьдин кьадар,
Виликди фидай рехъ хьана заз дар.
Ачухдаказ кьан хъижен тийиз тIвар,
Вучиз зун уьзуькъара хьанайтIа?

ЧIулав чIарарин ахъа тир кьечIем,
Акваз рикIеллай цIаразва хьи чIем.
Кваз кьун тавуна гьарамни гьешем,
Гунагькарвилер пара хьанайтIа?

Сажидинан дерт, Сажидинан тIвал,
Зун кьиникь патал хьанватIа кIватIал?
Дагъ хьтин кьакьан са терс тир кIунал,
Зи багъиш бедбахт тара хьанайтIа?

Куьгьне муьгьуьббат

Гатфари вичин къалурна лишан,
Зав дерт вугана са гуьзел рушан.
ЦIеридни тамам тахьанвай яшан,
Зун вучиз адан есир хьанатIа?

Къизилгуьлдин цуьк цацарин кьула,
Вучиз на ви дерт гана зи кIула?
Чун кьвед сад садан тахьунал чIала,
Яраб ам са зи тахсир хьанатIа?

Къизилгуьлдин цуьк, къизилгуьлдин цуьк,
Аллагьдиз килиг, кумиртIун зи рикI!
Зун векьин кьал хьиз акатна къванцик,
Вун такваз шумуд асир хьанатIа?

Къизилгуьлдин цуьк, муьгьуьббатдин цуьк,
Зи кьисет чIурай мусиббатдин цуьк!
Зун авам тир хеб, вун амалдар сикI,
Кьил акъат тийир вуч сир хьанатIа?

Чан Дербент

Са пад Къирхлер, са пад «Нарин» къеле тир,
Жалгъандин дагъ-аждагьандин келле тир,
Гьар са магьал-са хизан, са магьле тир,
Тарих къадим шегьер я вун, чан Дербент!

Къизил гьамбар Каспи гьуьл вах дерин тир,
ТIебиат вахъ ава хъуьтуьл, серин тир.
Агъзур жуьре нямет авай ширин тир,
Муьгьуьббатдин сегьер я вун, чан Дербент!

Дустар патал ахъа варар-рикIинар,
Шумуд жуьре зияратдин мискIинар,
Шумудни са жуьре рахун-луькIуьнар,
«Дуствал» багъдин бегьер я вун, чан Дербент!

Вав барамбар шегьерар сад-вад ава.
Вахъ абуземземдин шуьрбет-яд ава.
Дуьнья машгьур ви барудин ад ава,
Гьамиша шад тегьер я вун, чан Дербент!

«Пекдин рекьер» тIушунай кьван девейрин,
Гелер ама чархарани дявейрин.
Ам тарих я, амма къецин невейрин,
Чамардавай кегьер я вун, чад Дербент!

Сажидина ви кIанивал паталди,
Теснифна и чIал михьи тир рикIелди.
Агъзур сара Алпандин пак цIалди,
КуькIуьрнавай тIегьер я вун, чан Дербент!

Ферида

Гьам шегьер, гьам дагъни аран,
Гуьрчегвилел я зун гьейран,
Пелез лацу, хъуькъвер яран,
Экуьн сегьер тир Ферида.

Шагьнабатдин сес тир ширин,
Гуьзел тават рагъ тир хуьруьн,
Сивик квайла жизви хъуьруьн,
Вун вуч эер тир Ферида?

И цуьк-а цуьк лугьуз къекъвез,
Зун хьана вал чIиж хьиз элкъвез,
Чи хуьруьз къвез, кIвализ текъвез,
Ам вуч тегьер тир Ферида?

Герек хуьквен хъийич тариф,
Зун вал ашукь хьана зериф.
Муьгьуьббатдин сирдин мариф,
Женнет бегьер тир Ферида.

Аферин вун хайи сусаз,
Вуч гаф ава хайи йисаз?
Кьисмет хьанач, вуч ийин, заз?
Лали-гевгьер тир Ферида.

Афисат

Уьмуьр гьикьван вахт я зайиф?
Икьван куьруь жез ам гьайиф.
Гагь югъ хьана, гагьни жез йиф,
Физва тежез кьаз, Гьафисат.

Вили тир цав-кIан квачир гьуьл,
Гваз катна чи кьведан гуьгьуьл.
Сад Аллагьдин гайи жегьил,
Катна хьи гар кваз, Гьафисат?

Абукевсер-мелгьем рикIин,
Жагъун тавур чна гьикIин!
Бахтар авай кIвалин рикIин,
Ахъа хьанач чаз, Гьафисат.

Уьмуьр квез тир ярдихъ дакIан?
Шумудан за ваз тIварар кьан?
Гьар са инсан, къуй вичиз кьван,
Бахтлу хьуй, шад яз, Гьафисат.

Зун, Сажидин-дугъри инсан,
Ваз мукьвай чидай хъсан.
Теснифна за и чIал масан,
Кiанивилиз хас, Гьафисат.

Я женнетдин гьуьруьпери

Сад гьалтна зал-рикIин нямет,
Авачир затI вичин къимет.
Яраб ам нин ятIа кьисмет?
Я женнетдин гьуьруьпери!

Къаш-къаматдик квач са синих,
Яргъи кифер кьвед кьве къуьнуьхъ.
Вил галамач гьич са куьнихъ,
Я женнетдин гьуьруьпери!

Вун акурдан квахьда азар,

Ракъини хьиз чукIурдай зар;
Аман тахьуй вун бедназар,
Я женнетдин гьуьруьпери!

Тамашунал вил ацIудач,
ВацI атана гьуьл ацIудач.
Кьисметдикай вил атIудач,
Я женнетдин гьуьруьпери!

ФиринекIед булахрикай,
Гуьлчуьмендин яйлахрикай,
Вирт хкудай мумлахрикай,
Я женнетдин гьуьруьпери!

Гьуьруьпери-Гьуьруь ятIа?
Вун зи виртни гъери ятIа?
Заз вун дуьнья вири ятIа?
Я женнетдин гьуьруьпери?!

Са бахт тушни

И дуьньядин гуьзелвили,
АвунатIа цавар вили?
Рагъ хьиз акун икьван сейли,
Са бахт тушни, Лейла ханум?

Дагъдал алай таза цифер,
Гьинихъ ятIа лагь заз сефер?
Акун яргърушан кифер,
Са бахт тушни, Лейла ханум?

Буй къелемдин, емиш ширин,
Нур цуькверин течир серин,
Аламатдин акун хъуьруьн,
Са бахт тушни, Лейла ханум?

Дидед бахшна гуьрчег абур,
Бубади ваз-акьул, сабур.
Мелек акун пак такабур,
Са бахт тушни, Лейла ханум?

Гьар са касдиз икьван масан,
Хьунал я вун бахтлу инсан.
Камаллу руш акун сусан,
Са бахт тушни, Лейла ханум?

Гияра

Кьурагь дагълар, Гияр шегьер,
Вуч гузел я гьар са сегьер?
Вун гьи багъдин ятIа бегьер?
Къизилгуьлдин цуьк, Гияра!

Вуч гаф ава буйдиз шумал?
Яргъи кифер къугъваз кьамал,
РикIиз кIани гьар са амал,
Къизилгуьлдин цуьк, Гияра!

Дамахар гвай таза жейран,
Вун акур кас жеда гьейран.
Чiарар чIулав, пIузар яран,
Къизилгуьлдин цуьк, Гияра!

Бахтлу я вун къекъвей рекьер,
Кьилел лув гуз алай лекьер.
Чаз ачуха ви пелен кьер,
Къизилгуьлдин цуьк, Гияра!

Гияра руш, Гияра руш!
Вун ятIа са женнетдин къуш?
Кьурагь дагълар, Гияр шегьер,
Халис муьгьуьббатдин бегьер,
Къизилгуьлдин цуьк, Гияра!

Зи азиз

Уьмуьр са югъ, уьмуьр са йиф
Я, эхирдай къведай гьайиф.
Ви атирди назик, зайиф,
Мад хкана чан, зи азиз!

Кьвед кьве синел къугъваз гарув,
Акатзава басрух хурув.
Яру цуьквер бул авай рув,
Ша, къужахда кьан, зи азиз!

Аллагьди чи кьведан ара,
АвуртIа вучи ийин чара?
Мензил тахьун патал пара,
Са кIус мукьвал кьан, зи азиз!

РикIер чара, кьисметар сад,
Хуш я заз ви атирдин дад.
Кiанивилин суьгьуьрдин яд,
Хъунвай жезва кIан, зи азиз!

Ашкъилин нур къугъваз пеле,
Вун цава, зун ава чиле.
Муьгьуббатдин гурлу гьуьле,
Чун кьвед ава кьван, зи азиз!

Къизилдин цуьк, зи сефил цуьк,
РикI гьевесдин есир я хьи.
Шаирдин вил, саилдин гъил,
Магьрумвилин тахсир я хьи!

Лейла

Ракъин кIаник дигмиш хьанвай,
Сад Аллагьдин багъиш ганвай,
Женнет багъдин емиш хьанвай,
Чан чи ширин гелин Лейла!
Чан наш ширин гелин Лейла!
Сивел алай хъуьруьн, Лейла!

Вун авай кIвал я шад мехъер,
Бахтлу я ви фидай рекьер.
Мез кьилин вирт, пIузар шекер,
Чан чи ширин гелин Лейла!
Чан наш ширин гелин Лейла!
Камаллувал дерин, Лейла!

Акун гуьрчег, къекъуьн дамах,
Дуьньядикай пара уях,
Чи хизандин мягькем даях,
Чан чи ширин гелин Лейла!
Чан ширин гелин Лейла!
Хуш я чаз ви хъуьруьн,Лейла!

Къуй ви кIвачихъ девлет еке,
Хва хана шад ая уьлке.
Дербент я вун авай Мекке,
Чан чи ширин гелин Лейла!
Чан ширин гелин Лейла!

Юлдаш бахтлу гъуьлуьн, Лейла!
СтIал шаир Сажидина,
Ваз и цIарар багъиш гана.
Сагъ хьурай ви ата, ана,
Чан чи ширин гелин Лейла!
Чан ширин гелин Лейла!
Экв я вун кьве вилин, Лейла! !

Аял вахтар

Рагъ хъуьрезва гатфар хьана,
Чуьллер рахаз цуькверивди.
Цавар чими марфар хьана,
Шадвал гва рикIерив.
Сагъра чи аял вахтар!
Дидедин, бубадин багьа.
ЧIехи хьана аялар яз,
Картар хьана ава цава

Тикрар:
Ширин тир аял вахтар чи къизилдин,
Багьа я чаз, багьа я чаз!
Цуьк гъайи ашкъидин чигуьгьуьлдин,
Уьмуьр багьа я чаз.
Шад манийрин, кьуьлерин,
Мехъерринни мелерин,
Вахтар къизил гуьллерин,
Багьа я чаз, багьа я чаз!
Диде, буба кьилел алаз,
Дуьньядал ашукь къушар я.
Кьегьел гадаяр, рушар я,
Яшамишрай чи аял вахтар,

Гьар са йисуз хайи йикъар,
Шадвилив тухузва вуна.
Чи кьилерал чими ракъар,
Пара хьурай лугьузва.
Уьмуьрдин вирт заз хъваз ширин я,
Дуствилер чи мягькембур я,
Вири эл шад ийизва на!
Зи кIанивал заз дерин я.

Ахварай хьиз аквазва

Гьикьван гуьзел жегьил вахт,
Акъат хьана гел галачиз?
Чавай яргъа хьана бахт,
Кьурана чи вацI шад сел галачиз!
Ахварай хьиз аквазва,
Чи уьмуьр мехъер, шад мел галачиз.
РикI хуруда дакIвазва,
Яраб Сад Аллагь Ваз ятIа хабар?
Алудзава къабарар!
Ша зи патав кIани лиф, лув гана.
Гатфариз хьиз рагъ хьана.
Зи жегьил чан ша гьайиф, хуьх ам дагъ хьана!

Тикрар:
Акъатна бахт гъиляй,
Кат хьана зи хъиляй.
За дердер, чан вахар, нив гуда хуьн патал?
ГьинватIа кIаниди?!
За дердер ахъайна, чан вахар, куьн патал.
Зав вахце зи кIаниди!

Уьмуьр гьикьван куьруь я?
Заз акурди ахвар я жал?!
Зун женнетдин гьуьруь я,
Гъамни хажалат – зи вахар я жал?!
Шадвал-виртни гъери я.
Заз экуь дуьнья мичIи хьана хьи.
Яр галачиз и дуьнья,
Йифелай артух ичIи хьана хьи!
Зун Кереман Исли я,
Аман Сад Аллагь, заз са шад гаф лагь!
Завай мад кьарай кьаз жезмач, валлагь!
Муг квахьнавай къуш я хьи зун,
КIани ярдихъ вил гай.
Куьз багъишна заз дердер гьуьл галай?!

Тикрар:
Акъатна бахт гъиляй,
Кат хьана зи хъиляй.
За дердер, чан вахар, нив гуда хуьн патал?
ГьинватIа кIаниди?!
За дердер ахъайна, чан вахар, куьн патал.
Зав вахце зи кIаниди!

Яр, яр

Яр, яр, дарман, яр, яр,
Вун я зи иман, яр, яр.
Вун галачир дуьньяда.
Аквадач заз зар, зар.
Тикрар:
Гьай, гьай!- лугьузва за ваз,
Гьар сеферда, яр, яр.
Са жаваб це вуна ,
РикI шадардай яр, яр.

Чилер-цавар ч1алал къвез,
Завай кьазвач хабар.
Гъам-хажалат дуьньяда,
Чаз такурай, яр, яр.

Зун аваз ви дердина,
Лейли хьана гьатна, чан.
Ша, чун кьведни эркинал,
Четин мензил кьат1на, чан,

Муьгьуьббатдин рекьерай,
Т1урфанрайни мекьерай,
Рик1ин къене шадвал тваз,
Фин яргъариз катна, яр.

Тикрар:
Яр, яр, дарман, яр, яр,
Вун я зи иман, яр, яр.
Вун галачир дуьньяда.
Аквадач заз зар, зар.

Багъиш ая

Тахьана заз ви къадир,
Къизилгуьлдин цуькверин,
Гваз катна гару атир,
Муьгьуббат рик1ерин.

Гьиниз фена, ц1у кайи гел туна?
Катна цифер марф-сел туна.
Пашмандаказ шезва къе зун хъел кьуна.
Минет я,

Тикрар:
Вун к1ани яр, зи женнет я.
Бахтавар уьмуьрдин женнет я.

Багъишламиш ая заз,
Минет я, гъил къачу.
Цуьквери хьиз гузвай наз,
Ашкъидин гьуьл къачу.

Тикрар:
Вун к1ани яр, зи женнет я.
Бахтавар уьмуьрдин женнет я.

Багъишламиш ая заз,
Минет я, гъил къачу.
Цуьквери хьиз гузвай наз,
Ашкъидин гьуьл къачу.

Ширин муьгьуьббат

Гьикьван вахт, вун къведай, вил рекьел алаз,
Атанач, вил галаз, марф хьиз сел галаз.
Муьгьуьббат кIанда заз, мехъер-мел галаз.
Билбилрин саягъда, девранар гьализ!

Юкь шумал, къекъуьнар тушни дамахдин?
Земземдин яд авай, сив я булахдин.
Цуькверив ацIанвай, атир яйлахдин,
Къекъвезва вун чIура жейранар гьализ.
Ша, яр, зи къаршидиз, вун зи саз хьурай!
Ви гъиляй пияла-шуьрбет хъваз хьурай!

Тикрар:
Вун зи яр!
Зун ви яр!
Чун кьведни
Бахтарвар!
Я, чан яр!

Некьидин пIузаррал муьгьуьббатдин чиг,
Ам хъвадай шад йикъар мус къведатIа заз.
Ахварай вун акваз, акъатзава рикI,
Шад хабар- муштулух гуз къведатIа заз?!

Къизилдин гуьллерин нур алай хъуькъвер,
Ви бурма чIарарив ажеб кьазва, яр.
Чаз ая шадвилив са мили тир хъвер!
Куьз вуна зи рикIе дердер твазв, яр?
Вал ашукь-зун ви чам. Вун заз свас хьурай!
Ви гъиляй пияла-шуьрбет хъваз хьурай!

Дагъларин гуьрчегвал

Чи дагъларин гуьрчегвал,
Акур чIавуз шад я зун.
Хуш тир адан
РикI кузвай кас
Сад я зун.

Алван-алван чуькверал
Чиг алама гьамгадин.
Вил цава циферал
Гьуьм алама рангадин.

Мани лугьуз дагълариз
Ша, фин, дустар, шадвилив.
Тамаш чи шад гьалариз
Ашукь хьанвай садвилив.

Кьуьлер ийин демера,
Дагъдин къацу чIурарал.
Ашукь я зун рикIера,
Гьатдай ракъин нурарал.

Мани лугьуз дагълариз
Ша, фин, дустар, шадвилив.
Тамаш чи шад гьалариз
Ашукь хьанвай садвилив

Дуствилин хизанда

Дегишвилер гьар йикъан,
Аквазва, азиз дустар, виридаз.
ЧIур ийимир рикI икьван,
Сабур хуьз эвер гун эллериз.

Чун са стхаяр, са вахар
Хьайила, Дагъустандин дагълара,
Дуьз хьайила кIвалахар,
Ничхирар рахада багълара.
Бахтлу жеда уьмуьр чи,
Акурла хъсанвилер шадвилин.
Гуж рикIериз гумир чи
Тикрар:
Дуствилин хизанда,
Яшамиш жез кIанда,
Чи уьмуьрдал шад жен,
Чун, дустар!

Чан зи рагъ

Чан зи рагъ-варз, азизди,
РикIин хиял дидедин.
Гьар са кардиз винизди,
Куьрпе аял дидедин.
Вакай чIехи кьегьел хьурай,
Чан зи бала, ширин бала.

Тикрар:
Ша, зи бала, ширинди,
Камаллувал деринди.
Чан дидедин рикIин хиял,
Ваз хайи югъ мубарак!

Лифре цавуз лув гуда,
Гуьзел жезва чилер чи.
Вуч атирлу я гьава!?
Шадлу жезва рикIер чи.
Сагьиб хьанвай шад уьмуьрдин,
Ваз хайи югъ мубарак!

Ислягьвилин хизанда,
ЧIехи хьурай вун, бала!
Заз вун гьикьван масанда?
Бахтлу я вал чун, бала!
Гъалиб хьана шад уьмуьрдин,
Ваз хайи югъ мубарак!

КIани рушаз эвера

Тамар-тарар амаз ширин ахвара,
Гъетери нур гузма гьеле цавара.

Гарал алай пешерин гьал зайиф я,
Мани лугьуз, шадлувал тваз рикIера.
Гатун йифер гьакI акъудиз гьайиф я,
Гьарда вичин кIани рушаз фад эвера!

Экуьн сегьер-тIебиатдин мехъер я,
Гъетер цава ишигъ гузва эквер я.

Азиз дустар, шадвал ийин гьамиша,
Чи кьилерал ислягьвилин нур хьурай.
Манияр лугьуз гададини руша,
Чи рикIера шадлувилер бул хьурай!

Тикрар:
Зи кIани, зи багьа азизди,
КIан я вун, зи рикIиз, азизди.
И дуьньяда чандилайни азизди.
Гьуьлуьн лепе акьалтзава рикIел зи.
Хур гатаз, зенг язавай саягъда. Зав рахаз!

Гьар са ничхир шад яз лув гуз тарара,
Къизилгуьллер хъуьрез жеда чIурара.
Аман Аллагь, заз кIан я лагь гьамиша.
И дуьньядал вун зи багьа хиял я.
Азиз тир яр, на заз ви рикI багъиша,
Зун вал ашукь ашкъидин нур-аял я!

Айиб мийир

Ам за вакай туькIуьрначир манияр,
Ви ухшарар авайтIани цIарара.
Ам вун тир жал са чIаван зи кIани яр?
Ахъа кьечIем авай чIулав чIарара.

Ам за вакай авур тушир фирикирар,
Вун зи рикIе гьатнайтIани цаз хьана.
Ягъалмиш яз багъишнатIан шиирар,
Ви муьгьуьббат бейхабар яз хъваз хьана.

Ахъа пеле экIяй хьанва биришар,
Хъуькъвен кьилер цIай амачир цуьквер я.
Са чIавуз за темен гайи пиришар,
Кьве пIузаррин винел алай шекер я.

Зав рахамир, хкимир мад рикIел зун,
Вун рикIелай алахънава алудиз.
Муьгьуьббатдин гъайи инсан рекьел зун,
ГьикI хъфида далу яна далудиз?

Гьа вун я вун, чIехи ятIан яшариз,
Муьгьуьббатдин цIай куькIурай рикIевай.
Гьа кар себеб кичIе туштIа къушариз,
Цава лув гуз, муьгьуьббатдин рекьевай?

Яшарин рагъ акIизватIан цавара,
Лугьумир хьи, муьгьуьббатдин эхир я.
ИстикIандин нур къугъвазвай рувара,
Галукьарна, хъваз тахьанвай чехир я.

ХъуьтIуьз мукьва ятIани зул-къизил я,
Чалай аслу я чимивал, къайивал.
Гунагьрилай гъил къачурла, кьезил я,
Уьмуьр фена, чир тахьана кIанивал.

Белки чун чал гьалт хъийин са сеферда,
Чи кьисметрин иеси Сад Аллагь я.
Айиб мийир, хияллу и тегьерда,
Бахтлу хьунухь гьар са касдин темягь я.

Ваз муьгьуьббат чир хьанач

Ваз муьгьуьббат вуч затI ятIа чир хьанач,
Адан къадир течирдаз кIвал, хуьр хьанач.
Куьз лагьайтIа, адахъ ярдин сир хьанач,
Гьам тушни бес чи бахтунин кьеривал?

Зун тек туна, вун чуьллема-чуьл хьана,
Квез я лугьуз ахьтиндакай гъуьл хьана.
Уьмуьр катна бахтлувилел вил хьана,
Хиве кьаз кIан туш акьулдин кьеривап.

Ваз зун акваз, рикI акунач хуравай,
Вун пехъ хьана кьакьан хъархъун таравай.
Жейранрикай хьиз чуьнуьхай чIуравай,
Чир хьанач ваз зи ашкъидин диривал.

Вун гъед хьана кIанзавай заз цавара,
Вун зал гьинай дуьшуьш хьана, авара?
Гьелелигда къуват амаз лувара,
КIан туш мецин къалур ийиз куьруьвал.

Шумуд гатфар къвез алатна, гад хьана.
Вакай юлдаш хьун тавунал шад хьана.
Авай фикир эхиз тежер сад хьана:
Ваз къалурун хьана хъуьтуьл гъеривал.

Вилер руьгьдин къашар я зи экв авай,
Уьмуьрдикай къурху туш заз тек авай.
РикI жедалди хурун къене тIвек авай,
Зун кьисметдин хуруз фида жеривал.

Къуй шаирди авурай чи суд-дуван,
Сад Аллагьдин зи ялвардин хьурай ван.
Кьисметдикай нарази кас туш жуван,
Хиве хадач ви вилик за къуьруьвал.

Вун гьина ава

Вун гьинва зи къизилдин цуьк?
Шадвилелди хъуьрез жедай.
ХьаначиртIа вал икьван рикI,
Зи чан эрез-мерез жедай.

Вилер чIулав пIузар пIини,
Заз ви ширин дад акурай.
Енгедив гвай мехъер сини,
Ви шуьрбетдин яд акурай.

Зи къизилдин цуьк тир бике,
Яргъи кифер къуьнераллай.
Вун хиял хьиз гьатна рикIе,
Зун гар хьанва синераллай.

Вун къаршидиз атай чIавуз,
Закай луван ничхир жезва.
Ялвар ийиз кьакьан цавуз,
Нефесдикай чехир жезва.

Хунча хьана чуьллерикай,
Цав атирдин гьуьл хьиз ава.
Вун карагиз вилерикай,
Са къизилдин гуьл хьиз ава.

Заз уьмуьрдин эхир кьиляй,
Ахварай хьиз акуна, яр.
Гагь шадвиляй, гагьни хъиляй,
Хуравай рикI дакIуна, яр.

Женнетдин къуш

Уьмуьрдин рекьера,
Тежедай кар авач.
Валай къир заз рикIе
Шадвал тур яр авач.

Гьар йикъан сегьердин
Ракъинин зар авай,
Багъдаваз бегьердин
Аквазва заз яр авай.

Пак женнетдиз ухшар авай,
Гъетер авай цав гана заз кIанида.
Малаикар-къушар авай,
Муьгьуьббатдин чIав гана заз кIанида.

Хуруда цIай авай
Бахтлу тир руш я зун.
Ярдикай пай авай
Женнетдин са къуш я зун.

Тикрар:
Пак женнетдиз ухшар авай,
Гъетер авай цав гана заз кIанида.
Малаикар-къушар авай,
Муьгьуьббатдин чIав гана заз кIанида.

Ша, чан яр, чи багъдиз,
Варз алай йифер я.
Атанвай утагъдиз,
Чун ислягь лифер я.

Тикрар:
Пак женнетдиз ухшар авай,
Гъетер авай цав гана заз кIанида.
Малаикар-къушар авай,
Муьгьуьббатдин чIав гана заз кIанида.

Фая-ханум

Багъда рахаз таза билбил,
Ажеб ачух жеда гуьгьуьл!
Къе заз акур мелек жегьил,
 ТIвар я адан Фая-ханум!

Къаш-къаматдиз пара сарес,
Буй-бухахдиз мизан-терез.
Шад рахадай хъуьрез-хъуьрез,
 ТIвар я адан Фая-ханум!

Шабалутдин ранг я чIарар,
Седефар я лацу сарар,
Хъуькъвен кьилер экуьн ярар,
 ТIвар я адан Фая-ханум!

Гуьрчег пелек квачир серин,,
Намус, гъейрат чидай дерин,
ТIавус къуш тир Кьулан хуьруьн,
 ТIвар я адан Фая-ханум!

КТВ-дин назлу жейран,
Акур чIавуз жеда гьейран.
Ачух тир чин, лацан-яран,
 ТIвар я адан Фая-ханум!

Сажидин, на рушарикай,
 Кхьидачни ч1алар залум?
Женнетдин пак къушарикай,
 Сад я масан Фая-ханум!

Бажи вах

Кьурагь пата пара рушар,
Ава халис туьтуькъушар.
Гуьзелвилиз а ваз ухшар,
Валлагь, акунач, Бажи вах!

Хъуькъвер яру къизил гуьллер,
Муьгьуьббатдив ацIай вилер.
А вахъ авай тамамвилер,
Валлагь, акунач, Бажи вах!

Гияр шегьер, тарих дерин,
Вун себебда хьана ширин.
А ви хьтин мили хъуьруьн,
Валлагь, акунач, Бажи вах!

Чин ачух тир варз алай йиф,
Икьван куьруь жез ам гьайиф.
Гатфар чIаван гар тир зайиф,
Валлагь, акунач, Бажи вах!

Чида лугьуз, пара рахун
Авуна хьуй, жеда яхун.
Жувни инал за дуьз тухун,
Валлагь, акунач, Бажи вах!

Сажидинан гьар са кьатIун,
МукIратIди хьиз, дуьз я атIун.
Заз вун хьтин иер хатун,
Валлагь, акунач, Бажи вах!

Ильза руш

Дуьнья машгьур хуьрер ава Куьреда,
Къекъвена зун Къуба, Самур дереда.
Зун аламат авурди и жуьреда,
Алидхуьруьн бике ятIа-Ильза руш?
Хайи макан Меке ятIа-Ильза руш?

Куьн дагълариз тамаш кьилел гар алай!
Цавуз тамаш хважамжамдин зар алай!
Лацу чинал къизилгуьлдин зар алай,
Алидхуьруьн бике ятIа-Ильза руш?
Хайи макан Мекке ятIа-Ильза руш?

Сивел хуш хъвер алаз, къекъвез дамахдал,
Аквада ам таяр галаз булахдал.
Безетмиш тир таза тир буй-бухахдал,
Алидхуьруьн бике ятIа-Ильза руш?
Хайи макан Мекке ятIа-Ильза руш?

Гьар са лишан, жегьил рушан иер тир,
Муьгьуьббатдин тарал хьайи бегьер тир,
Бахтар вилик квай гатфарин сегьер тир,
Алидхуьруьн бике ятIа-Ильза руш?
Хайи макан Мекке ятIа-Ильза руш?

Вуч гаф ава Сажидинан кьатIуниз?
Гьар са шиир халича хьиз атIуниз.
Ухшар марал пак Къурьандин хатIуниз,
Алидхуьруьн бике ятIа-Ильза руш?
Хайи макан Мекке ятIа-Ильза руш?

Рушар ава чи СтIалдал

Шагь бикейрин чешме Куьре,
Гьар са хуьре гьар са жуьре.
ПIузар ципицI, хъуькъвер дере,
Рушар ава чи СтIалдал.

Буй такабур, лацу гардан,
Акурла кIан жеда бирдан.
Мециз ширин, гъилиз мердан,
Рушар ава чи СтIалдал.

Чил шиткидай яргъи кифер,
Муьббатдиз хас тир лифер.
Хуш тир акун гьар са сефер,
Рушар ава чи СтIалдал.

Квез герек я артух тариф?
Кьисмет тахьун гуж я гьайиф.
Гьар са рекьяй кIелай ариф,
Рушар ава чи СтIалдал.

Вини-, Кьулан-, Агъа-СтIал,
Гевгьерар я гьар са стIал.
РикIе твадай ашкидин тIал,
Рушар ава чи СтIалдал.

Сажидинахъ ава кьатIун,
УстIарвилел чIалар атIун.
Женнетдин гьар сад са хатун,
Рушар ава чи СтIалдал.

Мехъер мани

Эгер, чан яр, вуна.
Ганайт1а заз дуьнья,
Хуьдай за мидаим,
Намус-гьая.
Жуван гьая, гьая!
Тикрар:
Ша, чан азиз,
Вун чи к1вализ.
Ярар-дустар
Галаз хуш дуьнья!

Ша, чун кьвед жен уях,
Садаз сад жен даях.
Вуч гуьзел я дуьнья?
Вунни захъ галаз, яр!

Бахтавар

Бахтавардин бахт аку,
Сад Аллагьдин тахт аку,
Икьван гуьзел тир,
Зун паталди яр яни вун, яр.
Ширин емиш нар яни вун нар?
Муьгьуьббатдин гар я вун.
Вун гьина ава зи гуьзел тир яр?

Тикрар:
Вун зи уьмуьрдин нур яни, яр?
Вун зи ашкъидин зур яни, яр?
Багъдавай жейран кьуьл ийир,
Ашкъидин гуьгьуьл цIил ийир яргъи.

Уьмуьр гьикьван шад ятIа?
Муьгьуьббатдин дад ятIа?
Икьван гуьзел тир.
Зун пататалди яр я, вун яр.

Мубарак

Уьмуьр гьикьван иер я?
Муьгьуьббатдин бегьер я.
Гьар са велед хайи югъ-
Ам бахтунин сегьер я.

Тикрар:
Азиз, ширин, чан масан,
Акьуллу тир хьухь инсан.
Хайи йикъан табарак,
Ваз чи патай мубарак
Чан гадаяр, чан рушар,
Пак женнетдин шад къушар!
Буюр ая виридаз,
Шад межлисдин нез ашар.

Муьгьуьббат

Зун валди шад хьана, гуьзел, пашманни.
Заз вун хьанай играми дуст, душманни.
РикIикай са ваз тир хабар, бейхабар
Зи рикIел на иляйна хьи пис къабар.

Тикрар:
Инсаф ая,са гаф ая, муьгьуьббат.
Фагьум-фикир гзаф ая, муьгьуьббат.
Акунани кIамач заз вун, вил гала.
РикIе дердер пара ама, гъил къала.
Яраб вун заз яр жедатIа?- Ваъ, жедач!-
Лугьумир, яр, ви рикIикай ракь жедач.

Белки кьисмет амачтIа чун сад жедай,
Вун патал физ тахьурай зун тек туна.
Вахт хьайитIа, рикI вун патал пад жедай,
Ви дакIарда лампа хьурай экв туна.

На зи кефи хана вакай, ширин я.
Ви багъда рагъ, амма зи багъ серин я.
Къуй вун кьванни бахтлу хьурай, зун туштIа.
Ваз зун дакIан ятIани за вун хушда.

Лариса

Лезгистандин пак женнетдин еридиз,
Вуч гаф ава кьисмет хьайи гьуьруьдиз?
ПIузар ухшар вирт вичик квай гъеридиз,
Алидхуьруьн цуьк ятIа вун, Лариса?
Шад билбилдин нуькI ятIа вун, Лариса?

ЧIехи буба ухшар дагъдин лекьерин,
Пуд стхадин енге вах тир мехъерин,
Муштулух гвай шадвилерин рекьерин,
Алидхуьруьн цуьк ятIа вун, Лариса?
Шад билбилдин нуькI ятIа вун, Лариса?

Лацу пелел къизилдикай зар алай,
Вафалу руш я вун бадед тIвар алай.
Гьар са хъуькъвен кьилел экуь яр алай,
Алидхуьруьн цуьк ятIа вун, Лариса?
Шад билбилдин нуькI ятIа вун, Лариса?

Дуьнья машгьур адалатдин дередин,
Пак ханумрин ханум ятIа Куьредин?
Сандухар гвай иситIайрин, шуьредин,
Алидхуьруьн цуьк ятIа вун, Лариса?
Шад билбилдин нуькI ятIа вун, Лариса?

Сажидиназ хуш я халу, халаяр.
Дидед ватан багълар, къуьлуьн талаяр.
Виридалай хуш тир таза балаяр,
Алидхуьруьн цуьк ятIа вун, Лариса?
Шад билбилдин нуькI ятIа вун, Лариса.

ПIинихалум

Милет-лезги, макан-Куьре,
Бахтлувилин гъед тир Зуьгьре,
Хъуькъвен кьилер-билбилжегьре,
Ваз хвашгелди, сафагелди,
Эй бахтавар ПIинихалум!

Сивел алаз манидин ван,
Мурадар твах кьиле жуван.
Чил-цав авур алван-алван,
Ваз хвашгелди, ПIинихалум.

Дегь-девирдин кIарудин тIвар
Кьаз кIватIалда вуна дустар.
Эй суваррин чIехи устIар.
, Ваз хвашгелди, ПIинихалум!

Муьгуьббатдин пак рикIелди,
Ваз хвашгелди, Сафагелди,
Лугьузва къе лезги элди.
Гьуьрмет, хатур кIани, Халум.
На михьи тир Пак рикIелди,
Дуьнья ая къени, Халум.
Чан вилериз такур диде

Велед патал чан багъишна,
Азиятар чIугур диде.
Гьи напакди ваз къаргъишна?
Чан вилериз такур диде.

НекIедин дад такур мили,
Акурди са цав я вили.
Вун акваз кIанз жезва дили,
Чан вилериз такур диде.

Диде дахай хьана кьисмет,
Вахтар физва гатаз кьил-мет.
Алакьзавач ийиз гьуьрмет,
Чан вилериз такур диде.

Шикил акваз къванцяй сурун,
Дар жезва зи кьефес хурун.
Вун кIане, зун винел фурун,
Чан вилериз такур диде.

Диде, диде, ширин диде,
Рагъ алай югъ серин, диде.
Зав ахварай кьванни рахух,
Чан вилериз такур диде!

Гьуьметлу тир мирес Раид, дуст
Тийирмирзе, халу Намрудин ва
Заз чир хьайи дустар! Чилер-авар
АцIай кьван квез зи патай саламар!

Чан Саибат

Уьмуьрдин нур, рикIин хиял,
Жеда анжах тек-тек аял.
Акъвазнавай хъуьрез къаял,
Я къизилдин гуьл, Саибат!

Гъиляй къведай гьар са кIвалах,
Мез ширин вирт, сивни булах,
Цуькверивди ацIай яйлах,
Я алванрин чуьл, Саибат!

Гуьрчегвилиз тамаш вичин,
Бегьер гъидай таз я ичин.
Ширин шуьрбет авай гичин,
Земзем булах-гьуьл, Саибат!

Агъа, Вини, Кьулан СтIал,
Гуьзел рушар авай кIватIал,
Багьа къашар авай тупIал,
Я вун са къизил, Саибат!

Тикрар:
Пак гьуруьдиз авай ухшар,
Чiулав вилер-руьгьдин къашар,
Гуьрчег жезвай хьунвай яшар,
Чан камалдин гьуьл, Саида!

Духтур Муъмина

Гьар экуьнахъ нур чукIуриз цавариз,
Чи гьар са югъ элкъурзавай сувариз,
Гатфар чIавуз экъечIзавай чIурариз,
Къизил гуьлдин цуьк ятIа вун, Муъмина?

Буй-такабур, мишреб, абур билбилдин,
Духтурвилин пеше гъиле къизилдин,
Лепе алай гьуьл тир ширин гуьгьуьлдин,
Хура авай рикI ятIа вун, Муъмина?

Бике тир руш дуьнья машгьур Куьредин,
Вун дамах я, устад яз гьар жуьредин.
Халкьариз хуш шумудни са дередин,
Хуьре-кIвале гьикI ятIа вун, Муъмина?

Лезги элдихъ тамам рушар мад ава,
Чи патара квез ухшар сад-вад ава.
Хъсанвиляй ви гьар сана ад ава,
Цавай къвайи чиг ятIа вун, Муъмина?

Чан къведайла багъларални чIурарал,
Нур къугъвада шабалутдин чIарарал.
Ашукь хьанвай муьгьуьббатдин нурарал,
Халис билбил нуькI ятIа вун, Муъмина?

Зун-Сажидин, устад кас я бейтерин,
Иеси тир хажалатрин, дердерин.
Манийрин ван авай гуьзел къветерин,
Бул къуьл авай ник ятIа вун, Муъмина?

Бике ятIа

Женнет макан тир бахтавар Куьреда,
Гьар пакамахъ рагъ, нурар гуз хъуьреда.
Дамах ийиз вердиш гьар са жуьреда,
Вун бикейрин бике ятIа, Маина?

Чин ачух тир, берекатдин нурарин,
Хъуькъвен кьилер цавун кIенел ярарин,
Гьар са патахъ фидай ачух варарин,
Кьасумхуьр ви Мекке ятIа, Маина?

Са пад СтIал, са пад Арагъ вацIарин,
Ван къугъвадай билбилрин хьиз нацIарин,
Къизилгуьлдин цуьк тир яран-лацарин,
Лезгистан ви уьлкве ятIа, Маина?

Мез виртIедин, камаллувал дерин тир,
Сивел даим цIаразвайди хъуьруьн тир,
Диде – СтIал, буба – Кьасумхуьруьн тир,
Ви къадир заз еке ятIа, Маина?

Сажидина авур чIавуз тарифар,
Муьгьтел хьунни мумкин кар я арифар.
Вун такурда чIугун герек гьайифар,
Набат шекер тике ятIа, Маина?

Регина

Заз са гуьзел руш акуна,
Гьар са амал хуш акуна,
Макьажуван руш акуна,
ТIварнти вичин я Регина.

Къаш-къаматдиз пара гуьзел,
Гафар вирт тир цIараз мецел,
Атирдилай пара эфзел,
Гьамгад гичин я Регина.

Тарифар мад жеда ийиз,
ЭкъечIнавай варз я цIийиз.
Кьисмет хьунухь бахт я кIвализ,
Уьзуьагъ чин я Регина.

Лезги чилин тир таза цуьк,
Акур чIавуз шад жеда рикI,
Къацу чIурал гимишдин чиг,
Жез зун кIвачин я Регина

Арина

Буйдиз шумал, пIузар къизил,
Мециз ширин, гъилиз кьезил,
Шад манидихъ кьаз чидай зил,
Заз Алина руш акуна.

Чешме атир, цуьк тир дигмиш,
Лацу пIинид таран емиш.
Сарар гегьвер, пIузар кишмиш,
Заз Алина руш акуна.

Рахун-дарман, акун-дава,
Бике рушар тек-тек ава.
Бахтунин гъед нурлу цава,
Заз Алина руш акуна.

РикIин хиял, вилерин экв,
Чирвал дерин, карда зирек,
Сад Аллагьдин женнет мелек,
Заз Алина руш акуна.

Камила

Сегьер-сегьер къарагъай гар серин тир,
ЧIугвадачни таза чанди ширин тир.
Бахтлувилин сир рикIевай дерин тир,
СтIалжуван руш ятIа вун, Камила?

Яргъи кифер шабалутдин зар алай,
Пел лацу жив, гьар са хъуькъвел хар алай,
Икьван гуьзел, икьван ширин тIвар алай,
СтIалжуван руш ятIа вун, Камила?

Бахтлу рушар пара ава Куьреда,
Тек-тек ава гуьзелар ви жуьреда.
Манийрин сес чукIурзавай дереда,
СтIалжуван руш ятIа вун, Камила?

Цавар вили, чуьл гьар жуьре цуькверин,
Сенжефил руш муьгьуьббатлу рикIерин,
Муштулух гвай межлисринни мехъеррин,
СтIалжуван руш ятIа вун, Камила?

Радьмила

Гьи жуьре за ийин тариф?
Эй, дустунин руш Радьмила!
Вун акурла, варз алай йиф,
Хьана рикIиз хуш, Радьмила!

Мугьман хьайи чIавуз Макьаз,
Аватна Меккедин юкьваз.
Гьуьндуьшкадин ятур жакьваз,
Мажал гайид туш, Радьмила!

Винел алаз куьк тир якIар,
Тухдалди нез хьанач хинкIар.
Хашиладик хуькуьрун кIар,
РикIиз хьанай хуш, Радьмила!

Енге вахав гвай сини хьиз,
КIан хьанай заз вун чуьнуьхиз.
Сабурлувал квахьна михьиз,
Зи гьал хьанай буш, Радьмила!

ГьакI нубатсуз квез я рахун?
Артухлама ийиз яхун.
Алакьзамач кукIун,чухун,
Кумач къуват-кьуш, Радьмила!

Сажидинан гьар са чIалахъ,
Са кIус кьванни квачиз жеч гьахъ.
ТуькIуьрай ви гьар са кIвалах,
Чан бубадин къуш, Радьмила!

Заз гьикI ава

Заз гьикI ава, вун са гъед хьиз цававай,
Ракъинилай артухан цIай рикIевай.
Пара затIар тIалабначир за вавай,
Зун кумир на зи ашкъидин рекьевай.

Мелекри гьикI лув гудатIа чидач заз,
Вун зи рикIе гьатнава, яр, хиял хьиз.
Ашкъидин цIу гьикI кудатIа чидач заз,
А цIу вичел чIугвазва зун аял хьиз.

РикI зи хура, адан куьлег вав гва, яр.
Гьаннава зун ви вилерин есирда.
Зун кIвале тек, вав рагъни варз, цав гва, яр.
Ваз ухшар кас акунач кье асирда.

Ви гуьзелвал шииратдин цIарарал,
ЧIугвадайла, жив къване зи чIарарал.
АцIай квар гваз хуькведайла рехъ кьуна,
Минет я ваз, кьил чIугу чи варарал.

Назина

Вун цава экв гузвай гъед ятIа,
Зун варз жеда, яр, вун патал.
Вун чIура къекъвезвай къвед ятIа,
Гьазур я ваз чан гун патал.

Тикрар:
Назина, вун гьатна рикIе,
Йикъар хьанва йиферикай.
Ширин мани лагь, чан бике
Назина, лацу тир лиферикай.

Зи вилерин экв-нур, чан ширин.
Захъ авай вун сад я, кIаниди.
Заз ачух ви хур, чан ширин,
КIаниди, сад я кIаниди.

Икьван вун кIан хьайи инсан,
Бахтавар кас жедачни, яр?
Дуьньядилай тирла масан,
Вун чи кIвализ къведачни, яр?

Кьасумхуьруьн руш яни вун, Румина

Акун гуьрчег, рахун керчек, масан тир,
Хатур, гьуьрмет вине кьадай инсан тир,
Бахтлу уьмуьр гьализ яргъи, хъсан тир,
Сагълам хьунал хуш яни вун, Румина?
Кьасумхуьруьн руш яни вун, Румина?

Садаз диде, садаз хай вах хьтин,
Чаз багьа я вун шад акун рагъ хьтин.
Гьар са емиш дигмишзавай багъ хьтин,
Женнетдин пак къуш яни вун, Румина?
Кьасумхуьруьн руш яни вун, Румина?

Хизандикай рикIиз регьят, шад хьана,
Квехъ са виш йис кIанзава чаз мад хьана.
Ви багърияр вири санал кIватI хьана,
Межлис хьунал хуш яни вун, Румина?
Кьасумхуьруьн руш яни вун, Румина?

Жавагьир

Нурлу гъед хьиз экъечІзавай цавариз,
Ухшар я вун Яргъирушан лувариз.
Элкъуьрзавай чи гьар са югъ сувариз,
Ви хайи хуьр Мекке ятІа, Жавагьир?
СтІалжуван бике ятІа, Жавагьир?

Гьар са мурад кьиле тухуз рикІевай,
Къизилгуьлдин цуьк ятІа вун никІевай?
Абуземзем булахдин яд мекевай,
Ви хайи хуьр Мекке ятІа, Жавагьир?
СтІалжуван бике ятІа, Жавагьир?

Буба тир «Шагь», диде гуьзел Севил тир,
Вун акунал бахтлу я шад гуьгьуьл тир.
ТІварцІиз масан, кІвалахризни къизил тир,
Ви хайи хуьр Мекке ятІа, Жавагьир?
СтІалжуван бике ятІа, Жавагьир?

Хъел татурай таяр-туьшер рушариз,
Ухшар я ви вилер руьгьдин къашариз.
Муьгьуьббатдиз мукьва жезвай яшариз,
Ви хайи хуьр Мекке ятІа, Жавагьир?
СтІалжуван бике ятІа, Жавагьир?

Шаир буба Сажидина чІаларал,
Алахъна ви суьрет чІугваз чарарал.
Са юкІни зур алай чІулав чІарарал,
Ви хайи хуьр Мекке ятІа, Жавагьир?
СтІалжуван бике ятІа, Жавагьир?

Къизилгуьлдин цуьк яни вун

ЧІарар бурма, чебни чІулав тиллерин,
Акур чІавуз нур тухузвай вилерин,
Атир артух авур лезги чуьллерин,
Къизилгуьлдин цуьк ятІа вун, Саида?
Шад гуьгьуьлрин рикІ ятІа вун, Саида?

Гуьзелвилиз ухшар дидед тегьердин,
Гъед ятІа вун куькІуьрнавай сегьердин?
ТІавус къуш тир Астрахандин шегьердин,
Къизилгуьлдин цуьк ятІа вун, Саида?
Шад гуьгьуьлрин рикІ ятІа вун, Саида?

Сад Аллагьдин бахтунин таж кьилеллай,
Гар ятІа вун ЦІелегуьнрин синеллай?
Мани ягъиз гьазур таран хилеллай,
Халис билбил нуькІ ятІа вун, Саида?
Шад гуьгьулрин рикІ ятІа вун, Саида?

СтІал гада Артемакай яр хьайи,
И шегьердал алайди виз ар хьайи,
Муьгьуьббатдин бегьер гъидай тар хьайи,
Цуьквераллай чиг ятІа вун, Саида?
Шад гуьгьулрин рикІ ятІа вун, Саида?

СтІал шаир Сажидинахъ-хуьруьнви,
Мурад вай сес галукьун ширин ви.
Лезги чилел мидаим тир хъуьруьн ви,
Яраб Аллагь, гьикІ я ятІа вун, Саида?
Шад гуьгьулрин рикІ ятІа вун, Саида?

Бике Гуьлназ

Гатфар мукьва хьайи ара,
Дуьнья гуьзел жеда пара.
Нур бахчедин емиш тара,
Ахъайнавай цуьк я Гуьлназ

Илимрин таж алай дере,
Женнет макан тир чи Куьре
Гуьрчег хъийиз такур жуьре,
Ахъайнавай цуьк я Гуьлназ

Рахун тегьер мециз ширин,
КIватIалнавай акьул дерин,
Ад хкажун патал хуьруьн,
Ахъайнавай цуьк я Гуьлназ

Алкьвадар хуьр-илим Мекке,
ЯтIа машгьур авур уьлкве?
Вун гележег аваз еке,
Ахъайнавай цуьк я Гуьлназ!

Сажидиназ Гьасан, Гуьсен,
Ибрагьимни чида хъсан.
Вун чи дуствал патал масан,
Ахъайнавай цуьк я Гуьлназ!

КIанидаз

Зал гьалтай тек са сефер,
ЧIугунай вун зи рикIи.
ЦIарана цавал цифер,
Кар чIур хьана, за гьикIин?

Чал гьалтай къайи гару,
Зи рикIиз тIар авуна.
Дерт чIугваз, куз хуру,
Хажалат пар авуна.

Тикрар:
Аллагь, ваз язух атуй,
Акъудмир яр зи гъиляй.
ЧIуру ванер чаз татуй,
Накъвар гъидай кьве виляй.

Аман минет, чан диде,
КIани руш кьисмет ая.
Фена зун патал куьне,
А рушаз минет ая.

Зи яр патал гуда чан,
Заз мичIи дуьнья кIандач.
Зи яр патал куда чан,
Заз ичIи дуьнья кIандач.

Сад Аллагьдиз хабар я,
Зи рикI канна къабар я.
Минет я, чан кIаниди,
Вун бахтарин гьамбар я.

Тикрар:
Цав кьакьан я, чил кIеви,
Хатур за гьич хадач ви.
Вун зи цуьк, кIаниди!
Вун зи рикI я, кIаниди.

Рушар гьалтна са шумуд,
Тек са вак ква зи умуд.
РикIяй-рикIиз рехъ ая!
Чи кьисметар гьахъ ая.

КIани ярдиз

Ацукьна зун пашман хьана,
И дуьнья заз душман хьана.
Минет я ваз, я чан диде,
Заз ви вилел нвагъ такурай.

Дуст, зун вучиз гана маса?
Зи рикI икьван тIар авуна.
Заз кIанзавай рушакай са,
Зи душмандиз яр авуна.

Тикрар:
Аллагьдиз зун язух атуй,
Кьисметдай зи яр акъудмир.
ЧIуру ванер чаз мад татуй,
Дидедай накъвар акъудмир.

Зун пашман яз акур чIавуз,
Дидени зи сефил хьана.
За гьарайна чилиз, цавуз,
Шехьайди зи кьве вил хьана.

Дерт кьве патал пайиз тежез,
Ацукьна зун йифди ишез.
Геж гъавурда гьатна, диде.
Уьмуьр закай катна, диде.

Свас-бике

Ша, къурмишин шад демер,
Лезгинкадин кьуьлерин;
Сагъ хьурай гурлу кимер,
Адалатлу хуьрерин!

Тикрар:
Лирли лугьуз чи рушар,
Енге вахар сагъ хьурай!
ТIавус къушраз тир ухшар,
Сусанн чина рагъ хьурай!

Ша, дем кутан, жегьилар,
Им шадвилин вахт я, вахт!
Чамран ачух гуьгьуьлар,
Акун им са бахт я, бахт!
Тикрар:
Лирли лугьуда манида авай хьиз,
Я тахьайтIа, вини бейт тикрарда.

Сусаз чамран тавхана,
Бахтлу хизан, муг хьурай!
Цавар шад яз рахана,
Берекатрин юг хьурай!

Шадвал ая

Вуч бахтавар гада я зун?
РикIиз кIани яр гьатнавай!
Халисан бегзада я зун,
Сивера шад тIвар гьатнавай.

Вун-бахтавар, зун-бахтавар,
Дуьньяни кваз экуь хьана.
Ачух ая ви рикIин вар,
Тамир на зун муьскуь хьана.

Зунни вун, яр, са мехъерик
Таниш хьана, дустар хьана.
Гьамиша зи сефил тир рикI,
Шад авур вун устIар хьана.

Эй Сад Аллагь, чаз са куьмек!
Чи кьве рикIни сад жедайвал.
Артух ая чун патал экв,
Гуьзел гатфар, гад жедайвал.

Зун ви патав атанва, яр,
Ширин гафар багъиш ийиз.
Ачух ая ви рикIин вар,
Зи кIанивал алхиш ийиз.

Лув це цавуз, зи цIару къвед,
Муьгьуьббатдин лувараллаз.
Заз гьикI ава, гила чун кьвед,
Гъетер хьана цавараллаз.

Вун бахтавар, зун бахтавар,
Чи бахтарин гурвал вуч я?
Кьакьан цава авай тавар,
Шад ракъинин нурвал вуч я?!

Вахаз

РикI дар хьайи вахтуна,
Шад жедайвал бахтунал,
РикIевай дерт ачухдай,
Вучиз заз са вах ганач?

Тикрар:
И гуьзел тир гатфарихъ,
Бегьер гъидай чил гала,
Вахан ширин гафарихъ,
Чан диде, зи вил гала.

КIанивилин рекьера,
Дерт гьатзава рикIера.
Я Аллагь, на язухдай,
Вучиз заз са вах ганач?

КIанивилин сирери,
ЧIугвазва зун гьуьлери.
Зун рахазва цаварихъ,
Вучиз заз са вах ганач?

Яб акала захъ, эллер,
Квев я зун цавар, чилер.
Галаз лифрен луварихъ,
Вучиз заз са вах ганач.

Вах-зи рикIин сегьер я,
Вах умудрин бегьер я.
Вахан ширин гафарихъ,
Чан диде, зи вил гала.

Вири вахар сагъ хьурай,
Къуй чи кьилел рагъ хьурай.
Свас гъидайла стхадиз,
Енге вахахъ вил гала.

Вахахъ ширин мез жеда,
Вахахъ гуьзел сес жеда.
Дердер, гъамар лугьудай,
Вучиз заз са вах ганач.

Диде, буба, куьне зун,
Куьз авунач вине зун?
Са дуьз меслят къалурдай,
Вучиз заз са вах ганач?

Дидедиз

Диде сана, буба сана,
Зун тек кIвале есир хьана.
И кьадардин на зун канна,
Диде, зи вуч тахсир хьана?

Тикрар:
Диде рикIел атай чIавуз,
Тамашзава вили цавуз.
Накъвар ала зи вилерал,
Диде, зи вуч тахсир хьана?

МичIи кIвале ацукьна зун,
Акатзава рикIик зурзун.
Багъиш туна тек са шикил,
Диде, зи вуч тахсир хьана?

Рамелла

Таз къелем хьиз агакьнавай бегьердал,
Куьредин нур гъизвай меркез шегьердал,
Ахъа лацу чин хъуьрезвай сегьердал,
Зи миресдин руш ятIа вун, Рамелла?
Пак женнетдин къуш ятIа вун, Рамелла?

Гуьрчегвилин багъиш ганвай дидедин,
Абурлу тир бике лезги къеледин;
Чирвилерин паяр ганвай келледин,
Зи миресдин руш ятIа вун, Рамелла?
Пак женнетдин къуш ятIа вун, Рамелла?

Таммам инсан гьар са хъсан кIвалахдиз,
Вуч гаф ава жейрандив гвай дамахдиз?
Ухшар авай Абу-Земзем булахдиз,
Зи миресдин руш ятIа вун, Рамелла?
Пак женнетдин къуш ятIа вун, Рамелла?

Тикрар:
Ери-бине машгьур Агъа СтIал тир,
Вун меркездин руш ятIа, руш, Рамелла?
Дидединни бубад рикIин хиял тир,
Пак женнетдин къуш ятIа, къуш, Рамелла?

Стхаяр, вахар

И дуьньядал жедай ванер,
РикIиз шадвал гъидайбур жен.
Чан стхаяр, вахар иер,
Гьуьрмет даим хуьдайбур жен.

Тикрар:
Гатфарин багъ цуьквер авай,
Жегьилар шад рикIер авай.
Чамран кIвале эквер авай,
Яргъал рекье фидайбур жен.

Бахтлу яз чун, рикIиз регьят,
Мехъерарни мелер хьурай.
Дуствилер хьуй течир сергьят,
Шад манияр, кьуьлер хьурай.

Чан стхаяр, чан зи вахар,
Къадим тарих чидайбур жен.
Куьн патал за хада ахвар,
Хатур, гьуьрмет хуьдайбур жен.

За лугьузвай мани ширин,
Куь рикIера гьатрай дерин.
Шегьердин эллер хуьруьн,
Шад межлисриз къведайбур жен!

Чан стхаяр, чан вахар

Чан стхаяр, чан вахар,
Квез Аллагьди бахт гурай.
Шад межлисра дамахар,
Ийидай квез вахт гурай.

Тикрар:
Сагърай кьегьел лезгияр,
РикIер михьи гуьзгуьяр!
Лезгинкадин кьуьл авай,
Дагълар, аран, гьуьл авай!

И дуьньядал шадвилив,
Жегьил уьмуьр твах куьне!
Гьуьрметар хуьз садвилив,
Кьилер вине яхъ куьне!

Сагърай Дербентдин шегьер,
Вад агъзур сан яш авай.
Гьар йикъан сегьер-сегьер,
Рагъ кьабулдай баш авай.

Сагъ хьурай чи жегьилар,
Чи уьмуьрдин къизилар.
Шад ийин чи гуьгьуьлар,
Муьгьуббатдин тахт авай!

Сагърай дустар

Межлисдавай ярар-дустар,
Багьа я заз гьар садан тIвар.
Бахтарикай лугьуз тостар,
Куьн гьамиша сагъ хьурай, сагъ!

Тикрар:
Сагъ хьурай куьн вири дустар,
Куьн кьилерал рагъ хьурай, рагъ!
Лезги чилин гужлу картар,
Куьн гьамиша сагъ хьурай, сагъ!

Лезгинкадал кьуьлер ийиз,
Манийрикай гьуьлер ийиз,
Мехъерарни мелер ийиз,
Куьн гьамиша сагъ хьурай, сагъ!

Дустар, за куьн шад мехъерик,
Кьуьлда зарбвал кваз кIвачерик.
Еке ашкъи кваз рикIерик,
Куьн гьамиша сагъ хьурай, сагъ!

Куьн акунал шад я дустар,
Гъилер къизил гьар са устIар.
Кьиле тухуз рикIин къастар,
Куьн гьамиша сагъ хьурай, сагъ!

Бахтавар

Дагъдин буллах гуьзел Самур дереда,
Куркурдин ван сивел алаз хъуьреда.
Де лагь кван заз вунни гьа и жуьреда,
Акуначни шад яз хъуьрез, Бахтавар?

Къугъвадайла, рагъ ви чIулав чIарарив,
Раханачни къизилгуьллер чIурарив?
Билбилдив хьиз, дафтар цIийи чIаларив
АцIанвачни пара серес, Бахтавар?

Шагьвар къекъвез чIиж хьиз цуьквер арада,
Вун акурла хатрут, пIини чарада.
Маса кас тваз кIан жемир чи арада,
Вичив гвачир мизан-терез, Бахтавар.

Уьмуьр гьеле амазма ви цуькведа.
Ви тарифдин ван гьадда кьуд уьлкведа.
Лугьуз жедач, зун ви кьилив хкведа,
Вуч затI ятIа течир гъерез, Бахтавар.

Къаш туш кьван вун пайгар къизил закIалдиз,
Зун рахазва вав михьи тир рикIелди.
Ви жавабри, гайи гьар са суалдиз,
Зун мягьтелна, инсанперес, Бахтавар.

Аферин я къвезвайди вун хайидаз.
Кьисмет я вун Сад Аллагьди гайидаз.
Сажидиназ кьван пара кIан хьайидаз
КичIе я вун цIраз-кIуьрез, Бахтавар!

Эй Сад Аллагь

Такабурлу дагъдал гатуз жив къвана,
Гуьзел йикъар вацI атана, цив гана.
На ви кьисмет зав тагана нив гана?
Вили цава ишигъ гузвай имарат,
Яраб гьина аватIа зи Инарат?!

Умудар сад хьун патал чи рикIерин,
Гатфар къвезва лувараллаз цуькверин.
Яргъируш тир ирид жуьре экверин,
Вили цава ишигъ гузвай имарат,
Яраб гьина аватIа зи Инарат?!

Рагъ экъечIиз акур чIавуз зар галаз,
Дагъларилай живер катна гар галаз,
Дуьнья я им девран гьалдай яр галаз.
Вили цава ишигъ гузвай имарат,
Яраб гьина аватIа зи Инарат!?

Эй Сад Аллагь, вакай чара герек я.
Хажалатар чIугвадай кьван гьелек я.
Зи кIаниди пак женнетдин мелек я.
Вили цава ишигъ гузвай имарат,
Яраб гьина аватIа зи Инарат?!

Инарат

Къизил гуьллерив ацIанва чуьллер,
Якъут, мержанрив къугъвазва гьуьлер.
Гьикьван хуш я заз ви чIулав вилер?
Лацу тир пелев кьадай, Инарат!
Дарман тир рикIин тIадай, Инарат!

Гуьзел къаш-къамат, хуш рахадай мез,
Багъишнавачни Сад Аллагьди квез?
Япара авай ви билбилдин сес,
Пияла ятIа хъвадай, Инарат?
Дарман тир рикIин тIадай, Инарат?

Аллагьдин хатур аватIа эгер,
ПIузаррал алай цIурурмир шекер.
Тариф тавуна жедани мегер?
Гафаралди вав кьадай, Инарат?
Дарман тир рикIин тIадай, Инарат!

Шаир Сажидин ваз жагъуриз бахт,
Гьазур я рекьиз алагуьзли вахт.
Мулдин цуькверин муьгьуьббатдин тахт,
Ихтияр я ваз кьадай Инарат!
Дарман тир рикIин тIадай Инарат!

Такабур дагъ, вал гьикьван фад жив къвана?
Эй Сад Аллагь, на зи кьисмет нив гана?
Сефил йикъар ракъурдайвал цив гана,
Муьгьуьббатдин ишигълу гъед-имарат!
Яраб гьина аватIа зи Инарат?

Умудар чи сад хьун патал рикIерин,
Кьуьд акъатна гатфар къведа цуькверин.
Яргъирушан ирид жуьре экверин,
Муьгьуьббатдин ишигълу гъед-имарат!
Яраб гьина аватIа зи Инарат?

Дагъларилай цифер катиз гар галаз,
Вили цавуз рагъ экъечIда зар галаз.
Девран гьализ рикIиз кIани яр галаз,
Муьгьуьббатдин ишигълу гъед-имарат!
Яраб гьина аватIа зи Инарат?

Сара вах

Чахъ гуьзелар ава гьар са дередин :
Къуба,Къусар,Самур,Кьурагь,Куьредин,
Амма икьван гуьзел, гуьрчег жуьредин,
Акурди туш и вун хьтин, Сара вах,
Вун ваз кIани дережада сагърай, вах!

Мецел-ширин, сивел-хъуьруьн, гуьгьуьлдин
Вун цуькведин тахтунава жегьилдин.
Заз чан алай цуьк тир, вични къизилдин
Акурди туш и вун хьтин, Сара вах,
Вун ваз кIани дережада сагърай, вах!

Къусар шегьер-асул ери-бине тир,
Юлдаш-Олег-кьве вилинни нине тир,
Цуьквер хьтин тек пуд рушан диде тир,
Акурди туш и вун хьтин, Сара вах,
Вун ваз кIани дережада сагърай, вах!

Дианани Карина руш-кьветхверар,
Кристинани-муьгьуьббатдин бегьерар.
Гьар са руш са лезгистандин сегьерар,
Акурди тун и ви хьтин, Сара вах,
Вун ваз кIани дережада сагърай, вах!

Лугьумир хьи Сажидина кими яз
Теснифна и чIал, куьн рикIиз чими яз.
Зун, лагьайтIа, шаир, дадаш-ими яз,
Акурди туш и ваз хьтин, Сара вах,
Вун ваз кIин дережада сагърай, вах!

Алина

Вун, гуьзел, кIан я заз
Вуч себеб хъел хьанва вун зав?
Чан ширин, билбилдин сес,
Мукьувай ван хьана заз,
Вун рекьив ерли текъвез,
Залан кар къван хьана заз.

Тикрар:
Ви бахтунал ашукь я,
Ви тахтунал ашукь я.
Зи гафар ваз талукь я,
Чан зи гуьзелди.

Алина, шад хьана заз,
Гатфарни гад хьана заз.
Демера кьуьлер ийиз,
Туьтуькъуш сад хьана заз.
Мехъерар, мелер ийиз,
Земземдин яд хьана заз.

Бахтина

Вун дуьшуьш сад хьана, сад,
Бахтина, шад хьан, шад.
Дуьньяда тек яни вун?
Вилерин экв яни вун?

Тикрар:
Заз уьмуьр вун галаз,
Ширин я заз, ширин я.
Муьгьуьббат мадни заз,
Дерин я заз, дерин я.
Хуш кIвалах даим ваз,
Шадвилелди я заз хъуьруьн.

Шадвилелди гьалин девран,
Кефияр куьк жедайвал.
И дуьнья ийиз гьейран,
Чилни цав цуьк жедайвал.

Вуч ширин я

Къал-чуьруьк квай гьуьжетдилай
Пис кар авач къилетдилай.
Къурбатдавай женнетдилай,
Жуван ери-хуьр ширин я.

ЯлайтIани яхцIур йиса,
Акьул жедач къачуз маса.
ЯкIалайни чарай таза,
Ахмакь касдиз къир ширин я.

Хъсан кар жеч гьуьрметдилай,
Пис затI авач ришветдилай,
Гьарамзада лезетдилай,
Ярдин гьалал сир ширин я.

Чир хьун хъсан я гьар садаз,
Гьим дерин я, гьим я даяз,
Галукь тавур хъуьтIуьн аяз,
Къацун таза цIир ширин я.

Яман кIвалах фич рикIелай,
Алуд мийир жув рекьелай.
Ясиндилай течиз кIелай,
Куьруь астахфир ширин я.

Кими касдиз акьулдилай,
Дуьз лагьай чухсагъулдилай,
Вичиз чидай яхул даллай,
КьацIанвай цин вир ширин я.

ХъуьтIуьн йикьни текъвер гъиляй,
Дустунилай вакай хъелай?
Катна фейи ви варцелай,
Жейрандилай къуьр ширин я.

Къалгъандилай хъуьтуьл сараз,
Як гайитIан гъилел чараз,
КIвалин къадир течир ламраз,
Валлагь, мичIи куьр ширин я.

Эминани Сулеймана,
Шумуд садаз тарсар гана?
Ахмакь вакIаз тIуьна-хъвана,
Яд амачир хир ширин я.

Сажидин, на куьтягь куьрел.
Элкъвена хьиз са цIуд хуьрел,
Гваз хтайнвай, фена пIирел,
Руквадин таъсир ширин я.

Жезвач несиб

Кьарадикай инсан хьурна Худади,
Акьалдарна чанни, акьул багъишна.
Хуруда ван туна рикIин-кIутади,
Чиниз экуь женнетдин нур багъишна.

ГьикI лугьуда, акьах юргъа балкIандал!
МичIивилин тамай экъечI чамарна.
Гьикьван гужар акьалдарна зи чандал?
Кайи рикIяй акъудзава гумар на.

И кар патал тирни На чан гайиди?
Ахьтармишиз гьулдан яни, ракь я ни?
Зун бахтлу жез тир дидеди хайиди,
Бахтсуз авун кьисметдинди гьакь яни?

Зи чкадал кьарадикай Худади,
Са маса затI вичиз туьретмишначир?
Гатадалди кьил кьисметдин кIутади,
Вучиз, Аллагь, и кар гуьзетмишначир?

БалкIандикай чара кьуна катзавай,
Зи хуруда муркIар кьазва къуйда хьиз.
Садни авач зи гъавурда гьатзавай,
Гьахъ кваз такьаз адалатсуз судда хьиз.

МичIи йифер, экуь йикъар амай кьван,
Гьахъни БатIул эбеди я женгина.
Дегишвилер хьурай чпиз кIамай кьван,
Къайда – сад я, кузва зи чан куькIуьнна.

БалкIандикай чара кьуна, гьиниз кьван
Вун катдатIа лагь, я кесб Сажидин?!
Жува Хушбахт и кьадардин виниз кьан,
Амма ваз ам жезвач несиб, Сажидин!